Najprvo da se ispričan sen onen ki su pretplatnici Novoga lista i ki su prekčera čekali da njin dojde novina. Bi bila došla, kako i vavek, da ni neki del va tiskare šal mater ženit, pa j’ bilo prehićuj ovo simo, ovo tamo da novina more zić, da ju ljudi moru dobit. Saka čast i sen delavcon va našoj rotacije aš, mi napišemo, litratamo, posložimo, a oni su ta zadnja balinjerica ka ju mora poštrkat va život. A niki ne zna ni ki su, ni ča su, a celi su život va procesu. Ma samozatajni. Zato, ako ne radi nas ki smo vidljivi, domislite se na ti isti ki su kod vilenjaci celu noć delali okol stroji da bi provali popravit i poslat novinu va svit, ne njurgajte preveć, aš to su stvari ke se ne moru predvidet, a sakomu se moru dogodit.

Uglavnon, hvala sen onen ki su zvali aš novinu nisu dobili. To nan znači jako puno. Zač? Pa, saki voli videt da nekomu fali, a mi ćemo ta sakramenski del ki j’ bil bolan, ozdravet i se će bit kako i vavek. To ča će sirota Mateja, naša nova tajnica, još mesec dan i va snu govorit – oprostite, novine će doći, samo molim vas za malo strpljenja jer smo imali kvar u tiskari, to j’ se va rok službi. To ča ću ja, po ki zna ki put va životu sanjat prazne stranice, to j’ isto pod normalno, ma ono ča j’ mane va celomu tomu šušuru najveć razveselilo je ča smo bili tim. Ma, delali smo kod švicarska urica i namesto da neki zanjurga aš je bil ubitačan tempo, mi smo bili zadovoljni. Morate znat i da se pu nas delaju tri novine – naša, istrijanska i zadarska, ma nikoga ni pojidalo ku dela, delali smo se. I sopeta, tu saka čast našoj grafičkoj redakcije, Sanja ima tim ki »nosi«. Ma, nemojte ih sada zvat za drva nosit i slagat, oni su van više za to slaganje i preslagivanje slov, slik i stranic. Uglavnon, morala san van ovo povedat aš me j’ pokla puno, puno vrimena neš vrnulo va mladi dani va keh dite ni znalo ča j’ sto kil, pa j’ zelo i odneslo.

Uglavnon, va silnomu tomu šušuru, mane j’ nasmel moj Mili. A, Mili, to znaju si stalni čitatelji ovoga kantunića, je Dražen Herljević, izvršni urednik Novoga lista, a ja bin se usudila reć i najbolji novinar analitičar koga j’ Novi list ikada imel, osoba ka sako slovo va novine, saki dan tri put vidi i pročita, čovik bez koga bi Novi list bil kod negdanja kuća bez ognjišća. Zač? Pa, zato aš kad san se va jednomu trenu naše lude trke z vrimenon, obrnula i zazijala – Mili, se dospenemo do roka, ma ča ćemo z mrtvimi, on je bez da se obrne zazijal – ki j’ umrl do roka, umrl je, a ki ni će počekat! Morete mislet ki smeh je nastal nakon toga, pa san pomislela kako nikada ti si mrtvi ljudi keh odbavljamo na on svit na našeh stranicah nisu prošli z tuliko pozitive kuliko oni ča su čera bili va osmrtnicah.

A kada san pu Miloga, onput moran reć da saki Gromičan kod i saki čovik na ovomu svitu ima svoje viđenje zapošljavanja strane radne snagi. Znate i sami ki šušur je bil okol pusta na Čavje. Bilo j’ ča j’ bilo, ma moj Mili ima svoju štoriju. Moral je poć na servis va Pulu, zaspraven ne on leh njegov auto, i on, kako nikada nikoga niš ne moli, ni ov put ni pital nikoga da ga vrne z Puli doma leh je popeljal ta svoj autić, pušćal ga na servisu i posel se va bus za doma. A bus pelje Nepalac. Govori Mili da j’ bilo pet putniki do Labina, a četiri do Riki. Va Labinu baj najt, kako bi se reklo, Nepalac je fermal bus, pušćal ih nutre i za deset minuti došal i prston kažuć na drugi bus govori – dis bas, dis… Dokončali su da se moraju preselit, i su se preselili skupa z šoferon Nepalcen. A, va novomu busu mrzlo, si se tresu, a brižan Nepalac ne more potrefit puc za zapret vrata. I, baš da će se Mili stat i poprčkat po temi botuni, dohaja neki z busne stanice i govori Nepalcu ki botun da stisne i onput su na miru i z lipun vožnjun došli v Riku. Kad je šal po auto, bus je peljal Istrijan i Mili ni imel ča za povedat.

Ma je zato, istu večer pokla dela došal doma i lačan kod pas naručil na dostavu picu i mrzlu pivu. I ni narudžbe, i ni, gljeda Mili na tu sakramensku aplikaciju i vidi da se ta dostavljač simo-tamo vrti po kvartu. Intanto. va neku dobu zvoni mu neki na parlafon i čuje »opn dor«. Skoro da j’ zazijal – tr su ti oprta, ma je premučal, platil to ča j’ dobil, a dobil je mrzlu picu i teplu pivu i na kraju dal pozitivnu ocjenu dostavljaču, aš da ča će dat negativnu pa da sirota ostane bez dela.

Eto, to smo van mi si skupa, pa vi isto tako nemojte dat negativno aš novina kasni. Nismo tuji, saki dan to delamo, ma protiv više sile se ne more.