Vrime j’ od blagdani pa nikakovo čudo ča sen po glave gre leh žerilo. Zaspraven reć, nekomu gre i pilo, a nekomu i jedno i drugo. Mane, ka san inače zaštitni znak od sengvići i sog brzoga jida, nekako dojde na sedno. Tr da j’ spred mane stol pun delicij, i da me neki pita ča bin, bez mislet bin rekla – sengvić, pica, kebab. Zato i će me za ki dan bit lagje preskočit leh zaobić, a si nutricionisti i pobornici zdrave prehrani će me razapet kod Isusića. Mat bi rekla da mane žlica ne rabi, i ne bi lagala, ali ča ću, morda i mane jednoga dana dojde z riti va glavu. Baš malo gljedan va stol od kolegi i saki dan isti prizor – najlon, a va njemu mandarine, naranči i banana. Kuliko on voća dnevno poji, ja ne pojin va leto dan, ma zato njemu nikada niš, a mane saki dan žgaravica. Ja, ma trebe se znat kontrolirat, a ja i kontrola kod vranić i božić.

Od početka dvanajstoga meseca iman stres od blagdani aš to ni leh okrunit jelvić, to j’ još milijun popratneh, a tako štufeh stvari. Ako neš mrzin z dna duši to su ta povedanja i napovedanja ka obično počnu z rečenicun – ča ćemo ovo leto za Božić, a ča za Novo leto. A, ča ćemo, tr vavek je se isto – za Božić neš ča leti, za Novo leto neš ča kopa ale za Božić je najveć puti patka, a za Novo leto odojak. Čitan da j’ baš on najveć poskupel. A kako i neće kad je ki’vo mesec bil pomor prasac va Slavonije. Intanto da kilo gre i do 13 euri i da niki baš jako ne njurga. Aš, za odojka se mora imet, a pokle zubi na policu i cito.

Onput još i one prokljete sarmi. Prvo dohtoriran leh ča kupin meso za nje, ne zato ča ga ni ale je skupo, leh zato ča se još ta ni rodil ki bi mojoj roditeljice udovoljil. A, sirota ja, ionako pojin leh kapuz aš mleveno ne volin. Još dobijen i tiradu da san zvicijana i jako bezobrazna aš da j’ meso po si soldi, a ja da ga hitan. To ča ona poji pol sarme aš, citiran ju – stari ljudi ne moru puno jist, a te sarmi mi drugi ne volimo ma jih moramo imet aš je običaj, e, to ni ni bezobrazno, ni zvicijano. Ben ti dvostruka merila. Da stvar bude bolja, još mi je i friđider šal mater ženit. Jušto čera i se ča j’ bilo nutre šlo j’ va smeti. Tako da će mane bit danaska tekila po butigah, ne da kupin dari za Božić leh da kupin friđider. Pa onput teški i naporni radovi – staroga znet, novoga klast, staroga odnest…

Najraje bin šla spat i zbudila se drugo leto. Blaženi medvedi, oni prespe vas ov šušur i na proliće kad se zbude se njin je haj naj. Začudo mat ni rekla da san ja kriva ča j’ frizer šal va vječna lovišta. A da je i otela ni me mogla okrivit aš je se bila posljedica nestanka struji. Delal je doklen ni nestala, kad je opet došla – više ni delal. Mat je leh rekla da blaženi vintoferi aš da oni nisu bili na struju. Skud je ti vintoferi znela, pitaj dragoga Boga. Jedino ča znan je da ako ja jutra ne kupin novi frizer, mi ćemo ovoga Božića živet na mojoj delicije ča će reć – od patki niš, od mlinci niš, a miksat ćemo bakalaj i sengvići.

A da j’, kako to obično i bude – celi svit čera ponemel, to svjedoči saki onaj ki je čera va neku dobu, od deset jutro do k večeru bil ili proval pasat kroz grad. Ja nisan, ma z druge ruki znan da j’ bila nezapamćena gnjeta. Saki od mojeh koleg ki j’ z istočne bandi hodil na delo je zakasnil i saki j’ dohajal z istun rečenicun – pas mater i gnjete, koda j’ sudnji dan. Mučala san i smiron mislela – neka se danas zdivljaju pa ću ja jutra već nekako lagje kupit frizer. A ja, je sebično, ma tako je.

Leh da van još rečen kako mi j’ nova gradska knjižnica baš super. I nju san videla leh na slikah aš san sirota kod rudar – ujden va Novi list i zijden z njega – vane svit prohaja, ma ja se to znan leh po slikami i po onomu ča drugi napiše. Po modernu bi se reklo da živin va paralelnomu svemiru. Još da mi ugrade i čip z umjetnun inteligencijun, srićna ja, srićni si oni ki z manun posla imeju. A ča, dobro mi stojte, srićan van Božić i držte figi da najden ta sakramenski frizer aš ako ne gljedat ću kako i mrtva patka more odletet. Va smeti.