Baš gljedan kroz poneštru od redakcije i igran se na meteorologiju, ča će reć da provevan dokončat za kuliko vrimena će se nebo na zemlju spušćat, a Rika bit sopeta grad koji teče. Procjena je da će to bit za jedno dve uri, a drugi put ću van, ako se domislin povedat kuliko san bila blizu. Ča? A niš baš jako, kako na globalnoj, tako na lokalnoj razine. Bit ću cinična pa reć da mi j’ jako drago čut da naciju va ovomu vrimenu zimske, a i korona depresije najveć zanimaju ono ča bin ja nazvala trivijalne stvari. Otkud mi to? Pa, od klikanosti po portalih. Pasanu šetemanu najčitanije je bilo kuliko dugoga miša ženske najveć vole, onput neš o ženskomu orgazmu i na kraju vijest da će nan premijer po treti put postat tata.

Premijeru i njegovoj parone čestitki aš ki će delat na poboljšanju demografske sliki nacije ako ne premijer, a ove drugi spomenuti teksti me se ne dotiču osin po tomu ča san mišljenja da diskriminiraju. Zač i koga? Pa i ženske i muški, aš zač muški ne bi isto govorili o dužine miša, tr ga oni imaju i zač leh ženski orgazam kad postoji i muški. Kako god obrneš zgljeda koda seks zanima jedino žensku populaciju.
Sada dosti o seksu, tr si znamo da j’ on odavno precenjen, a va zadnje vrime već obrnjen prama mozgu leh prama bilo koj drugoj točke na telu, homo na prebrojavanje. Česa? Pa potpisi od MOST-a.

Oni za dve MOST-ove referendumske inicijative. Neće jih brojit DIP, to će delat Vlada. Tu odluku j donesal saborski Odbor za Ustav i Poslovnik, a isti je odbor prihvatil i MOST-ov predlog da brojanje kontrolaju i najmanje dva predstavnika sake inicijative. Jedino ča još nisu dokončali je to kuliko će vrimena za brojidbu imet oni ki broje – mesec, dva, šest… Se mi j’ to bilo već leh smešno aš me j’ zajedno asociralo na moga prijatela Miloga i na me. Mi smo van čuda vješti va brojanju glasi. Iskustvo smo stekli brojeć glasi na Grobničkoj skale, a i na MIK-u. Verujte, niki ni brži i precizneji od nas. Ja čitan broji, Mili dela četiri okomite crti ke petun prekriži, i za čas smo gotovi, i vavek nan se štima.

Tako da se mi lipo preporučamo za to delo aš ministron je da umeju brojit soldi, a ne potpisi. Leh da se zna, ov put ne bismo volontirali, red je da pokla tuliko let i mi zaslužimo ki dinar. A, za pravo reć ne bi baš bilo lipo, da Vlada i ministri uza se obaveze ke imaju još pokle dela gredu i na brojanje. Srića od Boga ča j’ premijer to dite načinil prvo.

Na lokalnoj razine i sega i ničesa. Ki’vo dan naslišan na radio da j’ po nekoj ankete, mislin od Indeksa, ma ne mojte me zet za sigurno, Rika proglašena najpoželjnijen gradon za življenje va Hrvaskoj. Lipo mi j’ to bilo čut, ma onda san sela i malo razmislela. Prvo pitanje ko mi j’ palo napamet je bilo – pa, kakovi su ti drugi. Ne znan aš nikada nisan bivala nigdere leh tu. Onput san maknula si lokalpatriotski osjećaji i provala trezveno razmislet ča je i ča ni. Rika je još vavek liberalna sredina, ma ni blizu kako j’ bila nekada. Rika je još vavek jako urbana sredina, ma ni blizu kako nekada. Rika je još vavek turbo multikulturalna sredina, ma ni blizu kako nekada.

Ono ča više ni i ča mi jako pači je činjenica da j’ postala blatan grad, grad pun smeti za ča ne krivin leh gradske vlasti, krivin i se one blatnjuhi ke ne znaju za ča služi kanta od smet ale kontejner, a baren jih v Rike ima kuliko ćeš. Sad kuliko se često se one prazne, ja ne znan, ma kako čujen od ljudi – retki petki. A ja, kad niki nete va smetlari pa j’ muka Isusova nać radniki. Ne leh za to delo, i za puno drugeh. Pu keramičara, vodoinstalatera, tišjara, pitura ale automehaničara red čekaš skoro pa već leh na specijalistički pregled va rečkomu špitalu.

Va sakomu drugomu rečkomu fast fudu delaju Indijci, oni nan i ceste kopaju i kući grade, a i pridonose multikulturalnosti. Ne znan do kada će se ovo durat, ma smjer va komu gre mi se ni malo ne pijaža, pogotovo po petku i sobote va najrokerskijen gradu va Hrvaskoj ja ne čujen rok leh nekakovo zavijanje ko se stručno zove »trep«. Ča j’ to? Bolje van je ne čut, i ne znat.

San postala staro njurgalo? A san. Avah je mane, se već sličin matere. Hvala na pitanju, zmaj je dobro i još vavek z jednakun jačinun riga oganj.