Precjednik je rekal – izbori će bit sedavnajstoga četrtoga i šlus. To ča j’ to sreda, a ne nedelja, naciju baš jako ne pojida aš ako j’ neki svjecki prvak va spajanju neradneh dan, to smo mi. Jako smo dobri va tomu premošćivanju, da smo takovi va mostogradnje, kade bi nan bil kraj. Na račun zibranoga datuma, premijer nima niš protiv, govori da su spremni i da ne bacilaju ki dan će bit. Javila se j’ i oporba ka j’ zajedno zvukla busi ki dohajaju z dijaspori i slično.

Srićon, va mrtvi se nisu pačali aš njin je ćaro da oni imaju svo vrime svita pa da njin je jušto sedno kad će bit zibiranje. I Državno izborno povjerenstvo je imelo ča za reć, pa je reklo da to ni prvi put da izbori nisu po nedelje aš da j’ tako bilo i 2000. leta kada smo zibirali na tretega prvoga, odnosno bil je pundeljak. E, na to se se oglasil i jedan moj kolega ki j’ pretpostavil da se j’ precjednik konzultiral z nekimi numerolozimi i da je biral dan ki j’ najsrićneji va tekućemu letu. Onput san ja pitala – za koga najsrićneji, a on je odgovoril – srića svima, a ne samo njima, pa sad si ja mislin ki su ti oni.

A onda j’ počel namaljat kuliki od njih bi oteli poć va Europski parlament. Iskreno, malo san se začudila aš san, ovako politički neobrazovana mislela da to i ni neš napeto, kad – drek, očito je, aš da bit EU parlamentarac ni dobro, ne bi se tuliki za to mesto borili. Mane bi bilo dosti leto dan va Saboru da dobijen tu penziju pa da san na miru. Računan, tr ti saborski zastupniki ionako va sabornice na prsti jedne ruki moreš pobrojit, ča znači da dohajaju kad njin se da, morda ni onda, a i kad dojdu zašparaju na obedu aš je ta saborski restoran fanj jeftin i fanj dobar, pa još ov dodatak, pa on dodatak i za čas pasa leto dan i dojde penzija z kun neću morat kopat po bajah. A i teh baj ke nisu pod ključon je se manje i se su siromašneja trpeza.

I sad, kod grom z vedra neba, doklen ovo pišen dohaja vijest da ćemo morat birat i novoga precjednika. Kako me uho boli i nisan valje čula zač, pitan – ča se Milanoviću neš dogodilo, da bi na kraju videla da se sam sebe dogodil ale da j’ po svomu dobromu običaju, sopeta uspješ šokirat celu naciju aš je došećal na presicu SDP-a i obznanil da gre na izbori z ezdepeovun koalicijun kod kandidat za premijera. Srce Isusovo, zazijala san – pa to znači da smo bez precjednika. Zač? Zato, aš Milanović, da bi ušal va svoju životnu bitku z Plenkovićen, za ča verujen da mu je cilj, mora dat ostavku na mesto precjednika. Onput san još malo mislela pa mi j’ pala napamet još jedan razlog ki ga j’ mogal natirat na ovakov potez, a ta je da je podmetnul hrbat za dobrobit stranki. Ala iskreno, kakove bi šansi imel Peđa naspram Plenkovića. Morda jedino kad bi se premijer biral po visine. Niman niš protiv čovika, ma jednostavno, nismo si za se.

Nego ja sad iman puno pitanj. Recimo, ki će raspisat precjednički izbori aš si su raspušteni i opušteni. I Vlada, i Sabor. A neki mora. Oni okol mane, ki puno već znaju o politike, spominju tehničku vladu, ma zaspraven, neki će, ča se ja okol toga pojidan. Iman ja čuda svojeh problemi. Intanto, bit će ča bude, a neš će bit aš vavek neš bude. A da je Milanović šegav, to mu niki ne more osporit. Tr, čovik je već zadnje dve leta va svojevrsnoj kampanje, a da mu niki ne more reć da j’ to bilo nelegalno. Fanj je oneh ki se pojidaju kako će ovi izbori finit aš imaju putra na glave, a i fanj je i oneh ki već sada moru iskat novo radno mesto, neovisno bili levo ale desno. Tako j’ to kod živoga čovika, nikad ne znaš ča se more dogodit.

Ono ča priznan – jako se veselin predizbornoj kampanje ka sljedi aš će bit žestoko, a »dva ratna druga« imaju oba fanj velu i opaku zajičinu. Mislela san da su Merikani na velomu čudu okol svoga zibiranja, ma nismo ni mi dugo. Cirkus tamo, cirkus tu. Leh da je zabavno, a pokle kako bude – bit će. I na kraju moran priznat da mi j’ malo žal sirotoga Peđi aš, kako bi mu rekli va regionu – Peđa, džaba si krečio. Ma, on se me par ne ume razjadit pa se ni ni ov put. Mišljenja san da mu j’ Milanović svojin potezon spasil politički život, a ča j’ od svoga načinil, videt ćemo 17. četrtoga. Do onda, kuraja!