Kako se ono reče – najprvo svoj privrat pa onput tuji. A na momu privratu ale na mojoj Krasice velo je veselje. Prva beba ka se j’ rodila va novoj rečkoj bolnice »Za ženu i dijete« je krasičarskeh koreni. Najme, po očevoj strane je stopostotni Krasičar. Prvo pa Krasičar – napisal je na fejszbuku jedan z Krasice. A kako bi ni moglo bit ako ne tako. Intanto, čestitke sen materami i bebami ke su se rodile i ke će se va toj bolnice rodit, a malomu Bartolu dug i srićan život želin. Ča se tiče same bolnice jako san kuntenta ča j’ konačno se na jednomu mestu, a oprostite si ki niste z one bandi Rečine, ma mane j’ izuzetno drago ča se deca sopeta rajaju na Sušaku. Kolegi ki su bili na preseljenju, opiranju i slično, govore da j’ to fantazija. I to mi j’ baš drago čut, a si oni ki njurgaju i namaljaju da j’ to se predizborna kampanja, neka lipo gredu mater ženit aš kampanja ele ne će proć, a bolnica će ostat. Uostalon, tr se ni delala radi kampanje leh radi ljudi. Jednostavno za reć – ne volin one ki sagdere vide urotu i zavjeru.

Ono ča me nimalo ne veseli je to ča nan je celi grad raskopan.Razumen ja da se kopat mora i da bez muki ni prosperiteta, jedino ča ne razumen je da se mora kopat po celomu gradu va isto vrime. To na ku god stran da kreneš – staneš. Ćeš prema Gromiku, ćeš prema Kostrene, prema Drage, na Škurinjah, na Kozale, na Zametu… Sad će neki reć – peljite se z buson. Ča bus ima Krila pa leti? A i tuliko često gredu da j’ to čudo. Ako misliš na devet bit v Rike, a bivaš negdere va prigradu najbolje ti j’m poć na sedan da si kuliko-tuliko siguran da ćeš dospet tamo kamo si trebel doć. Ne znan ja to z vlastitoga iskustva aš san van već rekla da se ja ne umen peljat va busu, ma naslišan one ki se z buson pelju. kad dojdu na delo, a vavek kasne, to j’ najprvo dve uri švikanja, pa dve puhanja, a onput njin je već vrime za poć doma. Je med njimi i par oneh ki su digli ruki od busa i dali delo nogami, ča će reć da, kako bivaju va gradu, na delo i z dela gredu hodeć. E, tu se treba naklonit Autotroleju aš mu je uspjelo ono ča sen institucijami zdravlja, ekologije i slično sa ova leta ni. Silne kampanji, silni soldi, a mi nikako da se pokrenemo. Autotrolej je leh z ten ča j’ proredil linije zajedno mnoge natiral hodit. I smešno mi j’ čut kako ljudi hodeć otkrivaju stvari pa i ja, lenoba ka se još vozi, čujen sakoga vranića ča ovi pješaci vide i čuju po putu. Ekola, ni sako zlo za zlo.

A sad kampanja. Avah je mane, ča novoga tu ima za reć. Sakeh četire leta se huje i huje. Namesto da se navade na lipo ponašanje, oni su se već kod nedresirano blago. To ne znaš čigova j’ zajičina veća, čigova opakeja, a najveća konkurencija je va kategorije – čigova j’ bedasteja. To su stalno nekakove presice, nekakovi mitinzi, nekakovi skupi… Si su najbolji, najšegaveji, najprosperitetniji, najbolja opcija, najveći domoljubi, najsposobneji… Naj, naj i naj! A ja konkretan program još od nikoga od njih nisan čula. Sad, ne isključujen ja mogućnost da san gluha, bedasta pa ne umen čitat zmed redi, ma dala bin ruku va vatru i da ono neš malo ča su rekli, a da nisu leh pusta obećanja je neš ča su prepisali od prveh izbori. Kuliko klate po Hrvackoj, ni ni čudo ča se ne dospenu posvetit programu. Sad smo čuli i za neke institucije, neki deli Hrvacke za ke do sada nikada nismo čuli, aš sakeh pet minuti su na drugomu mestu, a Hrvacka ni vela pa će, ako tako nastave doć i pu mane doma predstavit program, pa već sada mislin da moran mat pripravit na dolazak stranačkeh vodstvi, i dat joj bandjerice da ne maše z kuhinjskun krpun va znak oduševljenja.

Škerac na bandu, ni ni njimi lahko. Rit će ih, a i škina bolet od teh silneh putovanji, a čak njin ni ni plaćen ta odvojeni život aš je kampanja. A ča se moraju opret, majčice moja mila. I pogoni, i instituti, i cesti, i bankomati. E, kad smo pu bankomati, moran reć da san se pokarala z nekimi ki su se smeli okol opiranja bankomati. Rekla san da se ja sjećan vrimena kad su se opirali i lifti, i zahodi, a on ki ima se pred noson ne more shvatit ča onomu ki mora deset kilometri do prvoga bankomata znači imet jedan va susedstvu. Naravno, pod uvjeton da ima ispravnu karticu i neš na računu, a i da ume z 10 euri platit za popit za dvajsetak ljudi. A da ni Isusić. Intanto, stojte mi dobro. Kuraja!