Baš malo mislin kako san, da ne rečen ča – i šefa i stanicu, onoga časa kad san odlučila bit novinarka. A to j’ bilo još negdere va petomu razredu osnovne školi. Dobro, onda i nisan baš mogla puno toga znat i puno mislet, ma leta su prohajala, a ja nisan, kod druga deca, saki čas imela drugu želju, pa j’ ta startna već za ki mesec pozabljena. Kako san mislela od deset let, tako san mislela celi život i ovo će leto va šestomu mesecu pasat puneh 46 let od kada san prvi put ušla va Novi list. Moja bi mat sad rekla – da ti se j’ baren ta dan bus pokvaril. Ma, eto ni. I tako ja sa ta silna leta nabadan i nabadan, najprvo po makine, a sada po tastature, zabadan nos i kamo rabi i kamo ne, njurgan, zijan, nemin, veselin se, rastužin se i se to gre već davno zasinjanin puton. Ki put nazgoru, ki put nazdolu, ki put lagje, ki put teže i nikada nisan požalela ča san tu kade san, ni ča san to ča san.

Se do neki dan. I to dva puti va istomu danu. Najprvo kad san videla da će čistačica va državnoj službe imet veću plaću leh ju iman ja. I ne daj Bog da sad neki pomisli kako ja iman neš protiv čistačic i toga ča će imet veću plaću od moje aš to ni istina, apsolutno me ni briga da one imaju i pet tisuć euri plaću, ma me je briga ča ju ja niman, odnosno ča se to zanimanje novinar smatra niš koristi pa se tako i plaća. Ako sad neki reče da smo si mi z branše sami krivi aš smo se z načinon pisanja i dopeljali va tu poziciju ja mu leh moren reć da ni saki ki se rodi va štale magarac, a i da ne čisti saka čistačica isto pa sopeta jih niki ne proziva.

Intanto, dočin san to videla san odlučila promenit zanimanje i sad, još ovo malo do penzije, niš neću čitat leh oglasi va nade da ću kade nać da kakov grad, općina, županija, sud, škola ale neš ča spada va državni sektor išće čistačicu i zajedno ću poslat molbu i molit Boga da me prime. To ča mi se j’ već jako teško i sprignut i vrnut va početni položaj, to sad na stran, valjda će bit neka mlaja pa će pomoć. Govore mi da san zakasnila z prekvalifikacijun aš da su ta mesta već zauzeta, da su jih zauzele već sestri, tete, none, materi, žene, hćeri i daljna rodbina od jako važneh ljudi. Drugi mi pak govore da san preškolovana i da mi molba ne bi pasala, a treti da san prestara i da me ne bi zeli.

I sad ča? Zato aš je čovik hodil va školu, aš je ostarel, aš ni va rodu ni va prijateljstvu z važnemi ljudi on neka bude novinar, aš za drugo ni ni? Avah je nan i našoj budućnoste. Pa ki će od dečine već hodit na fakultetu kad jih sustav uči da mala škola pun takujin, a vela škola šup takujin. I smiron mislin kada smo moja prijatelica z Požegi ka j’ s manun studirala i ja, šle čistit Dvoranu mladosti da malo popunimo džeparac, pa san se ja zatukla nutar i celi dan peljala na velomu usisaču čisteć kancelarije, a ona pometala okol dvorani i prohajaju dečina z trsaške osnovne školi. Ona mlati z onun metlun, a jedan malčić se ferma i šćeto neto joj govori – čisti vole kad nemaš škole. Sto posto je i ta mići bezobraznik danaska novinar aš karma je prokljeta stvar. Dobro, sada smo apsolvirali moju prekvalifikaciju, pa ako kade čujete da kakova državna služba išće čistačicu – samo ne preko vezi, javite mi.

Druga stvar ka me j’ va istomu danu navela da pomislin o prekvalifikacije je pust, odnosno čavjanski pust ki j’ sad na palu, sad na depilacije, pa opeta na palu i tako va krug. Neću zahajat va raspravu o tomu je on opće takov kakov je trebel viset ale ne, imaju maškare običajno pravo pusta zvat ovako ale onako, je va redu cenzurirat maškari ale ne, aš moje je mišljenje kod i mišljenje sakoga novinara apsolutno nebitno, tuliko nebitno kod i mi sami da nikoga ne pojida ča se novi čavjanski pust zove Novinarko Škandalić, aš novinara moreš i obesit, i važgat, tr ni drugo ni zaslužil.

Pa ako j’ tomu tako, onput saka čast sakomu ma ja moran reć da si oni ki su njurgali na Čavjanske maškari imaju dvostruki kriteriji, a i fanj su licemjerni. Zač? Zato ča j’ bit novinar časna profesija, a uostalon i novinari su ljudi, neovisno bili Hrvati ale Indijci. I zato, ča se j’ rabilo pačat va pusta i delat škandal kad sopeta visi – čovik. Tresal se j’ pust, osvanulo j’ – niš!