Daži. Dugo ni. Južina nemi i rashićeva i dušu i telo. Dan jušto takov da se, da moren, sigurno ne bi celi dan zvukla z postelji. Ma ča se mora ni teško, rekli bi i lagali aš drek ni teško, teško j’ kod črna kuga, ma ni druge leh poć. Srića od Boga ča ne delan na oprtomu, leh kako mi je lipo mat rekla kad san zihajala – rit ti je na suhomu, ča stalno cvilindrečiš, tr nisi od cukara. Ni ti ga bolje leh kada te tako otprave vanka z kući. A kada već zijdeš, onput ti je svedno. Naslišajuć kolegi ki dohajaju na delo z grada, e, onput dokončan da je, kako i vavek, Ona imela pravo i da ja zaspraven niman razloga za njurganje aš, na moju bandu ako i kopaju to j’ neš na sitno, a iman i obahajalnicu pa san, po ovoj novoj ceste prvo va Novomu listu leh da gren z Brajde. Rabi mi nepuneh sedan minuti, a ne munjesan po ceste. Bog dal zdravlje i ceste i onemi ki su ju načinili. Još sada kada se moren i za nazad ukopčat na Škurinjah, ma niki srićneji od mane.

On ki se sigurno ni rodil ni pod šegavun, a još manje pod srićnun zvezdun je onisti ča j’ švercal migranti pa se čera jutro z punen kombićen migranti zabil drito va policijski auto na Kustošije. Avah je njemu i neka mu je. Jedino mi j’ žal teh siroteh ljudići keh je peljal va bolju budućnost, a finili su tako kako su finili. Ne znan ako se domišljate od prvo par let onoga švercera z migrantimi ki j’ va navigaciju namesto Brinje zapisal Dobrinj pa j’ skupa z kombijen i migranton finil na Krku, na sred dobrinjske placi. Ne znan kade ti šverceri nahajaju, ma očito j’ da ne moru puno zibirat.

A ča će tek nacija zibrat z ovoletnje Dori, ne znan aš je ponuda takova da j’ već od njih bolje zgubit leh ča ih je nać. Mislela san da tu kumediju ja neću gljedat, ma šef od daljinskoga kod i celoga svemira je moja roditeljica pa se mane niš ne pita. Nju ne rabi niš ni pitat kad sama maši i otpeva. To ča j’ ona doklen smo gljedali prvu, kako bi se reklo – izlučnu večer od Dori zipljuskala na račun seh ki su se na toj pozornice našli, to van je radi mentalne higijeni bolje ne znat. I ča j’ najhuje, va devedeset posto stvari keh je zrekla moran njoj dat za pravo. Ma san mučala aš kad ona lamantira, to van je jednako kod kad Milanović pere po Plenkoviću, a i obrnuto. Tretega ne rabi i ni dobrodošal.

Dakle, vrnimo se na Doru. Ča ljudi misle o tomu spektaklu hrvacke televizije najbolje govore društvene mreži. Recimo, mane j’ najveć nasmel post od moga prijatela Vjeka ki j’ napisal da bi većina od oneh ki su kantali na toj prvoj večere i da su sami samcati nastupili va konačnen poretku bili drugi. Jedan drugi čovik je napisal da j’ to bila večer od falšanja, a neki da j’ već karizmi imela Severina z batićen leh si ki su se našli va konkurencije. Čuda toga su ljudići još napisali i primjetili, a nasmel me je i jedan kolega ki j’ rekal da j’ tuliko pjevači z našega kraja na Dore, da to ne znaš je Dora ale j’ MIK, a oni ki ne govore ni čakavski, ni ingleški da ni ne znaju ki festival naslišaju.

Dobro, falšarije je bilo i bit će na sakomu pjevačkomu natjecanju pa i na ovomu, seljačije isto tako, bezveznih modnih kreacij koš i još, a faljenih scenskih nastupi također. Mane j’ jako pačilo ča mi j’ ta zvuk zgljedal totalno faljen pa san imela dojam koda si oni pjevaju z nekakove bačvi ale balona, a mat je rekla – tr bolje da jih ne čuješ. I ne moran van govorit kako ja osin Leta 3 ne bin dalje pušćala nikoga osin Barbari Munjas, a ona eto, ni prošla.

Ispravljan se – pušćala bin i Marija i Ferlina, ne zato ča mi j’ njihova pjesma bila jako napeta leh zato aš jih volin, obožavan i lipo da su tulili kod tovari, a nisu, mane bi sopeta bili dobri. Pušćala bin jih i još z jednoga razloga, a ta se zove da jih iman razloga pitat ku cestu su va scenografije opirali aš kad su razvukli one črljene traki od Marija, ja san samo čekala da dojde malica z kušinićen na komu su škari i da ministar od cest prereže traki. A znan da bi mi Mario sigurno odgovoril da san seljačina z Krasice i da niman pojma o umjetnoste. Bilo kako bilo, bil nepotizam ale ne, potpišujen njihov odlazak va Švedsku. A, ča će bit dalje, će bit Dora ale Dora – noćna mora, znat ćemo nedelju večer, pa ako se domislin za šetemanu dan ćemo sopeta o zavijanju, plagiranju i ostalomu. Ako ne – koga briga.