Ni da se ne nasmejen kad po društveneh mrežah vidin škerci na račun njegoveh let
Kad san čera rekla da j’ rođendan hrvackomu Broju Jedan, zajedno su zakrakorili va redakcije – a, ne, ti si dobro pobrkala lončići, ni Milanović rojen na današnji dan. Onput se javila druga – a, bome ni Plenković, pa treti ki j’ rekal da ni Šeks, a kako mi j’ već bilo dosti njihovog blebetanja samo san zazijala – mir va štalice, oni nisu nikakovi broji jedan, va Hrvackoj je jedini Broj Jedan šjor Josip Manolić zvan Japica, a on danaska slavi sto i četrti rojendan. Leh su odmahnuli z rukun i rekli – a, on! A ča, a on, ala budite vi face i poživite 104 leta, a da sto još si svoji i da imate vozačku dozvolu. Ni važno vozite al ne, važno j’ da ju imate. Intanto, moj duboki naklon šjoru Manoliću aš preživet sto let turbulentnih vrimena i bit va njimi angažiran, a ne ležat kod lena krava, to j’ zbilja za naklonit se. Na stran sada ki je, ča je i ča ni bil i je Manolić, za me je on medicinski fenomen i jedan od troje ljudi ke san upoznala, a da su stareji od sto let. Jedna j’ bila gospa z Luna ka j’ doživela 105 let i va 104. letu još na kapučino va obližnju oštariju saki dan hodila. Drugi je šjor z Šmriki ki j’ navršil 101. leto i još vavek se prti po voćnjaku aš rabi voćki porezat, kopa va vrtu aš vrt ne sme bit zarašćen i prez ičesa, gre z hćerun v Riku da malo vidi ča j’ novoga, klada pločice i ki zna ča još, a preživel je marš na Matić poljane. Si ti ljudi su mane heroji.
Na, kuliko j’ se boleštin bilo va pasaneh sto let, a Manolić je preživel i španjolsku gripu, i va stotomu letu koronu i to doma uz upalu pluć, a o onemi bolimi za ke ne znamo da ni ne govorimo. To j’ ta stari koren koga ni tako lako spukat. A ča j’ se pasal va prvomu, drugomu i tretemu ratu? Jedanput je rekal da j’ preživel četire države, četiri različita politička režima od keh da j’ dva rušil, jednoga gradil pa rušil i jednoga storil. Dosti da se domislin da j’ bil desna ruka i Titu i Tuđmanu pa da rečen – avah je mane, ni mu bilo lahko. Fanj su teški ti Zagorci, ma Podravci su valjda trpežljivi. Ako niste znali Joža se j’ rodil na 22. tretega 1920. leta va Kalinovcu kraj Đurđevca.
Ni da se ne nasmejen kad po društveneh mrežah vidin škerci na račun njegoveh let, aš se j’ to za ljudi. Jedan od najboljeh mi je onaj va komu on dodaje daski Noe da načini barku. Intanto, šjor Manolić je ušal va 105. leto, njegova hćer govori da j’ dobro i mane više od toga ne zanima. Želin mu se najbolje, a kad će saki od nas tamo kamo gre saki živi stvor, odnosno kad će sv. Petar zazveketat z ključimi, to j’ na drugomu da misli, a ne na nan. Jedino ča me zanima je odgovor na jedno pitanje. Ko? Znate ono kad novinari stari ljudi pitaju – koja je tajna vaše dugovječnosti, a devedeset posto njih odgovori – umjerenost u svemu. E, pa mane zanima kuliko lažu, a kuliko govore istinu. Odnosno, su sa ta silna leta za zbilja bili umjereni ale su po stari dani smanjili doživljaji.
Oni ki umjereni sigurno nisu, baren ne na zajiku su naši političari. Me par da va celoj Lipoj Našoj ni oštarije va koj se tuliko zija i blati jedan drugoga, tretega i petoga kuliko va ovoj predizbornoj kampanje. Ki put bin zaprla i oči i uši kad povedaju. Da jih ni ne čujen, ni ne vidin. A želju da š njimin povedan, da jih bilo ča pitan – zbilja niman. Tako ispada da san ja ona tri majmuna va jednomu – ne slušan, ne gljedan, ne govorin. I o politike već ov put zbilja nećemo ni slova već. Žal mi je i harti, i slov.
Otela san van još povedat kako san zbilja vriti. Pa, ja se već ne umen z buson vozit. Ne znan poć ni nutar, ni van. Ne znan na ki se ukrcat, ni kade se skrcat. Ne znan ka zona, ni kako kupit, ni kako poništit kartu. Niš ne znan, po pitanju peljanja z buson ja san tabula raza. I nikad, baš nikada više se neću špotat matere kad se, kad zijde z kući vanka, ćuti kod Alisa va zemlje čud. Najme, povedala san van da j’ paron z mojen auton šal na obračun z stupićen ki j’ moje veličine, pa ne znan je to bilo slučajno ale namjerno, i mada j’ rekal da ga j’ leh malo očešal, morala san promenit cela vrata i još ča ja znan ča se ne. Čekala san na ta popravak tri meseci, i sada j’ konačno auto pu limara, a ja moran na bus. Odnosno, da znan bin šla – ovako, niš od busa, petljan i molin okolo ki će me prehitit. Ma bolje i tako leh ja ne umen, a kakove san srići bus bi peljak kakov Indijac ki isto ne ume, pa nikad nikamo ne bi dospeli. Ovako još imamo šansu.
S kamika i mora
Hrvacki Broj 1
Slavica Mrkić Modrić
23. ožujak 2024 08:34
Foto Darko Jelinek
Ni da se ne nasmejen kad po društveneh mrežah vidin škerci na račun njegoveh let
Kad san čera rekla da j’ rođendan hrvackomu Broju Jedan, zajedno su zakrakorili va redakcije – a, ne, ti si dobro pobrkala lončići, ni Milanović rojen na današnji dan. Onput se javila druga – a, bome ni Plenković, pa treti ki j’ rekal da ni Šeks, a kako mi j’ već bilo dosti njihovog blebetanja samo san zazijala – mir va štalice, oni nisu nikakovi broji jedan, va Hrvackoj je jedini Broj Jedan šjor Josip Manolić zvan Japica, a on danaska slavi sto i četrti rojendan. Leh su odmahnuli z rukun i rekli – a, on! A ča, a on, ala budite vi face i poživite 104 leta, a da sto još si svoji i da imate vozačku dozvolu. Ni važno vozite al ne, važno j’ da ju imate. Intanto, moj duboki naklon šjoru Manoliću aš preživet sto let turbulentnih vrimena i bit va njimi angažiran, a ne ležat kod lena krava, to j’ zbilja za naklonit se. Na stran sada ki je, ča je i ča ni bil i je Manolić, za me je on medicinski fenomen i jedan od troje ljudi ke san upoznala, a da su stareji od sto let. Jedna j’ bila gospa z Luna ka j’ doživela 105 let i va 104. letu još na kapučino va obližnju oštariju saki dan hodila. Drugi je šjor z Šmriki ki j’ navršil 101. leto i još vavek se prti po voćnjaku aš rabi voćki porezat, kopa va vrtu aš vrt ne sme bit zarašćen i prez ičesa, gre z hćerun v Riku da malo vidi ča j’ novoga, klada pločice i ki zna ča još, a preživel je marš na Matić poljane. Si ti ljudi su mane heroji.
Na, kuliko j’ se boleštin bilo va pasaneh sto let, a Manolić je preživel i španjolsku gripu, i va stotomu letu koronu i to doma uz upalu pluć, a o onemi bolimi za ke ne znamo da ni ne govorimo. To j’ ta stari koren koga ni tako lako spukat. A ča j’ se pasal va prvomu, drugomu i tretemu ratu? Jedanput je rekal da j’ preživel četire države, četiri različita politička režima od keh da j’ dva rušil, jednoga gradil pa rušil i jednoga storil. Dosti da se domislin da j’ bil desna ruka i Titu i Tuđmanu pa da rečen – avah je mane, ni mu bilo lahko. Fanj su teški ti Zagorci, ma Podravci su valjda trpežljivi. Ako niste znali Joža se j’ rodil na 22. tretega 1920. leta va Kalinovcu kraj Đurđevca.
Ni da se ne nasmejen kad po društveneh mrežah vidin škerci na račun njegoveh let, aš se j’ to za ljudi. Jedan od najboljeh mi je onaj va komu on dodaje daski Noe da načini barku. Intanto, šjor Manolić je ušal va 105. leto, njegova hćer govori da j’ dobro i mane više od toga ne zanima. Želin mu se najbolje, a kad će saki od nas tamo kamo gre saki živi stvor, odnosno kad će sv. Petar zazveketat z ključimi, to j’ na drugomu da misli, a ne na nan. Jedino ča me zanima je odgovor na jedno pitanje. Ko? Znate ono kad novinari stari ljudi pitaju – koja je tajna vaše dugovječnosti, a devedeset posto njih odgovori – umjerenost u svemu. E, pa mane zanima kuliko lažu, a kuliko govore istinu. Odnosno, su sa ta silna leta za zbilja bili umjereni ale su po stari dani smanjili doživljaji.
Oni ki umjereni sigurno nisu, baren ne na zajiku su naši političari. Me par da va celoj Lipoj Našoj ni oštarije va koj se tuliko zija i blati jedan drugoga, tretega i petoga kuliko va ovoj predizbornoj kampanje. Ki put bin zaprla i oči i uši kad povedaju. Da jih ni ne čujen, ni ne vidin. A želju da š njimin povedan, da jih bilo ča pitan – zbilja niman. Tako ispada da san ja ona tri majmuna va jednomu – ne slušan, ne gljedan, ne govorin. I o politike već ov put zbilja nećemo ni slova već. Žal mi je i harti, i slov.
Otela san van još povedat kako san zbilja vriti. Pa, ja se već ne umen z buson vozit. Ne znan poć ni nutar, ni van. Ne znan na ki se ukrcat, ni kade se skrcat. Ne znan ka zona, ni kako kupit, ni kako poništit kartu. Niš ne znan, po pitanju peljanja z buson ja san tabula raza. I nikad, baš nikada više se neću špotat matere kad se, kad zijde z kući vanka, ćuti kod Alisa va zemlje čud. Najme, povedala san van da j’ paron z mojen auton šal na obračun z stupićen ki j’ moje veličine, pa ne znan je to bilo slučajno ale namjerno, i mada j’ rekal da ga j’ leh malo očešal, morala san promenit cela vrata i još ča ja znan ča se ne. Čekala san na ta popravak tri meseci, i sada j’ konačno auto pu limara, a ja moran na bus. Odnosno, da znan bin šla – ovako, niš od busa, petljan i molin okolo ki će me prehitit. Ma bolje i tako leh ja ne umen, a kakove san srići bus bi peljak kakov Indijac ki isto ne ume, pa nikad nikamo ne bi dospeli. Ovako još imamo šansu.