Pasanu šetemanu san ga imela z makinami. Koda su se si stroji ovoga svita urotili protiv mane, moje i prirodne i umjetne inteligencije, a i logiki, ako ćemo pravo. To ča saki dan prosin i molin svoga Blentona Petoga, a more bit i Šestoga, najme svoj kompjuter da ča brže digne program da moren počet delat, to j’ već ne »pod normalno« leh sakodnevni ritual.

To van počne tako da se najprvo ja budin i budin, a onput se on budi i budi, pa kada mi konačno zaželi dobrodošlicu, a ja njemu opsujen si čipi, programi i dodatki na programi, još mu spomenen i roditelji tj. tvornicu ka ga j’ načinila, onput počne štekat, delat ča će on, a ne ča bin ja i tek pokla jedno pol ure ulovimo ritam i z više-manje stanki dojdemo do kraja radnoga dana. Ma, uza se ča san tu navrezla, ne bin ja svoga Blentonića menjala ni za kakovoga novoga.

Nekako si dojdemo kod stari, njurgavi prijateli ki jedan drugomu stalno neš zameraju i premeraju, a jedan bez drugoga ne moru. Dakle, ni mi Blenton bil problem, baren ne problem z ken ne moren zić na kraj.

Problem mi je bila rampa va jednomu trgovačkomu centru. Ovako van je to šlo – finin delo, gren va butigu, kod i saku večer ako dospenen do kraja radnoga vrimena od butig. Peljen se do iste i brontulan na ti ljudi ki se stalno popeljivaju po ceste i vječito j’ gnjeta. Dojden na, me par semafor ki va celomu gradu ima najduže črljeno svitlo i baš kad san pomislela kako ću dospet pasat aš spred mane je leh jedan auto, ta isti »ispred auto« ne krene na vrime aš dotična šoferica nabada po mobitelu namesto da prati svitla na semaforu i ona pasa, a ja – drek. Stani i stoj sopeta celu vječnost doklen se ne važga zeleno.

Morete mislet ča san joj sega zdelila. I konačno, i komać se dopeljen do te butigi, zamen biljetin, spravin ga va žep aš se isti mora i poništit, i poprtin se va butigu.

Čitan ča mi j’ od domi poslalo da moran kupit, spravljan to va nekakovu košaricu i čekan, i čekan na blagajne aš z principa nikada ne gren na one automatske leh na one ke imaju živu žensku ale muškoga. Poćakulan z gospun na kase, gren još kupit tri pečena krilca od kokoše, a usput da van rečen – valjda jih jedino ja jin aš jedino njih vavek je, se drugo pokupuju i ako ovako nastavin neću morat na delo z autom – poletet ću, i kad san se to odbavila gren poništit on biljetin od parkiranja.

Načinin to, seden va auto, dojden do rampi i ča? Niš! Prokljeta kurba ni se otela dignut.

Provan na on stroj valje do nje sopeta poništit biljetin i neće ni tako. Stišćen on putac ki onemi nutre signalizira da neš vane ni va redu, ma od nutre ni bu ni mu. Ma zato mane oni zada, a kolona j’ bila do dna garaži daju se po spisku. Čujen kako zijaju – kokošo, moraš poništiti karticu. Mislin si, jin krilca, ma još kokoša nisan i provan njin objasnit da san ju poništila, ma ni nikakove koristi. Oni trube, kljanu, ja san i tuka, i krava, i glupača i se, a mane kuha li ga kuha. Me par da mi j’ tlak bil na milijun. Nekako jih vrnen tuliko da moren parkirat na vanjsko parkiralište i da gren videt kade j’ problem.

Gljedan, si prohajaju, jedino ja nisan mogla i fakat ispada da su ljudi imeli pravo i da san ja zbilja se to ča su rekli. Onako jadna marširam do info pulta i još vavek sasvim pristojno govorin kako ne moren vanka aš se rampa neće da digne.

Ljubazna gospa me pita – a, jeste li poništili parkirnu karticu. Mane kuha na najjače i odgovaram – naravno. Onput ja pitam nju – a, jeste li vi čuli signal da nešto nije u redu? Ona govori – a, kiše su, zna se dogoditi da zablokiraju.

Ma zamislite, v Rike da je daž? Ma kako to i od kada? Uglavnon, premučin i pitan – i što ćemo sad. Ona mane pita registraciju da me more pušćat, ako kartica sopeta zašteka, a ona će pratit na monitoru, a ja se pitan – kamo je do sada gljedala?

Naravno da znan samo slova aš broji nikada ne moren zapametit, ma se sedno nekako dogovorimo i ja konačno seden va auto i – isto. Si prohajaju jedino ja ne. Sopeta provan poništit tu prokljetu kartu ma rampa se ne diže, ljudi me suju, i konačno gospa diže rampu i ja san oslobođena.

Ona brižna krilca su led ledeni, znači da niman ni večeru, a mane od jada i nervozi želudac prekida. I konačno dojden doma, a mat namesto dobar večer, kako si pita – kade si ti do sad.

Odgovorila san njoj – va Lopače. Ča j’ pokla bilo bolje da ne znate.