Pust je pasal, neki su zneli masku, a neki ju nikada ne znimlju, ni dok spe. Štajon od maškar jako j’ kratko dural, ma da je i dugo, maškaran bi vavek bilo premalo. Zato ovakovi kod ča san ja najbolje prohajaju. Mane su maškari saki dan va letu i tako od kada san se rodila. Ma, za ovakove kod ča san ja ni straha aš mane ne rabi puno za samu sebe nasmet, a drugi razjadit, a da bi me mnogi voleli videt kako gren va dim aš san njin, niman pojma zač, jušto ja kriva za se, to j’ istina. Evo njin rogi, već san van rekla da ovakovi ne gore.

A kada smo već pu gorila čujen da j’ se već oneh ki se odluče pokla ča umru, mislin ne odluče se mrtvi leh doklen su još živi i pri zdravoj pamete, namesto na klasičan pokop – va kaselu pa va majčicu zemlju ale va zid, na kremiranje, ča će reć va urnu pa va zid ale majčicu zemlju. Mnogi i ne odluče leh to za nje načine bližnji ili dalji, odnosno oni ki su ustali. A zač sad najedanput ta promena običaja. A zač bi bilo drugo ako ne radi soldi. To sakramensko kremiranje da j’ fanj jeftineje leh ča j’ klasika, pa ti sad vidi. Jadna nan palenta kad se i mrtvi moramo protezat kuliko nan je lancun dug.

A sada dosti o smrti, proliće gre, a to j’ doba kada se se raja. V Rike se j’ rodilo novo rodilište, odnosno nova bolnica va koj će sad bivat i Dečja bolnica Kantrida i Klinika za ginekologiju i porodništvo KBC-a ka j’ bila na rečkomu lokalitetu. Oni ki su bili i videli, a tu mislin na predstavnike vlasti, novinari i gosti ki su bili va obilasku i na, homo to tako nazvat – pretpremijere opiranja, govore da j’ to se skupa jako lipo, a ako j’ verovat slikan i je. A ono ča mnoge od nas z one bande Rečine jako veseli je ča će se deca sopeta rajat na Sušaku. Ma još ne, aš još vavek nova bolnica ne dela, pa lipo molin se one ki su misleli da j’ već va funkcije ne hote na Sušak aš ćete rodit pred vratimi. Ako ne morete ditetu reć da malo počeka, onput va rečko rodilište da ne bi bilo – nisan znala pa se bebica rodila negdere na pol puta. Škerac na stran, još malo pacijenci i se će doć na svoje. Do izbori ni dugo, a si znamo da su oni merilo završetki seh uspješneh projekti.

Se ćemo mi ma nikako da popravimo ta natalitet. Tu nan ne moru pomoć ni soldi z EU fondi, ni bilo ča sličnoga. Gradimo na se strani, delamo, mučimo se, a ljudi prohajaju trbuhon za kruhon pa nan se deca namesto va Hrvackoj rajaju po belomu svitu. Neki drugi ljudi kruh išću pu nas pa se njihova deca rajaju pu nas i tako – svit je lopta šarena. Mane ni sled ne pače ti ljudići ča dohajaju, pači mi to ča naši ljudi prohajaju i ča su nan sa sela po plodnoj i rodnoj Slavonije pusta, a zemlja neobrajena. Daj čoviku delo i plati mu to delo, i neće bit potrebe da gre bolji život iskat vanka ove prelipe zemlji.

A ča mi delamo, mi zmišljevamo bedastoći kod ča je sopeta uvođenje vojnoga roka. Po sistemu takova j’ i takova situacija, neprijatel nas ne sme iznenadit, a najčešće se dogaja da nas iznenadi prijatel, i se tako. A ljudi moji, ča čovik va tri meseca more navadit? Ne da san ja neki vojni stručnjak, ma mislin da iman zrno logike va glavine. Recimo, kade će ti novi ročnici ta tri meseca spat? Se smo kasarni, kazermi ale vojarni, kako ćete, ale dali na prenamenu ale su se ruvinale. Ki će jih hranit? Kuliko koštaju postelji pa bile one i one trde za soldati, kuliko šugamani, lancuni, deki, uniformi, postoli, čižmi, šetokalci, higijenski pribor i slično. Imamo li mi dosti učenoga kadra ki bi mogal držat obuku novemi? Na čemu će se vježbat ti ročnici, na luku i strele?

Ma, okol česa se ja pojidan, baš da san ćampasta. Najme, ćampasta tuliko da se pojidan i za Sabor. I smiron si mislin će njin va tomu Hrvackomu vojnomu učilištu, kamo će se preselit na dve-tri leta doklen njin ne poprave zgradu ruvinanu od potresa, bit se kako rabi. Će morat jist isto ča i oni ki se tamo vade ale će preselit i saborski restoran, je njin to na ruku ale njin je dugo i slične nemotarije mi se po glave motaju. Evo, recimo, sad si mislin ki će čuvat ti školani ako njin i mat i otac delaju, a nono i nona nisu va mogućnoste aš – deca su sopeta na ferijah. Srce Isusovo, pa ta današnja dečina su već doma leh su va škole! Zaspraven će nan jako brzo rabit ta sakramenska falša inteligencija.