Na otoku od sreći opet maj cvate. A vreme zafrkuje, aš mu se tako pijaža. Malo oblaki, malo sunca, pak daž. Grašica. I tako. Ale zato je prvomajskega fažola na se strani bilo. I delilo ga je. Pak su se oni potrebneji i najili. Neka su! Ma to je već pozabjena stvar. Ča bi bilo od novega? Od pulitiki san rekla niš! A onda me Trsašćica naganje da neka seh za keh mislin da rabi, oklepušan. Po zidarski. Nego po kakovu, tr to mi je se va opise od posla. Tega zidarskega. Pobarka nima nikako lazno aš se mora saki dan navadit pet al šest engleskeh besed. Aš se opet spravja nekamo. Neka se parićuje. Tr njoj je zadnja ura ako misli nać nekega ki ima okrugli stol va promjere od okol sto i dvajset centimetar. Aš va takovega se je namorala pred pedesetak let. I nikako njoj z glagvi ne gre. Takov stol.

A mane z misli ne gre kako MojNajprvi i Najzadnji va zemje grebe, kopa i prekapa. I s traktoron mu je čovek prišal su lehu prekopat i razrahjat. I onda su se obadva čudon čudila kako se nijenemu va Našoj Nalepšoj ne da va zemje ruki zablatit. Magar mi Trsašćica prodava štoriju da su ruki va zemje pune zdravja. I ne samo za ruki, nego i za se drugo na čoveke. A najviše živci.

Kopat, set i sadit va zemje je živo zdravje! Za telo i duh! Ale za badave su se te lepe štorije. Lagje je brundat na su draginju ka nas je poplavala. Poplavali su i va Podravine. Tukla je grašica. Snega opet va Gorsken kotare. A moj meteorolog mudro muči. Će bit da se ni on čudi temu vremenu, ma ne sme na glas zgovorit.

Povišica i ponižica

Pak onda naši opet povedaju od našega napredka. To će reć njihega, tr so vreme nan oni maše. I otpevaju. Pak onda su rekli da nas opet čeka neka povišica, a da će se draginje dogodit ponižica. Od jada nisan šla ni po penziju. Za sen ča su mi tamo rekli da ne moran prihajat na njiha vrata, aš da oni imaju program s ken me soldi i doma moru dočekat. Ne, ne! Samoj sebe mašin. I otpevan, Nećete vi, nijedan, mane doma držat. Aš ja moran po svete hodit. Šepajuć, tapajuć i jočuć, ma sama od sebe. Svojmi koraki od svojeh nog. Ke su ča su. Ma su moje!

I dokle malo premišjan ako je još čagod mojga kade, zamišjan kako bi bilo lepo da iman kakovu kućicu miću tamo nejde na Kanareh. Pak da se pečen na sunce. I zapekujen. Aš teplini ovdeka ni pak ni!

Ja, kad ne smeš od pulitiki onda moraš od bedastoć namajat. Rus i Merikan su mi već si živci skonzumali, a ovi naši bi štriki za železnicu gradili. Aš da su nan zato cugi usporeni. Štriki ne vajaju! Kemu oni povedaju?! Mane, ka san se z vlakon navozila. I to z letorinun. Ne znate ča je letorina?! Ni ne me čudi, tr i to već nijedan ne zna. Letorina van je lep vagon, tako lep da su mu stakla velika kot najveće poneštri. I onda zadovojno žbališ vanka. Aš moreš videt vas on lepi zavičaj ča ga more kupa, šumi ga hlade. Vetri ga zibju pomanje al pojače. Kako otročića va zibelice! Nigder takove lepoti ni, ne!!

A ča se mojga repertoara od kina tiče, čitaj TV programa, štorija se je jeno malo promenila. Vrnuli su se onisti ken je rabilo vreme za počinut. I sad su počinjeni nazad prišli i macuhaju se tuta forca. Ćeš z rukami, ćeš z noži, ćeš s pištolami. I puški imaju parićane. Kako i oni s Črnega mora. I oni se trebe na jenak mod: za zitrebit se do najzadnjega! Ej, ma čekajte malo! Pomalo! Ki će ostat za štoriju dofinit?!

Bilo pa pasalo

Da ne bin pozabila ću van reć i da ćemo se ovi dni nać si radijski penzioneri. Oni ki još moru pozgorun stat i ken nisu, ne daj Bog … i tako naprvo. A Trsašćica mi je ordinala da moran sakako doznat kade njoj je njija jubav z Ribarnice. Aš da ga ni i ni i već njoj ne vaja nijedan petak prez njega. Ne zna ni ča skuhat po petkeh, prez njegoveh riceti.

Pak san se opet zmislela na Trsašćicu kako je plakala za onemi lepemi vremeni kada smo se imeli. I fažola i polovice od prasci. I cel svet nan je presednika poštoval. Bome i Pobarka još vavek narekuje. Aš njoj je pamet kratka i pozabila je da smo se za današnjo živjenje sami, tekon tečuć zborili. I obedve ruki zdigali da nan ka nebi pofalila. I još mi se Pobarka škužuje za ono neč ča mi je pred teh trejsetak let rekla. Kada san ja njoj bila neč rekla.Tako ča mi je rekla i ča san njoj rekla?! Pak mi dopoveda:

Kad smo v Opatije gledali brižne izbjeglice ča su morali z Vukovara i Slavonije bežat, rekla si: Nikad više oni nete nazad poć. I to san ti bila zamerila, trubilo ja. To ona za se govori. A imela si pravo.

Pak san se najzad zmislela: nisan bila mislela da se oni nete vrnut nazad radi ničesa drugega, nego radi tega ča je ovde lepo i dobro. A judi su ne samo dobri, nego i predobri. Ovi naši. Ma za korist. Aš od našeh v Opatije ni više niš ostalo.

Ostal je mesec maj, a behara na si kraji. Cvatu rožice!