Moran vam povedat kako san se čera va onako depresivnomu kišnomu danu od srca nasmela
Najprvo da tete Tanje zaželin se lipo i dobro na onomu drugomu svitu, puno slov, briškulanja, trešetanja i kumpanjanja z onemi ke je gore utaknula. Nan ki smo dole ostali pušćala je fanj lipeh uspomen, rečnik krasičarske čakavice i, baren mane, puno savjeti o ovomu i onomu. Saki put kad projde neki koga san poznala od kada san se rodila iman dojam da j’ moja Krasica se manja i manja.
Ma, saki od nas Krasičari ima svoju Krasicu i svoja domišljanja tako da j’ nekomu ona se veća i veća i ja to razumen. Ono ča ne razumen, zmed ostaloga, aš ja ne razumen puno toga, je to ča na Si sveti nisan nigdere mogla kupit kruh. Zaspraven, ni problem to ča ni niš delalo leh je problem to ča san va Mlinaru mogla kupit kafe, kroasan, picu, štrudel, sengvić i ča ti ga ja znan ča još, ma kruh ne. Kruh, rekla mi j’ gospa z Mlinara, moran poć kupit na benzinsku pumpu. E, da ti pas mater kurbu prasicu i pol. Ako neš mrzin to j’ kad ni logiki. Naravno da ju nisan zela za ozbiljno i da nisan šla kruh iskat na pumpu, ma to da va nečemu ča j’ svojevrsna peknjica moreš po nedelje i prazniku kupit se osin kruha, e pa to mi nikako ne gre va glavu.
Za kaznu ča dan prvo nisan mislela, na Si sveti san jila kumpir namesto kruha. Palentu od tri minuti ne smen nosit doma, aš to j’ drek, a ne palenta – govori moja roditeljica, pa ni tu ni bilo spasa i od Boga srića da j’ bilo kumpira aš bin ostala leh na pašte, a ona mi ni napeta. Smiron mislin da su se oni ki su smišljali ta zakon o delanju butig po nedelje malo prehitili aš on ovakov kakov je zaspraven nima nikakovoga smisla. Puno pošteneje bi bilo da se donese befel da nijedna butiga va Lipoj našoj ne dela po nedelje pa komu pravo, komu krivo. Ovako se saku nedelju ćutin kod na maratonu – teci semo, teci tamo…
On ki bi sigurno, da j’ mogal, čera bil pobigal z konferencije o jačanju i proširenju Europske unije ka se j’ odražvala va Berlinu je naš ministar Gordan Grlić Radman, a čovik, ruku na srce niš ni kriv. Najmanje to ča j’ empatičan i ča j’ taktilan, a ima i ukusa. Pa, ala recite sami, da ste muško, a i da ste žensko ko voli žensko, ča vi ne biste poželeli bušnut Annalenu Baerbock? To ča se gospa njemačka ministrica vanjskeh posli ne voli buševat, to sad ni Radman mogal znat, a i ona da j’ prava gospa, otela al ne, mogla j’ ta jedan bušić potrpet, a ne se odmaknut i od normalnoga čovika načinit Bajdena. Zač Bajdena? Zato aš se on rukuje va prazno, a Radman bušuje va prazno. Intanto, Annalene ni bilo va redu ni lipo to ča j’ načinila. Kako bi tek reagirala da j’ do nje va nekadanje vrime stala Kolinda, ona se voli i grlit i bušat. Baš bin volela videt kako bi se nje rešila. Intanto, nikoga va Hrvackoj ne zanima ča j’ na toj sakramenskoj konferencije rečeno, odlučeno i slično, si leh povedaju o buševanju zraka od strane našega ministra. Kakovi su ti va Evrope još će ga prozvat za seksizam, a to ča ga već po društveneh mrežah zovu Radman Ljubić Grlić, to j’ najmanje ča ga j’ moglo tukat.
Ono ča j’ seh nas tukalo pasani dani je teška južina i daž. Puše, pada, miže, grmi i onput malo stane pa sopeta. Ča bi moja mat rekla – bole i duša i telo. A i takujin aš ljudići su tuliko potrošili za sveći i rožice da bi se to bilo potaracano va pet minuti. Ma protiv više sile ne moreš, a ne moreš ni šator na grob klast tako da okol sega toga ne rabi puno bacilat. Bilo j’ kako j’ bilo i ča j’ bolje govoret. Mane apsolutno isto aš ako taton oprostin ča mi pokradu rožice z groblja kako neću Svemiru. Već me pojida to ča j’ Kupska dolina sopeta poplavala, ča njin je daž cesti šundral i promet fermal, ča j’ poljoprivrednikon vela šteta i ča j’ južina ruvinala rivi i barki. Ma dok je šteta leh materijalna – dobro je.
I za kraj van moran povedat kako san se čera va onako depresivnomu kišnomu danu od srca nasmela. Za to je zaslužan Alen Vitasović komu j’ valjda već dosti toga da ga menjaju z jednen drugen Alenon Vitasovićen pa j’ na svomu fejzbuk profilu lipo napisal da j’ on pjevač Alen Vitasović, rođen 1968. leta, da biva va Orbanićimi i da ni, ni države ni nikomu na ovomu svitu dužan ni centa, a kamo 47 hiljad euri. To daj drugi Alen Vitasović, ki j’ to i to, rođen leto dan kašnje i biva va Pule. Za jedan medij je još dodal da on ne more ni zamislet kako zgljeda ta kup soldi, a kamo ča drugo. A, brižan moj Alenić, na te bi, ča bi moj otac rekal, i zec miša dignul.
S kamika i mora
Ni lahko zvat se Ljubić Grlić, Vitasović, Jugo…
Slavica Mrkić Modrić
04. studeni 2023 08:48
Moran vam povedat kako san se čera va onako depresivnomu kišnomu danu od srca nasmela
Najprvo da tete Tanje zaželin se lipo i dobro na onomu drugomu svitu, puno slov, briškulanja, trešetanja i kumpanjanja z onemi ke je gore utaknula. Nan ki smo dole ostali pušćala je fanj lipeh uspomen, rečnik krasičarske čakavice i, baren mane, puno savjeti o ovomu i onomu. Saki put kad projde neki koga san poznala od kada san se rodila iman dojam da j’ moja Krasica se manja i manja.
Ma, saki od nas Krasičari ima svoju Krasicu i svoja domišljanja tako da j’ nekomu ona se veća i veća i ja to razumen. Ono ča ne razumen, zmed ostaloga, aš ja ne razumen puno toga, je to ča na Si sveti nisan nigdere mogla kupit kruh. Zaspraven, ni problem to ča ni niš delalo leh je problem to ča san va Mlinaru mogla kupit kafe, kroasan, picu, štrudel, sengvić i ča ti ga ja znan ča još, ma kruh ne. Kruh, rekla mi j’ gospa z Mlinara, moran poć kupit na benzinsku pumpu. E, da ti pas mater kurbu prasicu i pol. Ako neš mrzin to j’ kad ni logiki. Naravno da ju nisan zela za ozbiljno i da nisan šla kruh iskat na pumpu, ma to da va nečemu ča j’ svojevrsna peknjica moreš po nedelje i prazniku kupit se osin kruha, e pa to mi nikako ne gre va glavu.
Za kaznu ča dan prvo nisan mislela, na Si sveti san jila kumpir namesto kruha. Palentu od tri minuti ne smen nosit doma, aš to j’ drek, a ne palenta – govori moja roditeljica, pa ni tu ni bilo spasa i od Boga srića da j’ bilo kumpira aš bin ostala leh na pašte, a ona mi ni napeta. Smiron mislin da su se oni ki su smišljali ta zakon o delanju butig po nedelje malo prehitili aš on ovakov kakov je zaspraven nima nikakovoga smisla. Puno pošteneje bi bilo da se donese befel da nijedna butiga va Lipoj našoj ne dela po nedelje pa komu pravo, komu krivo. Ovako se saku nedelju ćutin kod na maratonu – teci semo, teci tamo…
On ki bi sigurno, da j’ mogal, čera bil pobigal z konferencije o jačanju i proširenju Europske unije ka se j’ odražvala va Berlinu je naš ministar Gordan Grlić Radman, a čovik, ruku na srce niš ni kriv. Najmanje to ča j’ empatičan i ča j’ taktilan, a ima i ukusa. Pa, ala recite sami, da ste muško, a i da ste žensko ko voli žensko, ča vi ne biste poželeli bušnut Annalenu Baerbock? To ča se gospa njemačka ministrica vanjskeh posli ne voli buševat, to sad ni Radman mogal znat, a i ona da j’ prava gospa, otela al ne, mogla j’ ta jedan bušić potrpet, a ne se odmaknut i od normalnoga čovika načinit Bajdena. Zač Bajdena? Zato aš se on rukuje va prazno, a Radman bušuje va prazno. Intanto, Annalene ni bilo va redu ni lipo to ča j’ načinila. Kako bi tek reagirala da j’ do nje va nekadanje vrime stala Kolinda, ona se voli i grlit i bušat. Baš bin volela videt kako bi se nje rešila. Intanto, nikoga va Hrvackoj ne zanima ča j’ na toj sakramenskoj konferencije rečeno, odlučeno i slično, si leh povedaju o buševanju zraka od strane našega ministra. Kakovi su ti va Evrope još će ga prozvat za seksizam, a to ča ga već po društveneh mrežah zovu Radman Ljubić Grlić, to j’ najmanje ča ga j’ moglo tukat.
Ono ča j’ seh nas tukalo pasani dani je teška južina i daž. Puše, pada, miže, grmi i onput malo stane pa sopeta. Ča bi moja mat rekla – bole i duša i telo. A i takujin aš ljudići su tuliko potrošili za sveći i rožice da bi se to bilo potaracano va pet minuti. Ma protiv više sile ne moreš, a ne moreš ni šator na grob klast tako da okol sega toga ne rabi puno bacilat. Bilo j’ kako j’ bilo i ča j’ bolje govoret. Mane apsolutno isto aš ako taton oprostin ča mi pokradu rožice z groblja kako neću Svemiru. Već me pojida to ča j’ Kupska dolina sopeta poplavala, ča njin je daž cesti šundral i promet fermal, ča j’ poljoprivrednikon vela šteta i ča j’ južina ruvinala rivi i barki. Ma dok je šteta leh materijalna – dobro je.
I za kraj van moran povedat kako san se čera va onako depresivnomu kišnomu danu od srca nasmela. Za to je zaslužan Alen Vitasović komu j’ valjda već dosti toga da ga menjaju z jednen drugen Alenon Vitasovićen pa j’ na svomu fejzbuk profilu lipo napisal da j’ on pjevač Alen Vitasović, rođen 1968. leta, da biva va Orbanićimi i da ni, ni države ni nikomu na ovomu svitu dužan ni centa, a kamo 47 hiljad euri. To daj drugi Alen Vitasović, ki j’ to i to, rođen leto dan kašnje i biva va Pule. Za jedan medij je još dodal da on ne more ni zamislet kako zgljeda ta kup soldi, a kamo ča drugo. A, brižan moj Alenić, na te bi, ča bi moj otac rekal, i zec miša dignul.