Baš malo gljedan izvješće od nekakove evropske službi za klimu i klimatske promene va komu stoji da j’ pasani mesec treti najtepleji va svitu, a drugi va Evrope od kada ta merenja postoje. Mat je rekla da oni leh povedaju da povedaju i da njoj ni ćaro kade su oni merili tu tepline. Rekla san njoj da va Ponikvah pa me j’ vrit poslala. Intanto njoj ni nikada teplo, pa me par, i da nedaj Bog temperatura kreši preko četrdeset, siguro bi rekla kako j’ ta dan leh sled malo tepleje leh je inače i da ove današnjen tepline nisu ni blizu onih nekadanjeh. Njoj niš današnje ni ni blizu onomu nekadanjemu pa nikakovo čudo ni za ovo. A za pravo reć, ta se nikada ne poti pa joj ja užan na nos nabit da j’ sigurno va pasanomu životu bila kaška. Morete mislet ča dobijen kod odgovor, a ona nikakove pasane živote ne prizna, kod ča ne prizna ni to da bi se tako rad cepila protiv koroni da ju ni već strah od dohtori i igal leh virusa, tako da i dalje va kuće iman antivaksericu.

Iman ja va kuće i čuda toga za posnažit i pospravit aš se j’ ona spomenuta antivakserica domislela da ako saborski zastupniki moru na ferije, more i ona pa si j’ lipo zela dva meseca godišnjeg. Kad san ju pitala ako more bit gre i ona na ljetovanje, krstarenje ale slično kod ča gre većina saborskeh zastupniki odgovorila je da bi rado ma da ni »solventna« pa da će lipo sedet na trosjedu, se četire vajer i mirna Bosna. Kako j’ rekla, tako i je. Od uobičajenoga dela ko odbavlja kad ni na ferijah zadržala j’ jedino da maške da jist, se drugo je na čekanju. Zaspraven je to sad testiranje ka j’ tvrdoglaveja, ona ale ja. Nekako mislin da će ona prva popušćat dočin vidi paučinu pa će se naglo »zbog potreba posla« vrnut z ferij. Živi bili pa videli.

Videli smo i to da su se na proslave Oluje va Kninu lipo popovedali predsjednik i premijer. Mat je rekla da bi rad znala o čemu tako srdačno i dugo tambaškaju, nač san njoj rekla da ja znan i počela – najprvo su povedali kako j’ sa verdura krešila, onput su se dotaknuli benzina i da j’ to jako bezobrazno aš da j’ litar došal skoro pa na jedanajst kun. Pa su komentirali uspjehi i neuspjehi našeh olimpijci, kako saki muški dve tri besedi su bile i o nogometu, o Mesiju i Barcelone ka j’ va velomu dugu, a na kraju da su se domisleli i na penzioneri pa su se spravili da će njin penzija ta drugi mesec bit veća za jednu kunu, aš da tuliko proračun more podnest. Malo me j’ bledo gledala, onput je neš spominjala Lopaču, pa me j’ najzad sopeta vrit poslala i naredneh uru vrimena san bila vrite, ma na svetomu miru.

Onput se j’ trosjed i ona zalepljena na njemu opet oglasil. Sada j’ komentirala turističku sezonu. To van je ovako zgljedalo.
Ona: Ma, da je to istina ale lažu da nan je se puno turist.
Ja: Je.
Ona: Ča – je? Da lažu ale zbilja je.
Ja: Puni smo kod šipak košpic.
Ona: Ja, oneh Čehi i Poljaki ča luft madraci prodaju i za dve šetemani pu nas potroše kuliko ti da ne zijdeš z kući.
Pogutnen još jednu uvredu i govorin:
– Mama, ni to ko nekada. Čehi i Poljaki su danas bolje stojeći leh smo mi. I ne prodaju nikakovi luft madraci.
Ona: Hodi lipo vrit i ti i oni.

I tako san opet finila vrite. Ov put z vagun Čehi i Poljaki, pa me j’ strah kako ćemo ispoštovat tu propisanu fizičku distancu. Ta rit bi morala bit jako vela aš pu nas je zbilja krcato turisti i ne leh Čehi i Poljaki kako to moja mat misli. Zaspraven mi se čini koda se j’ celi svit slel jušto na Kvarner. Ki’vo večer prohajan Korzon, to j’ gnjeta koda j’ karneval. Nekako tako se to skupa i zgljeda – saki kafić svoju mužiku svira pa te pokla dvajsetak metra ne bole leh uši, boli te i glavina. Ja se 365 dan va letu obučen koda su maškari ma, moran van priznat, te san večeri utaknula mnoge ke su me premašili. Na terase spred Konta, kamo san šla popit pastilju za glavu i mineralnu, me par da smo jedino konobar i ja povedali hrvacki.

I se ja to povedan roditeljice, a ona će mane:

– I onput se čudon čudite ča ta korona ne fermiva! Pa kako će kad nan celi svit puše za vrat. Hote lipo si skupa vrit i leh da znaš od danas pa doklen ti turisti ne pasaju ća lipo ćeš va mojoj blizine masku nosit. Je ti ćaro!

A ča mi ima bit ćaro. Pal mi je mrak na oči, a more bit je i va toj rite kamo me stalno šalje letrike nestalo.