Ste malo videli kako naši dečki z Leta 3 delaju šušur po Liverpulu. Mi znamo da kuda oni pasaju – tu trava ne raste, ma oni va Liverpulu, e, oni će tek sada videt kuliko su njihovi dečki zvani Bitlsi zaspraven bili koda ni ne curaju. Znan, bila su druga vrimena i oni su za onda bili avangarda, ma ovi naši su avangarda već četrdeset let i ča su stareji to su nemeji. Kako bi moja mat rekla, ne za Let 3 leh za me – se ča j’ nemo to j’ moje, pa tako i ja moren reć za Let 3 aš ni da M&P od čera poznan. Nažalost i od prekčera je reć malo aš leta gredu, a pameti ni. Mada to opće ni istina aš Let 3 se j’ itekako šegavo pripravil za vas ov šušur. Mozak operacije je se razradil do i najmanjeg detalja, a veličina deški je va tome da se to delaju najprvo radi sebe i svoje zabave, a onput radi sega drugoga. Retki su oni ke poznan da bi raje pomicali granice od Mrleta, ta jih pomiče vjerojatno od rojenja.

Uostalon, sad se to skupa ni važno. Ono ča mane dela kuntentnun je činjenica da su se za Mamu ŠČ zalepile se generacije, si svitonazori, si glazbeni ukusi i cela Hrvacka. Na svoje oči san videla kako ta njihov, na prvu fanj bedast pjesmuljak, a na drugu opak do boli, kantaju i va Dalmacije, i va Slavonije, i va Zagorju, a o našemu kraju da ni ne govorin. Let 3 je načinil jušto ono ča načine naši nogometaši kad igraju na svjetskimi prvenstvimi – ujedinil je seh i pomiril inače nepomirljivo. Odkada su pasali va finale ni po oštarijah ni p od pulitiki, niki ne njurga ni radi ovoga, ni radi onoga si leh povedaju o Letu 3. I kako su se obukli, i ča su rekli, i kade su se i s ken litratali, i kako bi cela ta štorija mogla pasat, i ča ako zbilja dobijemo kade će bit ta Eurosong, i je Prlja prehlajen, alergičan ale ča trete i tako vavek va krug. Ma neka je i va krug leh neka više ni črno.

Znan neki ki su šli i na kladionicu. Da će dobit na Eurosongu to j’ pu mnogeh već gotova stvar iako, mišljenja san, njihov plasman na toj kič parade opće ni bitan – ni njin, ni nan aš oni su svoje već odbavili. Upoznali su celi svit z gradon i zemljun porjekla, načinili su šušur kakov se ne viđa na Eurosongu, rastancali su se pabove po Liverpulu i reklamirali naše mudanti i kanotjerice. Ne znan da jih proizvodi Galeb ale neko slično poduzeće, ma znan da san takove vavek užala kupovat pokojnomu ocu. To su bile ondašnje »bokserice«, a da Mrle obožava retro, to već i orepčići po granah znaju.

Osin njihoveh nemotarij po Liverpulu jako me vesele i si oni ljudići ki njin na ov ale on način šalju podršku. Tako san se do suz nasmela kad san čula da su prijeli paket pun čvarki od jedneh Samobora. Saka čast. A i videla san da su jih dečki z gušton pomastili. Lipo j’ i to ča j’ spred zgrade od Grada načinjena ona cvetna instalacija, a bome i to ča su ljudići z PIK-a načinili ŠČ kruh težak već od deset kil. Moja podrška je va tomu ča se žrtvujen i naslišen komentari od materi dok gljedamo ta sakramenski TV šou. Naravno da su naši najbolji, najlipji, najsrčaneji i najšegaveji. Si drugi su, citiran – jedan veli drek. Jedine ke nisu dobile po sebe su Čehinje aš, sopet citiran – vidi kako su one lipo i pristojno obučene, a i prelipo upletene. Ki put pomislin da bi ju trebelo snimit aš takovi komentari retko da bi ki zmislel. Naravno da zna i plasman. Rekla je – ako ne budemo prvi, bit ćemo zmed prveh pet i šlus.

Rekla san van – se, i mlado i staro, se j’ ponemelo za Leton 3. Za neke me j’ malo i strah. Recimo, kolegica Šarlota poveda kako j’ celu noć sanjala da j’ va Liverpulu i da klati z Letovcimi po pabimi. Va jednomu da se j’ Mrle sukal, a da j’ malo falelo da se i ona. I na kraju da su pobjedili i da j’ ona načinila intervju šnjimi. K tomu da j’ to bil prekinjeni san, odnosno on va nastavkimi. Ja san ju va čudu gljedala, a mladi kolega Jakov leh ju je pital – ćeš prijavit noćni rad? Nasmela san se do suz i rekla da ako Let 3 zbilja dobije ona more promenit zanimanje i opret firmu »Vidovita Šarlota«. Sad nan je čekat pa da vidimo te njeje moći. Nego, nikada niš ni bez konkurencije pa ni Šarlotina vidovitost. Još se nismo fermali smet kad evo ti kolegice Slavki. Pita da ča j’ smešno, Šarlota njoj poveje, a ona govori – pa i ja san se to sanjala. Ni me briga kako će se one narihtat, jedino ča želin da njin se večeras snovi ostvare.