Lipi moji, evo me nazada. Nisan bila na ferijah, mada mi j’ to bila namjera, leh na bolovanju. Ča mi j’ bilo? A ča? Kako bi moj pokojni otac rekal – na sirotu i zec miša diže, tako me j’ najprvo ulovilo va škine i bolelo za ponemet, pa san dobila one sakramenske blokadi od keh me je rit bolela skoro kuliko i hrbat, i kada san to kuliko-tuliko sanirala došal je kašalj i to takov kakovog ne pamtin da san ikada imela.

To ni bilo stajanja ni po danu ni po noće i vranić me zel ako j’ bilo ki od susedi, a me par i celi kvart, mogal spat od mojega kašlja. A kad bin se ja zakašljala počeli bi lajat i si pasi va naselju tako da j’ pu Rešetar bilo jako veselo. Tr i sami znate da na jedno prosječno kućanstvo danaska gre 0 dece, 2 auta i 2 kućna ljubimca, ni bitno su pasi, maški ali egzotično blago. Intanto san ja tri šetemane leh ležala, žerala i kašljala. Da j’ poduralo bin morala menjat vrata od stana i va stanu aš san se tuliko pojačala da još malo pa bin leh po boku mogla kroza njih pasevat. A da van ni ne govorin da mi ta kašalj otkril da iman i mišići za ke nisan znala. Tuliko su me boleli ovi neki znad trbuha, a spod rebar da san mislela tulit od bola. A nisan cvilindreta. Zbilja nisan. Temperaturu san imela leh jednu večer i to ne bog zna kakovu i zaspraven ja ni danas ne znan ča mi j’ bilo. Govori mi kolegica ka prati zdravstvo da san morda imela hripavac, ma san ju zajedno poslala mater ženit i rekla njoj da ni va redu tako se škercat staremi ljudimi. A onput mi je napamet palo da j’ ona morda mislela na moju starosnu dob va glave, a ako j’ tomu tako onput je se moguće aš ta hripavac da imaju najčešće deca vrtićke dobi. Ča j’ bilo da j’ bilo, glavno da j’ pasalo i ne moren van opisat kuliko san bila kuntenta kada san šla delat. Doma i oneh doma mi j’ već bila puna pipa, a mislin i njimin mane. Ćutila san se kod bolan grdelac va gajbe ki bi tako rado odletel, a ne more.

Leh, ki’vo dan, pardon – jutro, san pokle ki zna kuliko let bila ranun zorun va gradu. Znate i sami da va grad gren leh kad zbilja moran i po noće kad znan da ni nigdere nikoga. To su bile vele pripremi, skoro koda gren na Madagaskar, a ne v Riku. I kad mi j’ poć ako pu dohtora moran bit na sedan, i kade ću parkirat i kud mi je najbolje vozit da ne finin va gnjete i kade se kopa i sega vranića. Kad san načinila plan puta došlo j’ i to jutro i ja san na 6 i kvarat partila. I čudon se čudin – vane još škuro, na ceste nigdere nikoga, ni hodeć, ni vozeć, leh vagun ljudi spred policijske stanice va gradu. Parkiran va garaže kraj svoga nekadašnjega fakulteta i još vavek se čudin kade su ti ljudi. I onput se domislin i samoj sebe govorin – mona sakramenska, pa ne delaju ljudi od šest ale sedan kod nekada, većina dela od osan. Samoj sebe san se smela. Odbavila san ta dva pregleda va pol uri, platila kuliko san platila i šla na kafe. E, to j’ sad već bila druga štorija – kafići krcati, komać san mesto našla ča znači da se ja još nisan zbudila, ma grad je. I cucan ja to svoje kafe i s pol uha naslišan ča govore ljudi okolo mane. Glavna tema j’ bila, a ča drugo ako ne politika. Konkretno lupanje va Saboru i debata je to ale ni va redu. Pokle toga na red je došla crna kronika i pokolj va Merike, nesrića kraj Gospića i tema migranti. Neki su zajik očešali i okol situacije va Gaze, a ne morete verovat kuliko ljudi nimaju pojma o čemu govore. Me par da njin je bitno leh da govore. I zato san ja odlučila da ubuduće na javnimi mestimi iman leh unutarnji dijalog aš, da mane neki nasliše kod ča san ja to jutro, ki zna ča bi komentiral.

Intanto san već na devet bila nazad doma i onput najveći šok – uhajan ja va kuću, mat pije belo kafe i gljeda va me sa va čudu pa pita – kamo greš ti ovako rano? Odgovaran – ne gren, sad san došla. Još nisan ni finila, a zmaj je počel rigat oganj – nesnago da nesnago, ča priliči ženskoj va tvojeh letih va ovu dobu doma dohajat. Pa, to ni zadnje kurbi ne delaju. A, ne, ne to ovako ne more dalje. I doklen je zimala i zrak i šćap, uspjela san reć – mama si ti skrozin bambinita, od dohtora dohajan. Jutros san šla.

Obadve smo se počele smet, ma iskreno ja fanj kiselo. Zač? Zato aš ona misli da ja još vavek moren zgubit noć i doć doma na devet jutro, a ja znan da ne moren.

Ča se ostaloga tiče – pasi laju, karavane prohajaju, a daž pada li ga pada.