Foto M. Gracin
JELENJE Jušto kod Gašparov malin, ki još od 1650. leta melje i melje hrmentu, šenicu i sakakove štorije od življenja, tako j’ i na jelenjskomu cimiteru saki od oneh, već od hiljadu duš kuliko ih je bilo, mlelo i mlelo svoja domišljanja na barba Bruna Kukuljana, dušu toga Gašparovog malina. Barba Bruno j’ šal tamo za kamo govore da je se kako rabi, ća će reć da se već nete morat strašit goropadnosti Ričine – poplavi i suši. Šal je, kako j’ to lipo rekal velečasni Milardović – tamo od kuda j’ i došal. A došal je od srca, va mnogemi srcimi ostal, a prošal aš je moral, kod ča ćemo i si mi. Neki prvo, neki kašnje. Ono ča j’ ta silna rika ljudi, ka j’ barba Brunu došla reć – hodi sad i lipo sanjaj, zaspraven je odgovor na pitanje zač smo na oven svitu? Da bi voleli i da bi nas voleli. Neki va tomu uspijemo, neki i ne. Barba Bruno j’ volel. Drugačje ni ni umel. I dite, i čovika, i bogatoga, i siromaha, a najveć svoju Vidicu, staroga malinara hćer, i svoju dicu, vnuki i praunučicu Luciju. Za nju bi bil rekal – gjedaj ju, prava malinarovo dite, va Ričine do kolena.
Istina, Ričina i dalje teče, kola od malina se i dalje vrte… Ma on kameni žrvanj, star da stareji teško more bit, ono sito, on kanalić, on njegov »spomenar – harmonika« va ki je kladal saki tekst o malinu ki bi ga se dojmil, ona kantredica, ma i ona mišja familja, aš kakov je to malin ki ne udomi bar jednoga miša, kod i si oni ki su va ta malin zahajali ne radi toga ča j’ on spomenik od kulture leh radi barba Bruna, ki su znali da j’ bila vela privilegija i čast, jist muku z Brunovog malina, i delit bar jedan kus vlasatitoga življenja z ten dobren čovikon i njegovun Vidicun, znaju da j’ barba Bruno bil i ustal – glasnogovornik Ričine, sih njejih malini i malinari, čuvar onoga nekadanjeg, dobar semi, a svojoj Vidice i žrvanj, i kolo, i zrno i pogača. I se.
Barba Bruno, govore da si malini rajski sada plješću, ma va ovoj Doline suz, on zadnji na Ričini, on va Martinih, škriplje. Ne zato aš se j’ neš pokvarilo leh zato aš vas već ni. Kod i si oni ki su danas na jelenjskomu groblju rekli – lahka ti bila gromiška zemlja. Huk Ričine ćeš i tamo čut, kod ča će i ona tebe va sakoj kapljice sobun va Svemir nosit! Retka privilegija i za nju, i za te.
