Znate oni dani kad se zbudite i već bi zadavili celi svit? E, pa mane j’ jušto takov. Ča j’ najhuje, se jih već i već iman, ča znači da san stara, preveć trudna i fanj nervozna ženska.
Srića san oženjena pa mi niki ne more reć da se ponašan kod stara divojka. Ne more to niki reć ni našemu presjedniku, a on je jušto kod i ja – pravi pretendent za takovu titulu. Jedino ča bi on bil stari mladić, ma karakteristike su iste. Se me jadi, si su mi štufi, bedasti, lenobe, ma grozna san i sebe i sen okolo sebe. Niš me ne veseli, se mi gre na živci pa mi kolegica govori da nisan ja stara divojka leh mrgud na granice depresije. Pitan mat da ča njoj se vidi, san ja va depresije. Odgovara mi da san vrite, a ne va depresije i da j’ ov svit šal mater ženit onoga časa kada su se počele rabit te besedi kod ča j’ depresija. Da prvo ni niki znal ča j’ to pa da su si ljudi normalno živeli. Niki da ni govoril o depresije leh da j’ neki ta dan malo huje volji, da se j’ stal na levu nogu, da mu ni dan i slično. Niki da nikad ni hodil nikakovomu psihologu, ni psihijatru i da j’ zasensega bilo jednostavneje i šegaveje življenje.
Niš nisan odgovorila aš moran se š njun složit. Ne mislin da svit trebe ustat va vrimenu kada su govorili da j’ zemlja ravna ploča, ma da j’ se ovo prebrzo, to mislin. Kod ča mislin da smo si skupa, neki već, neki manje, zgubili busolu. Sa seh stran te stišću i pritišću, ćeš politički, ćeš gospodarstveno, ćeš psihički, ćeš fizički, ma kako god glavno da ti po glavine neki skače. Dite se još ni ne rodi, a roditelji su ga već predbilježili za klavir, balet, strani jezici, tenis, zapisali va nogomet, zborsko pjevanje i već listaju brošuri za studiranje vane, aš ki j’ videl još studirat doma – to j’ znak lošega socijalnoga statusa. A socijalni status seh nas je va lipomu klincu. Imamo najveći broj milijunaši po broju stanovniki, ma i se već i već sirotinje. Šegavi su već davno rekli da neće bit dugo i da će skrozin za skroz nestat srednja klasa, da će ostat leh bogati i siroti. Kako su rekli – tako i je. Baš malo mislin ča more neki ki ima penziju manju od tri tisuće kun, biva va stanu i nima nigdere nikoga ki bi mu pomogal. Ma more si zajedno klast štrik okol vrata i finit ovozemaljske muki. Rekla san tri tisuće kun, a da ni ne govorin o onemi ki nimaju ni hiljadu.
Takovi ljudi ja zoven čarobnjaki. Bitno je da smo mi stekli si statusi za prehitit kunu va euro, a kuliko će se ljudi va tomu procesu prehitit za vjeke vjekovi, to baš jako nikoga ne pojida. Ča nismo mogli malo počekat z sen ten prehićevanjen kad nan ov rat va Ukrajine ionako sako malo poskupi življenje? Mišljenja san da smo, ma ki mane i slične mane bilo ča pita. A i zač bi kad njin ni potreba, a i ne kreću se baš med ljuden ki nimaju. More bit bi rabilo si oni ki vode ovu državu, ki donose odluki, odnosno ki su, va ostalen i za seh nas odgovorni, rabilo poslat na jedno studijsko putovanje ko bi se komotno moglo nazvat »Od baje do baje« pa da malo vide kako živi jedan del oneh ki su za njih glasali. Morda bi se ča i promenilo.
I ne govorin sad za to ča j’ poskupel benzin aš vozit se moremo i ne moramo, ne govorin ča j’ krešila cena kafa aš moremo ga i doma popit, ne moramo va oštariju poć, govorin o tomu da si skupa moramo jist. A kilo srdel je trejset kun, pišmolji ki zgljedaju huje leh ja 40, a o skupemi ribami da ni ne povedamo. Mislin na to kako rabi kupit drva, a i ona su poskupela aš kad benzin poskupi, se poskupi i zafaljujen dragomu Božiću ča ne bivan va neboderu kade j’ račun za grijanje veći leh su mnoge penzije. Jadna sen nan palenta, ma za puno stvari smo si sami krivi. Zato pamet va glavu kad budu drugi izbori i ne leh gljedat ki j’ simpatičan, ki ni, ne gljedat na stranku leh malo promislet ki j’ stručan na svomu delu, a ki ne.
Za kraj ću leh pozdravit gospodina Cvetka Doričića, čovičića ki me nikada ni videl ni čul ma me rad čita. Takovi me pozdravi najveć vesele aš mi j’ već puna pipa pozivi ki počinju z – a, biš mogla nan ovo napisat, biš ono. Ljudi moji, moj dan ne traje dulje leh vaš, pa si dajte mira baren ov mesec, aš kuliko iman dela, mislin da neću ni spat.
S kamika i mora
Studijsko putovanje “Od baje do baje”
Slavica Mrkić Modrić
04. lipanj 2022 09:21
Foto Kristina Štedul Fabac PIXSELL
Znate oni dani kad se zbudite i već bi zadavili celi svit? E, pa mane j’ jušto takov. Ča j’ najhuje, se jih već i već iman, ča znači da san stara, preveć trudna i fanj nervozna ženska.
Srića san oženjena pa mi niki ne more reć da se ponašan kod stara divojka. Ne more to niki reć ni našemu presjedniku, a on je jušto kod i ja – pravi pretendent za takovu titulu. Jedino ča bi on bil stari mladić, ma karakteristike su iste. Se me jadi, si su mi štufi, bedasti, lenobe, ma grozna san i sebe i sen okolo sebe. Niš me ne veseli, se mi gre na živci pa mi kolegica govori da nisan ja stara divojka leh mrgud na granice depresije. Pitan mat da ča njoj se vidi, san ja va depresije. Odgovara mi da san vrite, a ne va depresije i da j’ ov svit šal mater ženit onoga časa kada su se počele rabit te besedi kod ča j’ depresija. Da prvo ni niki znal ča j’ to pa da su si ljudi normalno živeli. Niki da ni govoril o depresije leh da j’ neki ta dan malo huje volji, da se j’ stal na levu nogu, da mu ni dan i slično. Niki da nikad ni hodil nikakovomu psihologu, ni psihijatru i da j’ zasensega bilo jednostavneje i šegaveje življenje.
Niš nisan odgovorila aš moran se š njun složit. Ne mislin da svit trebe ustat va vrimenu kada su govorili da j’ zemlja ravna ploča, ma da j’ se ovo prebrzo, to mislin. Kod ča mislin da smo si skupa, neki već, neki manje, zgubili busolu. Sa seh stran te stišću i pritišću, ćeš politički, ćeš gospodarstveno, ćeš psihički, ćeš fizički, ma kako god glavno da ti po glavine neki skače. Dite se još ni ne rodi, a roditelji su ga već predbilježili za klavir, balet, strani jezici, tenis, zapisali va nogomet, zborsko pjevanje i već listaju brošuri za studiranje vane, aš ki j’ videl još studirat doma – to j’ znak lošega socijalnoga statusa. A socijalni status seh nas je va lipomu klincu. Imamo najveći broj milijunaši po broju stanovniki, ma i se već i već sirotinje. Šegavi su već davno rekli da neće bit dugo i da će skrozin za skroz nestat srednja klasa, da će ostat leh bogati i siroti. Kako su rekli – tako i je. Baš malo mislin ča more neki ki ima penziju manju od tri tisuće kun, biva va stanu i nima nigdere nikoga ki bi mu pomogal. Ma more si zajedno klast štrik okol vrata i finit ovozemaljske muki. Rekla san tri tisuće kun, a da ni ne govorin o onemi ki nimaju ni hiljadu.
Takovi ljudi ja zoven čarobnjaki. Bitno je da smo mi stekli si statusi za prehitit kunu va euro, a kuliko će se ljudi va tomu procesu prehitit za vjeke vjekovi, to baš jako nikoga ne pojida. Ča nismo mogli malo počekat z sen ten prehićevanjen kad nan ov rat va Ukrajine ionako sako malo poskupi življenje? Mišljenja san da smo, ma ki mane i slične mane bilo ča pita. A i zač bi kad njin ni potreba, a i ne kreću se baš med ljuden ki nimaju. More bit bi rabilo si oni ki vode ovu državu, ki donose odluki, odnosno ki su, va ostalen i za seh nas odgovorni, rabilo poslat na jedno studijsko putovanje ko bi se komotno moglo nazvat »Od baje do baje« pa da malo vide kako živi jedan del oneh ki su za njih glasali. Morda bi se ča i promenilo.
I ne govorin sad za to ča j’ poskupel benzin aš vozit se moremo i ne moramo, ne govorin ča j’ krešila cena kafa aš moremo ga i doma popit, ne moramo va oštariju poć, govorin o tomu da si skupa moramo jist. A kilo srdel je trejset kun, pišmolji ki zgljedaju huje leh ja 40, a o skupemi ribami da ni ne povedamo. Mislin na to kako rabi kupit drva, a i ona su poskupela aš kad benzin poskupi, se poskupi i zafaljujen dragomu Božiću ča ne bivan va neboderu kade j’ račun za grijanje veći leh su mnoge penzije. Jadna sen nan palenta, ma za puno stvari smo si sami krivi. Zato pamet va glavu kad budu drugi izbori i ne leh gljedat ki j’ simpatičan, ki ni, ne gljedat na stranku leh malo promislet ki j’ stručan na svomu delu, a ki ne.
Za kraj ću leh pozdravit gospodina Cvetka Doričića, čovičića ki me nikada ni videl ni čul ma me rad čita. Takovi me pozdravi najveć vesele aš mi j’ već puna pipa pozivi ki počinju z – a, biš mogla nan ovo napisat, biš ono. Ljudi moji, moj dan ne traje dulje leh vaš, pa si dajte mira baren ov mesec, aš kuliko iman dela, mislin da neću ni spat.