Za spomen
Prvo zakona, poli mlade pije se i ji, a va kamari kumi svituju mladih. Kad redu va crikvu moraju preskočit prag, ako bi stali zić moraju na druga vrata. Spred oltara moraju zaminit rupčići. Kad kleknu, mladi mora livin kolenon kljeknut, na rub mladine halje, ako ne, ona će mu zapovidat va kući. Mladih se blagoslovilo, mladoj stavilo v ruki boko i z srićun šlo
V noći, okol desete ure kad bi selon ozvoneli pucnji, tri put, znalo se da se nika divojka obećala, da je sprošena. Ženi bi vjutro brže bolje zele brente i na studenac, jerbo okol studenca, čekajuć red na vodu, pretresale bi se ča se događalo va selu, se novosti pa i ka se obećala, za koga, kakova je familija, dal ima dotu, počinje priču o svadbenim običajima Kirije Stjepan Stipica Juričić, zaljubljenik u svoju Kiriju, u njezinu običajnu tradiciju i »genetski kod«. I nastavlja prepričavajući jedan od uobičajenih »studenac pogovora«.
– Oni su dobri gospodari, jednuč san bila poli njih, Marija mi je pokazala ča ima kad Ani pride srića, ča ti velin, videla san dva lancuna, dvi ponjavi, slamaricu, stomanju, ne znan ti pravo reć, kušin samo jedan, i da te joj dat kotigu, se je va škrinji. E, da su i dvi sarze naručili da ne re sramotno va ljušku kuću…, evo, recimo to bi bil jedan divan.
A samom piru prethodilo je što? Pa, zaljubljivanje ili, kako Stipica kaže – zagledanje.
U očekivanju
– Dečko bi obično na maši ili na sajmu zagljedal ku divojku, doma bi ocu i materi rekal da bi se otel ženit, i ku divojku je zagljedal, ma puno put ženilo se po dogovoru tako da mladi nit su znali ni poznali do ženidbe. Najprvo su doma podivaneli o divojki, z ke je kuće, kakovi su gospodari je maletina vridna, čista i se tako. Kad su dokončali da se more ženit, zazvalo se ku rojakinju i poslalo va tu kuću da reče ka bi dečko otel oženit njihovu hćer. Zapolne, prvo nego sunce projde zbogon, jerbo tad su si doma, rojakinja bi šla va tu kuću. Poli maletine ponudili bi ju da side, ona bi sprot rekla da j’ prišla z te i te familije po poručku i dal bi njihova hćer šla za tog dečka.
Pirna slastica
Ako je familija bila zadovoljna počastili bi tu ženu jilon, sprot se i dokončalo kad te prit va prošnju. Va prošnju hodilo se četrtkon ili subotun, utorak i petak da nisu sretni kot i va vrime Kvatri. Dečko bi prišal z dva kuma, seli bi va kući i domaćinimi divaneli o sen i sačen samo ne poč su prišli. Stalno su bili nuđeni jilon i vinon, običaj je bil da se niš ne kuša dok se mlada ne sprosi, a onda bi veli, ili kako su ga zvali debeli kum, rekal poč su prišli, popital oca, mater, maletinu pa i dečka sul zadovoljni, a kad bi mu potvrdili zel je kuburu, šal va dvor i tri put puknul va zrak, da se zna da je mlada sprošena i da se ženi.
Kad se ženila Marica i Slaven, 1977. leta, put prepričili: Stipica, Miljenko, Drago, Željko, Goran, Iva, Stipica, Iva, Boris, a harte igrali Vlado i Tinko
Tek tad se jilo i pilo. Divanelo se o piru, kad bi mogal bit, jerbo va korizmi plovan ni otel ženit, dokončal se posjet, da roditelji vide va ku kuću jin se hćer ženi, pot kakovin će krovon živit. Dokončalo se da se re va plovaniju upisat kanti.
Pir Urse i Mihe Balas va Grižah 1906. leta
Plovan bi upisal kanti, tri nedilje za redon na maši, to se niš plaćalo, ako su mladi bili va nikon daljnjen rodu morali su crikvi dat uli. Mladi su morali hodit na mašu, spovid i pričest. Kad su familije utanačile pir osan dan prije moralo se zvat svaću, debeli kum je pozival svaću ot mladog, a mršavi kum ot mlade. Z sake rodbinske kuće pozivalo se po dva, ako je pozvan samo jedan ta ni prišal kot ni oni ki su pozvani zadnji dani. Nakon prošnje mladi je mogal hodit divojki, četrtkon i nediljun, na fraj.
Počašćen bi bil fritami i vinon, friganin pršuton i kobasicami, a va ton frajanju dali bi mu sikiru i jelo granu da vide jel zna otesat luč. Mlada bi dala selskin ženami preju da upletu čarape za sakog pirnog, a otac bi šal v Riku kupit joj kolar i oriži za pir. Niki od roda šal bi na Boduliju ili Bribir dokončat sopcih, jerbo su to bili najbolji sopilaši. Sobotun bi ženi donesle upletene čarape i po zdelu, a nika i malić jačmika ili šenice. Se se spravljalo va škrinju, a jačmik i šenica va vriće, čarape bi stavili na vrh va škrinju, kad pride mladi z kumon i korovenjun z koli se mora bit nared.
Vinac
Kad se čulo da spred kuće kola staju, mladu se skrilo, mladi i debeli kum šli bi sprot va kamaru iskat mladu, ako je nisu našli došli bi va kuhinju, a divan bi ovako hodil:
– Dobar večer!
– Bog daj putni ljudi, ča vi išćete?
Ono šturo – Stjepan Juričić rođen je u Rijeci 1953. godine. Objavio je etnografsku zbirku »Bubanj i muzika složno udaraj – Griški krabunosi« i zbirke pjesama i kraćih proznih tekstova »Na počivalih« i »Prosuti dani«. Zastupljen je u zajedničkim zbirkama »Beseda od srca«, »Duša zdola kamika«, »Put Matetićevoga ognjišća«, u pjesničkoj panorami »A lip ti je govor«, »Verši na šterni«, časopisu »Književna Rijeka«. Povremeno piše za »Besedu« Novog lista i »Glas Vinodola«. Bavi se slikanjem, izlagao je na nekoliko samostalnih i zajedničkih izložbi.
Ono zaspraven – da ga ni, rabilo bi ga zmislet. Kirija ima sriću ča ga ima.
– Išćemo jednu stvar, va kamari je ni pa smo simo prišli.
– Recite ka je to stvar?
– To je vidna stvar
Kuma pokaže lonac, zdelu, čriplju, brentu, a kum na se veli da ni.
– Pa ča bi to moglo bit, najbolje da sami išćete!
– Nan je pobigla divojka, tekli smo za njun, a videli smo da je šla va vašu kuću i ovdi se nigdi skrila.
Spoznova kuma pokazuje na staru mater, mlaju sestru, a mladi i kum odu iskat mladu, kad ju najdu va kući nastane veselje. Na stol se stavilo vrč vina i suho meso, ki ni bil za stolon dobil bi drugi vrč. Mladi i mlada seli bi jedan naspran drugog, kuma bi stavila na stol sito smokvami i orihimi, a va sredini je bila jabuka. Mladi se nahićevali jabukun ot ruk do ruk, a vrč vina ot ust do ust, to se zvalo vinac. Kad je veselje finilo muški bi zinesli škrinju dotun i stavili na prag, a na škrinju sela bi divica ot mlade. Debeli kum počme iskat ključ, a mali kum mu reče da se ključ mora otkupit. Kad se narede škrinju odnesu na kola, vozar udela spre volih korbačon križ i potira voli. Debeli kum i mladi redu zad kolih da ne bi ča palo.
Nediljun, kadgot sredun, vjutro počel bi pir. Kad se svaća skupila poli mlade dokončaju kao te dočekat mladog. Kad bi čuli pismu i da re mladi, va dvoru uhitili bi se sakakovog dela, cipali i pilili drva, bačve nabijali, ženi prele, sukale preju, kundali maslo, a zibrali i ženu ka zna dobro divanit da dočeka svaću. Kad bi mladi došal svaćun spred vrata, znutri je se ozvanjalo od dela. Nikoliko put bi pobalali, z nutri se javili:
– Ki je?
– Dugo vrimena skupljan se o griškon kraju i to slažen va knjižicu »Griško sedo«. Opisal san naše crikve, škole, zidariju, nigdanju kuću, običaji, nigdanja društva, i još toga. Kad će knjiga zić? Ne moren niš reć, jerbo danaska je lahko napisat knjigu ma dat ju oštampat drugi je divan. Plani? Postavil san izložbu slik »Griški krabunosi i tamburaših«, a sad pripravljan izložbu o nigdanjen lovu, poveda Stipica.
Pitamo, kade j’ se to našal, kako, kuliko mu j’ vrimena i truda rabilo?
– Se to skupil san kopajuć po starih knjigah, sakakovin hartami i starin slikami, klatareć po selih, a sih san smutil oko toga pa mi najčešće jave ili pošalju kad čagod interesantno najdu. Doduše jako se puno toga hiti.
– Putni smo ljudi, ćete nas prijet na konak, zabasali smo i ne znamo kadi smo?
– Nimamo mi mesta za tulikih, hote susedon, moramo delat, i spoznova va dvoru se počme ozvanjat ot dela.
Spoznova mladi pobala na vrata.
– Ki je?
– Smilujte se, zamite nas, lofci smo z duga kraja, kuna je pobigla va vašu kuću pa remo za njun!
Tad bi se vrata oprla, a svaća ušla sopnjun i pismun.
Livo koleno
Va dvoru nasta veselje, odleti i ki pucanj z kubure, a debeli kum i mladi odu va sobu kadi čeka mlada, bosa, kum bi prnesal više obuće, jerbo je mladi moral mladoj kupit obuću, kad su našli ka obuća paše, kum bi stavil cvanciku i obul mladu. Vani bi divojke kitile pirnih pivajuć – oj pelin pelinče, moje rosno cviće, stobun će se moji kititi svatovi.
Prvo zakona, poli mlade pije se i ji, a va kamari kumi svituju mladih. Kad redu va crikvu moraju preskočit prag, ako bi stali zić moraju na druga vrata. Spred oltara moraju zaminit rupčići. Kad kleknu, mladi mora livin kolenon kljeknut, na rub mladine halje, ako ne, ona će mu zapovidat va kući. Mladih se blagoslovilo, mladoj stavilo vruki boko, kum zame mladu spod ruke, a kuma mladog i zipeljaju van. Pirni se posortaju po dva, naprvo korovenja z divicun noseć bandiru i projdu na zakon. Mladog pelja kum, a mladu kume – svastice. Va srid povorke hodil je mali kum noseć manju bandiru. Do Prvog sveckog rata korovenja je hodil z jednun, a nakon rata z dvi divice, z sake strane jednun.
Običaj je bil, evdi i ostal do danaska, ako se mlada ženila va drugu plovaniju, kad je svaća hodila na zakon, dečki bi prepričili put, na srid puta stavil bi se stol, na stol vino i čaše, a kad svaća pride debeli kum moral se dečkimi pogađat, jerbo su divaneli da peljaju njihovu rožicu z sela ća, a oni da su ju uzgajali i to se mora platit. Kad se dokončala otkupnina, kum bi dečkimi popil vino, makli bi stol i svaća je mogla poć. Nakon zakona mladi bi nosil boko, posortali po dvoje i vrnuli mladoj. Va selu rojaci i seljani zinašali bi davali svaći, debeli kum bi najprvo natočil čašu mladimi, pa onda svaći, ki god bi donesal vino kum bi nazdravil i zahvalil.
Fala fejzbuk stranice »Griško sedo«, kod i šjor Stipice ki su nan dali dozvolu da pokopamo po njihovoj arhive i zamemo se ča nan rabi.
Va kući svaća bi sela za stol, mladi zmed kumih, na stol se stavilo jilo i vino. Jilo se z nikoliko zdel i pilo z jednog vrča. Zmed jila pivalo se, soplo i kolo tancalo, a kad je na stol stavljeno zeli i kuhano meso, niki ot svaće zišal bi van i dva put opalil z kubure. Reklo bi se da puca na zeli. Ako je bilo i oriža divanelo se da je pir bil dobar. Uz mih svaća bi zatancalo kolo pivajuć. Kad bi kolo i pisma finili, rič bi zel selski starešina i sin zaželel sriću, zdravlje i se i tad bi zapivali – Smiljan, Smiljan, Smiljaniću, pokislo ti perje…
Protiv višć i coprnic
Kad se zredale zdravice kumih i približivalo vrime da se re ća, kuma bi na stol stavila ponjavu i sih pozvala da se ogljedaju na ponjavu. Svaća bi hitala soldi, ki kuliko more, kum prebroji soldi i da mladimi. Nakon toga mladi odu va kuhinju da se mlada oprosti, sih ziljubi, oni je blagoslove, ogrnu ogrnjačen i va ruki stave filar, protiv višć i coprnic, mladi je zame pod ruku i zame boko i svaća projde kući ot mladog, sopci zasopu i zapivaju – veseli se majka junakova, peljamo ti bora zelenoga i uz bora nevjesticu mladu.
Kako bi bila noć sopci bi malo sopli, zamjaukal bi i mih, zato je svaća za sega maha pivala – čula jesam da se dragi ženi…
Kad bi svaća prišla spred kuće, zasople su sopile i mih, a na pragu stal je stol i na stolu zdela cukaranin i paprenin kuhanin vinon. Mat ot mladog natočila bi vino va drvenu zdelu ku su zvali čaša i dala nevesti govoreć:
– Hćerko, Bog ti pomozi!
Nevesta bi zela čašu i pitala:
– Majko ča je va čaši?
– Hćerko, vino, med i dobra volja!
I tako su pili otac, mat, mladi i mlada tri put. Mat ot mladog zela bi nevesto spod ruke i upeljala va kuhinju, a mlada bi sih poljubila ki su bili nutri. Va kući se jilo, pilo, pivalo i kolo tancalo, zdravice držale, a oko trete ure digli bi se mladi i kumi, na njihovo mesto seli bi korovenja i divica da čuvaju boko, ako ga ukrade svaća kum je moral debelin cigarami otkupit. Kum zatanca z mladun i va tancu ju preda mladon i tad prvi put mladi zatancaju skupa. Kad fini tanac odu va kuhinju i mladoj zname krunčicu z glavi uz pismu – popunul je tihi vetar i odnesal Mari krunu…
Mlada se tad presukla i mladi bi slobodno tancali do finjenice. Kad se počelo danit mlada bi svaći podilila čarape. Svaća bi zišla pred kuću zatancali kolo i zapivali – gornjen selu oganj gori, pokraj ognja nešto lipa već divojka raskubljena, tri leta ni opletena, a četrto raskubljena, grabljami je razčešljali, a konopi opletali.
Isti dan, večer, mladi bi šli nazad va kuću ot mlade, napovrat, tad bi mlada pobrala ako joj je ča ostalo poli oca i matere.
Eto, tako smo uz pomoć Stipice Juričica bili pirni na autohtonom griškom piru.
