Leh da se zna – jadna san kod pas. Na ča? Na novi kviz od TV Nove ki se zove Joker i va komu je ki’vo večer jedan natjecatelj dobil pitanje ki je od svjetski poznateh nogometaši ima hrvacki geni. Ne domišljan se već ki je uz Maradonu bil ponujen ma znan da san još prvo leh je Frano Rijan dofinil pitanje zazijala – Maradona.

Moran reć i da ja kvizi gljedan va onomu terminu ki se more vrnut pa j’ to obično okol ure, dve zapolnoćun pa nikakovo čudo ča j’ Zmaj z kamare zazijal – telice, ne zijaj celo naselje ćeš zbudit. A to ča ona zija, e to su milozvučni glasi aš ona nikada ne zija, ona leh tako govori.

Intanto, i ta čovičić ča j’ bil na kvizu je znal da j’ Maradona naš, a onput se javila ona gospa Katarina, Kate, katica ale neš slično ka mi je se do ta put bila jako simpatična, mislin po glasu aš nju se ne vidi, leh ju se čuje i kod i saki put dala pojašnjenja odgovora. Njeje pojašnjenje je mane skoro kolpalo aš je mrtva hladna rekla da j’ Diego Maradona još i Karijolić i da je porijeklom z Korčule.

Da ti pas mater kurbu prasicu i pol. Saki lokalpatriotski gen ki va mene postoji, a fanj jih je, istoga je časa zavriskal. Srića od Boga ča va ruke nisan imela niš aš bin to bez mislit zakramala va televiziju. Pa kako more tako ča reć, pa već i orepci po celomu svitu švikutaju da j’ Maradona z Praputnjaka, a ona šćeto neto da j’ z Korčule. E, moja Katarina, Katice, Kate, morala bi se radi ove trubastoći ispričat najprvo velečasnomu Šporčiću ki j’ našal skuda su Maradonini koreni, onput sen Karijolićen kade god da bili, onput celomu Praputnjaku, a na kraju i mane ka san tuliko puti napisala da j’ Maradona z Praputnjaka i celu tu štoriju, da me j’ na pol noći zbudit bin zrecitirala.

A štorija gre ovako – va knjige rojenih župe Praputnjak piše da je Mattheus Kariolić, sin Gašpara, rojen 19. devetoga 1847. leta na Praputnjaku, da su mu krsni kumi bili Toma Padavić Tomin i Katarina udova Padavić Tomina, da j’ bil prvo dite Katarine Polić i Gašpara Kariolića koji su se zeli 18. febrara 1846. leta i da j’ na kraju kraji jušto taj Mate, Matej ale Mattheus pranonić od Diega Maradoni. Znan još i to da j’ Mattheus 28. šestoga 1852. leta dobil sestru Petru i da mu j’ otac Gašpar umrl mlad – imel je 31 leto i to na 14. devetoga 1856. leta, a mićera Petra sedan meseci prvo pa su Mate, Matej, Mattheus i mat mu Katarina ustali sami samcati. Ono ča ne znan je to je mu mat šla š njen va Južnu Meriku ale se j’ preženila, a to ne znan aš z Gašparovun smrti nestaje bilo kakov zapis o toj familje va knjige rojenih župi Praputnjak.

I tako, gospa Katarina, Katica, Kate ale slično, to van je štorija od Diega Maradoni i hrvackih koreni ki nisu znikli na Korčule leh na Praputnjaku, malomu pitoresknomu mestu ponad bakarske vali i Takal, kamenoga spomenika težaku ki j’ va registru zaštićeneh kulturneh spomeniki Republike Hrvacke. pa se, uza se one nabrojane sad još ispričajte i pretkimi, i kumimi i semi kod ča j’ to lipo načinil i Narcio Binayan Carmone, argentinski istraživač rodoslovlja, geneolog i novinar ki j’ va svojoj Studije Croatice kad je istražival dolazak prveh Hrvati va Argentinu Maradonine koreni namesto na Praputnjak smestil na Korčulu. Zbilja se j’ čovik ispričal, a ekola isprika očito ni bila dosti aš je ta naša Katarina, Katica, Kate ale slično ov nebulozni podatak morala negdere pročitat, ni ga z palca na levoj noge zisisala. Šteta ča ni šla malo dalje čitat pa mi morda i došla do prave istine, ma eto – ni, pa j’ mane, a verujen i seh oneh ki su gljedali ta sakramenski kviz jako razjadila.

Domišljan se koda j’ čera bilo kada smo današnji v.d. Novoga lista Ivica Tomić i ja šli na Praputnjak pu velečasnoga Ivana Šporčića ki j’ imel velo otkriće o Maradone. Kašnje san još puno puti pisala o semu tomu, povedala z vagun ljudi. Ono ča do dandanaska nisan uspjela otkrit je kuliko ima istine va onoj štorije da j’ Maradona, kada j’ bil na onomu humanitarnomu nogometnomu turniru va Novomu koga j’ organiziral Šuker, bil na Praputnjaku pu velečasnoga Šporčića. Ono ča bin volela još znat je ča j’ bilo z ten Matom, Matejen, Mattheuson, odnosno kako j’ kod rudar utaknul Trinidad, jako dobro stojeću plemkinju i oženit se š njun. Ne znan kako ma je i lipo su imeli hćer Salvadoru, ka j’ pak imela hćer Dalmu, a Dalma j’ imela sina Diega Armanda Maradonu.