Čera me j’ zvala jedna simpatična gospa. Nikada se nismo utaknule, ne znan ni kako zgljeda, ni kuliko let ima, ni ama baš niš o njoj. Kako se ja javljan na se, i na poznati i na nepoznati broji aš san kurijoža i zato ča me j’ strah da neš ne propustin, tako san se javila i njoj. I ča j’ gospa tela? Ma, zaspraven niš osin par informacij.

Recimo, nju jako zanima kako mi delamo novinu, ki ju dela, kako zgljeda pojedini novinar ale novinarka čigovi ju teksti pjažaju ale oni čigovi joj tlak dignu. Intanto je to bil jedan jako, jako interesantan pogovor. Najme, najprvo bi ona mane pitala kako zgljeda ta i ta, onput bin ja nju pitala da ča ona misli kako zgljeda, pa bi ona rekla kako zamišlja dotičnu ale dotičnoga, a ja bin se smela kod rit na nove gaći aš je od pet ale šest njih ki su je zanimali falela apsolutno se – od izgleda do let. Kad san joj rekla da ako dela za Interpol, da j’ falela zanimanje rekla je da neka ju ne zafrkavan, da ona celi život ne dela za nikoga, ma dela protiv sebe aš da preveć veruje ljuden pa da j’ baš zato otela znat kako zgljedaju ti ki pišu novine. Mane j’ pak zanimalo zač je za informatora zibrala baš mane, rekla mi je da iman dobre preporuki ma mi ni otela reć od koga pa si ja mislin ki j’ tako bedast da mane da dobre preporuki. Da j’ vrime od dvorci, dvorjani i posluge i da san ja negdere divica nikada mi niki ne bi napisal preporuku i sirota bin umrla od glada. To san njoj i rekla, a ona mi j’ odgovorila da bi mi ju ona zajedno napisala aš da san još ljubazneja leh ča su njoj povedali. O, Majko Božja od sedan žalosti i mane osme, da mi j’ znat ki j’ to mogal reć…

Intanto, san ja gospe obećala da ću poslikat celu redakciju i da ću ju klast na fejs pa da će tako znat kako zgljedaju oni ki novinu pišu, uređuju, lektoriraju, teksti kladaju na stranicu i slično. Bila j’ jako kuntenta, a ja san sada na sto čud kako ću obećanje održat, a da preživin. Moren mislet ča će mi ekipa z redakcije reć i načinit kad jih počnen litratat. Ako preživin – povedat ću van.

Cela ta štorija me je vrnula fanj let nazada. Bilo j’ to valje pokle rata. Poslali su me na reportažu va Gospić i rekli da se javin ipedeovcu Marinu Smolčiću, on da će mi bit veza za se ča mi rabi. Njega je pak zval jedan moj kolega fotoreporter ki ga j’ znal z rata i rekal mu da će va vojarnu doć jedna visoka cicata plavuša, da zgljeda kod Amazonka i neki fotoreporter šnjun pa da se pripravi aš da j’ novinarka jako zafrknuta. Ja nisan opće znala za ta pogovor i dohajan va Gospić va vojarnu, govorin na prijavnice da san z Novoga lista, da išćen gospodina Marina Smolčića i da je on upoznat s ten da ću doć. Nekakov deškić vojnik nan govori da sedemo i da počekamo dok on gre nać zapovjednika. I sedimo mi tako va toj prijavnice, čekamo i čekamo – ni zapovjednika, ni toga soldata. Pokle jedno kvarat uri opiraju se vrata i dohaja nutar najprvo vojnik, a onput i zapovjednik tj. Marin Smolčić. Stasit i naočit čovik ma skroz zbunjen. Gljedamo mi va njega, a on gleda va nas pa po prijavnice koda nekoga išće i najedanput se počne smet kod lud. Smeje se čovik, trese se od smeha i nikako fermat. Kolega i ja gljedamo va njega, pa jedan va drugoga, pa sopeta va njega i kad je jedan sled finil ta smeh, stanen se ja i govorin – mi smo novinari Novog lista, vi ste…

Nisan dospela finit rečenicu, a čovik se opet počel smet kod nem. I sopeta smo čekali da malo ferma, a moran van priznat da san već bila uvjerena da šnjin neš ni kako trebe. Onput se j’ prestal smet i govori – ja sam Marin Smolčić, vama na usluzi. Vi zaželite, ja ispunjavam. Kako j’ rekal, tako je i bilo. Se ča nan je rabilo, on je ostvaril. I tek na kraju dana nan je objasnil ono ča j’ bilo na početku – on silni smeh. A kada j’ rekal – meni najavili prsatu, visoku plavušu, a poslali – biće u pratnji nekog mulca koji izgleda kao da je ciganima s kola pao, e, onput se ja nisan mogla od smeha fermat. Intanto, bilo j’ to skoro pred trejset let, Marin je sada dopisnik Novoga lista z Liki, Marko još vavek zgljeda koda su ga z kol cigani zgubili, a ja san od prvoga susreta do dandanaska – biće. Kad god se utaknemo, domislimo se na ta prvi susret i ta škerac od Silvana Ježine ki j’ ustvari bil temelj jednomu prijateljstvu.