Vazmeni su dani. Rabi jaja popiturat, pincu zamesit, šunkicu skuhat, janjčića speć… A mane baš briga za se to. Najraje bin šla spat i vas ta šušur prespala. Ma odvavek su želje jedno, a mogućnosti drugo, pa j’ moja vazmena muka počela još četrtak večer kad san šla va butigu leh po jednu stvar, kupila tri i na blagajne čekale ravneh dvajsetak minuti na kase. To j’ ona ista butiga va koj me ne vole rampi od parkiranja i sad će saki normalan čovik dokončat da san mazohist aš pokla obračuna z rampami, niki normalan već ne bi šal tamo. Ma, mane j’ na ruku i ja i dalje najvolin poć jušto va tu butigu. Kako san došla jedno uru vrimena prvo zapiranja ni bila gnjeta, baren se mane to tako učinilo aš teh košaric na potezanje ionako nikada ni tamo kade ih rabi bit leh ih išćeš okol kas, pa ti to ne more bit neki sinjal o broju ljudi ki je nutre, ma nikada ni se onako kako se na prvu čini, pa ni bilo ni ov put. Bilo j’ huje leh ča je na tri ale četire ure kad va raskopanomu srcu Riki voziš. Kreni, stani, makni se, poštuj prvenstvo prolaza i budi strpljen pa ćeš bit i spašen. Hitin va komać najdenu košaricu ta sakramenski jar koga moja mater troši va tulikoj mere koda, va najmanju ruku, pere pošadu od celoga Kastva, kupin i nekakov sok i matere kremšniti od Radnika aš da su te najbolje, pa makni se levo, projdi z bandi, zakoči, požuri se, nekako dojden do blagajni, a tamo – huje leh je va vrime sezoni na granicah.
Mislin si – gren na onu automatsku kasu ma kuliko ju ne volin aš kad čujen on glas ki reži »nepoznat predmet na prostoru za odlaganje« ale tako nekako, srhi me pasaju aš mislin da san finila na Golomu otoku, pardon na sv. Grguru aš je on bil za ženske. Sedno se uputin i ča – red do beskraja. Malo pogljedan i vidin da j’ na jednoj kase moguće proć za kakoveh deset minuti aš su leh dve ženskice spred mene – prva ima krcata kolica, ma leh jedna, a druga drži va rukah to ča j’ zibrala. Pospravin se va tu kolonu, zad mene ih se za čas naslaže još tri z kolicimi tuliko punemi da stvari padaju vanka. Sako malo me ta kolica bubnu va škinu, mučin i čekan. I taman ona prva gospa fini i plaća kad zad sebe čujen – molim malo mjesta. Obrnen se, a nekakov ogromni čovik z ogromnen tereton va kolicimi proveva pasat spred mane i taman da ću opret usta i zivuć zajik od kački čujen – di si do sad. Pas ti mater, pa ona gospa z par stvari va rukah je bila leh prethodnica. I ča ću, stojin, mučin, tako, rekla san van već, dvajsetak minuti brojin i samoj sebe, i matere, i blagdanon, i potrošačkomu društvu i ki zna komu se još. Lahko ča j’ to duralo i duralo leh kad je konačno se bilo sopate va kolicah kreće plaćanje. Gospa vadi nekakovi boni, pa nekakovi popusti, pa išće cigareti po ke blagajnica mora poć, kuliko je ni bilo – me par va tvornicu… Onput je gospodin pozabil pin, pa j’ gospa brontulala, on se vas potil i komać su to odbavili pa san došla na red. Kod furija san zletela z butigi i samoj sebe obećala da ću drugi put bit šegaveja, ča će reć da me butiga va vrime bilo keh blagdani neće videt ni va snu.
I onput dojden doma, jadna kod pas, lačna kod dva pasa i povedan matere za tu gnjetu i se to, a ona govori da neka mi je kad se pušćan za zadnji čas. A ča san to sirota pušćala za zadnji čas? Njeji jar? Ni mi bilo do karanja pa san premučala, pojila nekakovi njoki z gulašon i pripravila se za blejanje va Dnevnik. A na Dnevniku, vrime od veleh obećanji da ne rečen laži. Naslišan se to i mislin si – ma, kuliko bogatu maštu mora neki imet da zamisli kako će zbilja plaće krešit za tuliko, ljudi z dopunsken osiguranjen moć poć privatnomu dohtoru, BDP tuliko krešit, mladi bez većeh problemi kupit stan, migranti nać novu rutu za Zapad i ne moren se već domislet ča san se još čula. A pokla seh teh sanjarij gljedan Provjereno i vidin čovika ki već od deset let čeka pošteno zarajenu penziju aš su mu zgubili papiri. Čovik je od 66 let šal va punu penziju, a još ni dobil ni lipe, ni centa. Da mu ni sina, jadna mu palenta. Ima 82 leta i ki zna ako će ju ikada i dobit. Pokle toga dve sirote ke bivaju va barakah od Vijadukta.
On je imel moždani udar, ona ima cistu na mozgu pa ne more niš osin ležat, penzija njin je 350 euri. Va barake ni vodi, ni struji, nimaju nigdere nikoga, socijalna služba niš. Jedino ki ih uredno posjećuje su pantigane i tati. A ča njin još moru ukrast? Život? Avah je mane. Srićan van Vazam i izbori.
S KAMIKA I MORA
Vrime od obećanji
Slavica Mrkić Modrić
30. ožujak 2024 10:02
Vazmeni su dani. Rabi jaja popiturat, pincu zamesit, šunkicu skuhat, janjčića speć… A mane baš briga za se to. Najraje bin šla spat i vas ta šušur prespala. Ma odvavek su želje jedno, a mogućnosti drugo, pa j’ moja vazmena muka počela još četrtak večer kad san šla va butigu leh po jednu stvar, kupila tri i na blagajne čekale ravneh dvajsetak minuti na kase. To j’ ona ista butiga va koj me ne vole rampi od parkiranja i sad će saki normalan čovik dokončat da san mazohist aš pokla obračuna z rampami, niki normalan već ne bi šal tamo. Ma, mane j’ na ruku i ja i dalje najvolin poć jušto va tu butigu. Kako san došla jedno uru vrimena prvo zapiranja ni bila gnjeta, baren se mane to tako učinilo aš teh košaric na potezanje ionako nikada ni tamo kade ih rabi bit leh ih išćeš okol kas, pa ti to ne more bit neki sinjal o broju ljudi ki je nutre, ma nikada ni se onako kako se na prvu čini, pa ni bilo ni ov put. Bilo j’ huje leh ča je na tri ale četire ure kad va raskopanomu srcu Riki voziš. Kreni, stani, makni se, poštuj prvenstvo prolaza i budi strpljen pa ćeš bit i spašen. Hitin va komać najdenu košaricu ta sakramenski jar koga moja mater troši va tulikoj mere koda, va najmanju ruku, pere pošadu od celoga Kastva, kupin i nekakov sok i matere kremšniti od Radnika aš da su te najbolje, pa makni se levo, projdi z bandi, zakoči, požuri se, nekako dojden do blagajni, a tamo – huje leh je va vrime sezoni na granicah.
Mislin si – gren na onu automatsku kasu ma kuliko ju ne volin aš kad čujen on glas ki reži »nepoznat predmet na prostoru za odlaganje« ale tako nekako, srhi me pasaju aš mislin da san finila na Golomu otoku, pardon na sv. Grguru aš je on bil za ženske. Sedno se uputin i ča – red do beskraja. Malo pogljedan i vidin da j’ na jednoj kase moguće proć za kakoveh deset minuti aš su leh dve ženskice spred mene – prva ima krcata kolica, ma leh jedna, a druga drži va rukah to ča j’ zibrala. Pospravin se va tu kolonu, zad mene ih se za čas naslaže još tri z kolicimi tuliko punemi da stvari padaju vanka. Sako malo me ta kolica bubnu va škinu, mučin i čekan. I taman ona prva gospa fini i plaća kad zad sebe čujen – molim malo mjesta. Obrnen se, a nekakov ogromni čovik z ogromnen tereton va kolicimi proveva pasat spred mane i taman da ću opret usta i zivuć zajik od kački čujen – di si do sad. Pas ti mater, pa ona gospa z par stvari va rukah je bila leh prethodnica. I ča ću, stojin, mučin, tako, rekla san van već, dvajsetak minuti brojin i samoj sebe, i matere, i blagdanon, i potrošačkomu društvu i ki zna komu se još. Lahko ča j’ to duralo i duralo leh kad je konačno se bilo sopate va kolicah kreće plaćanje. Gospa vadi nekakovi boni, pa nekakovi popusti, pa išće cigareti po ke blagajnica mora poć, kuliko je ni bilo – me par va tvornicu… Onput je gospodin pozabil pin, pa j’ gospa brontulala, on se vas potil i komać su to odbavili pa san došla na red. Kod furija san zletela z butigi i samoj sebe obećala da ću drugi put bit šegaveja, ča će reć da me butiga va vrime bilo keh blagdani neće videt ni va snu.
I onput dojden doma, jadna kod pas, lačna kod dva pasa i povedan matere za tu gnjetu i se to, a ona govori da neka mi je kad se pušćan za zadnji čas. A ča san to sirota pušćala za zadnji čas? Njeji jar? Ni mi bilo do karanja pa san premučala, pojila nekakovi njoki z gulašon i pripravila se za blejanje va Dnevnik. A na Dnevniku, vrime od veleh obećanji da ne rečen laži. Naslišan se to i mislin si – ma, kuliko bogatu maštu mora neki imet da zamisli kako će zbilja plaće krešit za tuliko, ljudi z dopunsken osiguranjen moć poć privatnomu dohtoru, BDP tuliko krešit, mladi bez većeh problemi kupit stan, migranti nać novu rutu za Zapad i ne moren se već domislet ča san se još čula. A pokla seh teh sanjarij gljedan Provjereno i vidin čovika ki već od deset let čeka pošteno zarajenu penziju aš su mu zgubili papiri. Čovik je od 66 let šal va punu penziju, a još ni dobil ni lipe, ni centa. Da mu ni sina, jadna mu palenta. Ima 82 leta i ki zna ako će ju ikada i dobit. Pokle toga dve sirote ke bivaju va barakah od Vijadukta.
On je imel moždani udar, ona ima cistu na mozgu pa ne more niš osin ležat, penzija njin je 350 euri. Va barake ni vodi, ni struji, nimaju nigdere nikoga, socijalna služba niš. Jedino ki ih uredno posjećuje su pantigane i tati. A ča njin još moru ukrast? Život? Avah je mane. Srićan van Vazam i izbori.