Verujte, dala bin pol plaći da ne moran danas pisat ov kantunić aš san nakrcana z humoron kod drek z vitaminimi, a o veselju da ni ne govorin. Ono mi na uši zihaja. Ma, služba je služba, a družba je družba pa vas lipo molin da ne sudite prestrogo.

Ča bi se reklo – dojde blagu, a kamo ne čoviku. Kako van, prvo al kašnje se povejen, onput ću van reć i da mi j’ jutros umrl mačak. Namjerno piše umrl aš ako neki z tobun živeje 21 i pol leto, ako j’ s tobun pasal su sriću i tugu ovoga svita, onput je on član familje i prijatel, a takovi ni ne ugibaju, ni ne krepivaju.

Oni umiru. Lipo j’ mane i momu Marijotu ki j’ imel čuda nadimki – Nau, Dečko, Mali, Beli, bilo sa ta leta, ma kako to va životu biva – semu i sakomu dojde kraj i nikada na ta kraj, ni za ta kraj, niki ni spravan.

Ni on ki odhaja, ni on ki ostaje. To j’ bilo jutros na pet, a dokle ovo pišen čula san još more grdeh stvari da komać čekan da se ta sakramenski petak prehiti na sobotu, aš nekako vavek mislin da će jutra bit bolje. Da tako ne mislin već bi me davno vranić odnesal.

Vranić neka nikoga ne zima, magari bin najraje rekla da neka se malo poprčka va oni ki su dokončali kako ruralnen područjen ne rabe ni banki, ni bankomati. Pas mater kurbu prasicu i pol, pa kuliko moraš bit nečovik da takovo ča smisliš.

Razumen ja i te meri osiguranja i ti silni stroški ča one sobun nose, ma te banki ne tende da živeju od ljudi, a ne ljudi od njih. Ala, recite vi sad mane je normalno da on Zlobina mora poć na banku na Čavju, Dražice ale ča ja znan kamo.

Za njen i on z Hreljina, i on z Meje, i on z Praputnjaka, Krasice, Škrljeva… Ki j’ tu nem? Pa ja poznan baren troje od njih ki još od, takoreć Marije Terezije nisu bili v Rike. Ma, ča v Rike, nisu se maknuli z svoga mesta.

I sad najedanput zapiraju i banku na Trsatu va ku su hodili si oni ki nisu hodili na Gromik. E, pa neće već tako bit aš i nju zapiraju. Ni već toga – gren na Trsat, malo va banku, malo va oštariju, a malo pu Majke Božje.

Ostale su leh još oštarije i Majka Božja, a za poć pu njih rabe soldi, ma kade ćeš jih dignut? Na bankomatu? Bonđorno! Bankaron se bankomati ne splate, već san van to rekla i znimat će jih, tako da lipi moji, si ćemo mi va centrale.

Mi ki nimamo internet bankarstvo pa gremo platit računi na pumpu, poštu ale Finu, siguro. Ma i oni ki imaju će aš retki su restorani, kafići i oštarije ki primaju kartice. Za pravo reć, ako te ulovi sila, ćeš z karticun zahod platit?

Se j’ to tuliko nemo da se ja pitan, ča j’ ljuden va glave. Sakomu dajen pravo da dela demonstracije za ono ča ga muči, ma ne moren dokončat da neki protestira zato aš želi dopovedat da j’ zemlja ravna ploča, a ne pojida ga ča ne more doć do teško i krvavo zarađeneh soldi.

Odnosno more, ma pol plaće potroši doklen dojde do banki. Ne vodi ovo dobromu.

Ni dobro ni ča se tiče koroni. Broji kreše, probijaju i ona najčrnja predviđanja, a ljudi se i dalje drže dugo od cepljenja. Ja se držin dugo od ljudi, ča isto ni dobro aš ću na kraju finit kod Peđa Grbin. Ostat ću sama samcata i neću znat ča sama sobun.

Moran priznat da san se od srca nasmela kad san čitala razgovor z Frankon Vidovićen ki j’ rekal da bi Grbin da more dekreton izbacil i Covid-19. E, za to bin mu pljeskala do kraja života, ma nažalost ni Grbn ne more se hitit vanka ni z stranki, ni općenito.

Kad smo već pu pulitiki, ča reć osin da se vrh opet svadi, da su ta njihova karanja kod loša turska sapunjara i da me već ni briga ki j’ komu ča rekal, i ki j’ komu ča odgovoril.

Me par da j’ pu nas celo leto Noć vještica. To z sakoga pikabita pada kostur vanka, a si oni ki su zgljedali, ča j’ najvažneje skoro pa dobro, neš zatafljaju. Ala ča j’ rabila bilo komu ona sramot okol murali narisanih za Vukovar va Zagrebu?

Jako san se razjadila aš kukasti križ more vriskat z sake druge fasadi, niki ga neće prefarbat, a mural va spomen Vukovaru i njegovemi žrtvami, i to lipo načinjen mural, e toga rabi prefarbat. Sramot samo takova!

I zato me još već, ako more već, veseli on mural ča ga Stjepan Kovačević z Bogdanovci i njegova kumpanija rišu va Vukovaru. Mural za su stradalu decu va Vukovaru. Nadan se da njega nikad nikakova glupa glava neće prebrisat. Ma, nažalost, nisan sigurna.