Južina je. Škriplju kosti, a duša i telo koda su se još za Drugoga rata pokarali. Telo bi se neš, a niš, a duša bi niš, a stalno joj neš dohaja. Nikada balansa. Ne bi me ni najbolji livel poravnal. I sa tako raskinjena dojden na delo i onput krenu pozivi, aš lahko da j’ leh mane južina – južina je i sen mojen prijatelon i neprijatelon, i onemi ki me znaju, i onemi ki me ne poznaju ali ekola, jušto bi mi rad neš rekli. A južina j’ i kolegon pa se natežu jedan z drugen, povedaju leh da povedaju i mati moja mila, šviketaju li ga šviketaju. A vane daž daži, a da miš prdi ale ne, e, to ne znan.

Ono ča znan je da mi j’ koncentracija na najdonjoj točke Marijanske brazdi, a voljni moment još jedan sled nazdolu. Ma, kako bi moja roditeljica rekla – ča se mora, ni teško, tako i ja kljucan po ovoj tastature i smiron mislin ću se popačat va toga sakramenskoga Turudića ale ću se pravit da cele te štorije ni. Šegav čovik ne bi ni došal va takovu dilemu, a bedasti vavek riva prsti va struju. Tako da lipote moje, ova vaša radost komać čeka da gre va Zagreb i da se litrata spred Mimari kraj oneh sakramenskeh grafiti ki su kod ponikvarsko jezero zvano »Sad ga je, sad ga ni«. To van znači da dočin ih neki nariše, dojdu oni ki ih zbrišu i tako va krug.

A kad čovik malo bolje promisli, ti či taru to narisano su zaspraven mone aš bi lipota i radost mogli postat brend. Znate kakovi smo, pol Hrvacke bi se zajedno uputilo va Zagreb na jedno litratanje, a kad bi strani turisti videli da Mujo konja kuje, bi bili kod žaba z one bajke pa bi se i oni. Pa se još najde jedan šegav turistički djelatnik i zmisli štoriju o ljubavi ka ni naišla na odobravanje okoline, evo ti urbane štorije od Romea i Julije. I valje da se ogradin – napisala san da djelatnik zmisli štoriju, a ne da j’ tomu tako i bilo aš me opće ne zanima zač je ona bila njemu Lipota, a on njoj Radost. To su njihove stvari va ke se zbilja ne želin i neću pačat. Samo ću ponovit onu od pokojnoga kolege Beloga – vadi nos z tuje intimi. Moj ni ni va čijoj, majke mi. To ča j’ ta trakavica okol Lipote i Radosti razveselila celu naciju i ča po društveneh mrežah se pršti od vici, šali, doskočic, e pa mora i narod malo guštat. Ne more leh precjednik.

Tuliko od nacionalne politiki. Sad gremo na lokalnu, a nju zadnjeh par šetemani na svojeh plećeh drže maškaroni. Tr i sami znate da su legalno zibrane vođe i njihovi timi komać doškali da dojde to, kako se po modernu reče – peto godišnje doba pa da moru se četire vajer. Tako da gradon na Rečine presjedava Meštar Sandi i njegova Sara, va Opatije Dule, a va semi drugemi općinami i gradi neki drugi maškarani ljudi. Baš malo povedan, da ni teh maškar mi ne bi imeli š čen napunit novinu. Jedini ki delaju su oni.

A skoro da bi bilo bolje da tako i ostane, ma znan i za onu – daj čoviku vlast pa ćeš videt kakov je. Škerac na stran, ono ča mane pojida, a vezano j’ za maškari je vrime, odnosno nevrime ko nan prognostičari prognoziraju za danas i jutra. Srce Isusovo, ča ni ta Svevišnji munje i gromi mogal poslat z malen odmakon? Bit će da gore vlast ni prešla maškaron va ruki. Intanto, danas je smotra zvončari pul Matulj, a prognoze govore da će potop. Joh je sen onen ča na glave imeju rožice, a o Žejancimi i Munci da ni ne govorin. Njihove trakice nisu za to grdilo ko nan najavljuju. Badava njin zvona, protiv više sile se ne more.

I za nedelju, za povorku govore da će z neba sekiri padat. To me manje pojida od promene trasi aš smiron mislin da to ni bila dobra ideja i da će tamo kolonu začepit prva veća alegorijska kola ka zaviju va ulicu Dolac. Nadan se da iman krivo, ma… Uglavnon, pamet va glavu, a glavu ne doma pušćat pa će bit se u redu. I da mi je znat su ti sakramenski radovi morali počet prvo karnevala ale j’ bilo da leva ne zna ča njoj dela desna i obrnuto. I za kraj leh da van povejen da san bila na komisije za pjesmi od MIK-a. Kako i sako leto i ovo san se dobro zabavila. Vagun teh pjesam je došlo, neke bolje, neke huje, neke fenomenalne, a kako ja vavek po pjesmami ke dojdu na natječaj znan kakovo j’ stanje nacije onput van moran reć da j’ nacija va 2024. leto ušla va molu. Dur će morda doć ako zduramo sa ova s….. ča saki dan gutamo.