Davno me ni neki tako razveselil kuliko Marica i Mijat Barišić, penzići z otoka Vira. Zač? Pa zato ča su živi dokaz tomu da j’ čovik star unoliko kuliko se takovin ćuti. Njih dva su prosvjetni delavci, ča bi se reklo učitelji i celi su život proveli vadeć decu. Mislin da njihovemi školani š njimin nikada ni bilo štufo. A zač su oni mane hitili potloh? Pa zato aš su naumili stopon doć do Liverpula kako bi dali podršku Letu 3. I leh da znate, Marica ima 74, a Mijat 77 let. K tomu njin je i vela želja upoznat Letovci aš da su njin baš napeti.

A ako bi Let 3 slučajno šal z traktoron va Liverpul, njih dva da bi se tako rado ukrcali na istoga. Pa sad ja koristin priliku i ovaj kantunić da va njihovo ime zamolin Mrleta ale Prlju da jih zamu na ta traktor, pa neka se ljudići vesele. A ako niš od toga ne bude Marice i Mijatu ni bitno aš njin stopirat do Liverpula neće bit nikakov problem, tr stopiraju i tako putuju već let i let. Ako računamo da su već od pedeset let va braku, a zdignuti prst njin je bil način prevoza i prvo leh su se utaknuli, onput je za njih doć do Eurosonga jušto »pis of kejk«.

Marica da j’ još kod divojčica z vlakon šla tete va Englesku, a Mijat kod deškić stopon puno puti do matere ka j’ delala va Austrije. O semi onemi drugimi putovanjimi ka su nastala od kada su se zavoleli da ni ne govorimo. Ma, moramo reć da j’ Marica upoznala i Bitlsi i Stonsi, ima i autogrami, a i da su spali posakud – od stogi sena do elitnih mest. Intanto, za takove dve postareje, a tako mlade osobe već davno nisan čula. Držin njin figi da ostvare se ča su naumili i da se doma vrnu z Letovcimi ki će Eurosong dopeljat va Hrvasku, i to neovisno va ki grad. Va komu god da bude, jedno j’ sigurno – mama i tata ŠČ će stopom i na ta, kako bi se po modernu reklo – event. A ako mane ikada put nanese na Vir, poiskat ću ta virski Let 3, to j’ sto posto. Aš takovi ljudi ni dovoljno preko slov upoznat, ta spomenik se mora videt va živo.

A kada smo već pu spomeniki moran spomenut on od Marije Jurić Zagorki va Tkalčićevoj, va Zagrebu. Ma, vranić dal da ga i onoga kolegu ki j’ zmislel da ju se za cicu ćapa radi srići. Iskreno, ja tu iman tuliko dilemi da bi mi jih bilo teško nabrojat pa ću leh one najveće. Recimo zač baš za cicu ćapat gospu Mariju? Zač ju opće ćapevat za bilo ča? Ako bin ju već morala, dotaknula bin njoj glavu aš va glave je bila najjača. Se to skupa mi j’ tako škifo da van ne moren opisat. I zajedno su mi napamet pali naši rečki spomeniki i ću neću moran van reć da me j’ najveć pojidal on od Janka Polić Kamova spred Konta.

Avah je mane ako ta nazovi tv turistički vodič dojde v Riku, Janku se ne piše dobro aš i sami morete pretpostavit ča bi ljuden ke pelje rekal – za ča da ga ćapaju. O, Bog nas očuvaj. I sopeta isto – videla žaba da se konj potkivlje pa j’ i ona digla nogu vajer. Tako i ta isti ki se opravdava z ten da j’ va Verone normalno za cici ćapevat Juliju. Koda ju je pital. I ča, ako j’ neš negdere mora bit i pu nas? Baš me zanima ča bi mu Romeo rekal da je živ. Matere nisan ni rekla za ta slučaj cic aš bi namaljala naredneh leto dan, a ne da mi se to naslihat.

Neka vranić zame se to skupa iman ja i većeh problemi. Recimo to ča j’ celi put s ken vozin od domi do dela i nazad raskopan pa j’ oneh desetak minuti kuliko mi j’ rabilo za doć sada najmanje četrdeset. I već od toga ako gren va špice. I sad se ja pitan pa ča baš moraju se va isto vrime kopat? Ki’vo dan tako stojin va toj sakramenskoj kolone i mislin ča bi sad Hitna da njoj je pasat. Zajedno mi j’ bilo slabo pa san misli prehitila va drugi grad i počela se smet aš san se domislela kako j’ pred jedno leto dan kad san se vozila na Korčulu i naslišala Radio Dalmaciju, va nekakovoj kontakt emisije o gužvami okol Omiša, jedna ženska rekla da j’ skoro 25 let va braku, a da j’ pol od toga provela va kolone na ceste od Splita do Omiša. Još malo pa neće aš je most spojen. A, ča se tiče ovoga v Rike, ako penziju dočekan va kolone – javit ću van.