Da ne pozabin pa ću najprvo čestitat Dan žen semi ženami, i semi onemi ki se tako ćute. A, ča, va današnje vrime mora čovik pazit i ča, i komu, pa eto čestitke sen ki će bit kuntenti š njimin. Ča se mane i Dana žen tiče, imamo korektan odnos. Mada j’ mane saki dan dan žen, kad dojde ta službeni najprvo ga čestitan matere, a onput i sen drugen. Zač mater, pa zato aš san ja ona stara generacija ka j’ imela dva va jedan, odnosno na Dan žen ale kako bi se to prvo reklo – 8. mart, slavili smo i Majčin dan. A slavili smo ga tako da smo va škole delali čestitki, pupići i ča ti ga ja znan ča se ne i na ta dan regalali materan, nonan, tetan, susedan i komu smo dospeli. Učiteljice bi isto vavek neš kupili, aš red je red i to j’ bilo to. Kada san bila malo stareja, recimo va srednjoj škole ale već i na fakultetu, prvi put san dokončala da j’ ta Dan žen zaspraven već Dan muškeh leh je dan od oneh na keh glasi. Razlog je bil jako jednostavan – na ta dan bi se već razveseleli muški leh bi se ženskice. Pogotovo va temi silnemi poduzećimi keh je va onu dobu bilo vagun.

Recimo, domišljan se kako je moj pokojni sused hodil od fešti do fešti va Tretemu maju aš je saki pogon imel svoju. Užal bi reć – da pijen, već bin prvo deset jutro bil hantav. A brat bi mu odgovorel – ja ne znan zač je se va životu vavek poznopak, ti ne piješ, a greš na fešti, a ja pijen, a niman ni jednu žensku va tišjarije. I tako bismo se si skupa lipo nasmeli. Moj pokojni otac nikada ni pozabil na Dan žen matere, tete, mane i sen susedami neš donest. Od kada ni oca ni ni regali aš, ča da van rečen – tr znate i sami kakova san, sad se domislin, a za čas pozabin. Tako mi j’ danaska na porte, simpatična Kristina dala garoful, a ja ju pitan – ča j’ sad pak ovo? Sirota ona leh me je pogljedala i govori – sretan van Dan žena. Malo mi j’ bilo neugodno, ma ne tuliko da ne odgovorin – a, mala, kad dojdeš va moja leta jušto će ti bit sedno si žensko ale muško.

O porukah na semi društvenemi mrežami da ni ne govorin. Ča god opreš rožice skaču vanka. Moran priznat da san se okol nekeh i nasmela. Ma najveć san se nasmela okol vica ki mi j’ na zadanu temu na telefon pošapljala Vlasta Sušanj Kapićeva. Njoj da ga je povedala, ki drugo ako ne Trsaščica. Kako gre vic? E, pravo povedanja ima leh Kapićeva pa ću ja mučat, ma da j’ dobar, dobar je i opće ne sumnjan da će ga napisat va svojoj idućoj »Štorije od trdoga zajika«. Mada bi njoj se ta kolumna komotno mogla zvat i »Štorija od prostoga zajika«. Intanto, dobro je dokle se nasmejemo.

A da san se ki’vo dan celi dan smela i da me je pokla puno, puno vrimena trbuh bolel od smeha – je. Najme, došal je z bolovanja moj kolega Bobo, onisti ki j’, pred mesec dan po noće šal tamo kamo i car gre hodeć, pa j’ z prston otel opret zaprta vrata i šundral prst, precizneje – kažiprst, i skuca, da ga ta prst još boli da da mu j’ najhuje ča mu j’ to na desnoj ruke pa da ne more niš z mišon delat. Bar ne dugo. E, tu me j’ već počel smeh lovit, ma san se nekako suzdržala aš kako ćeš se smet bolnomu čoviku. Kako sedi naspram mane, gljedan ga ja – prst vajer i nabada po tastature, sako malo zajoče i sako malo prehićeva toga brižnoga miša z leve na desnu bandu i obrnuto. Kad mi se j’ već počelo vrtet od toga prehićevanja, na vas glas san zazijala – Bobo, umiri se, pušćaj toga sirotoga miša na miru aš mi se već vrti od toga tvoga prčkanja sad na levo, sad na desno. Kod za vranića, mir je bil va celoj redakcije, pa su si jasno i glasno čuli ono ča j’ bilo namenjeno leh Bobotu i njegovomu mišu. I dakako, za čas je cela redakcija praskala od smeha. Srićon, Bobo se ni ofendil leh je nastavil z delon. Mislin prehićevanjen, a sako malo bi ga neki pital – Bobo, na koj ti je strane miš. Vranić zel i istoznačnice.

Ma, lahko za Bobotovoga miša, to smo znali z prve ruki je na levice ale desnice, ma ki će z ken na ovi izbori, ki će bit levo, a ki desno, ki će se prehitit, a ki odhitit, e, to ćemo znat kad dojde vrime za to. Ako i onput. Intanto, ta dan se va redakcije prehićevalo z leva na desno i z desna na levo, jedni miša, a jedni političari, pa sad vi dokončajte komu j’ bilo bolje. Komu ako ne Bobotovomu mišu.