Tu san. Sega vranića mi se zdogajalo od pasanoga puta. Paron mi je negdere pokupil koronu i doma ju dopeljal, a doma van je pu nas 68 kvadrati, pa ti hodi bit va samoizolacije. A moraš aš, badava ti kuća od 150 kvadrati kad ni paron, a ni mat ne moru bit sami, a kako su ti obadva jako srcu prirasli, ne moreš ni ti prez njih, pa ni bilo druge leh protegni se kuliko ti j’ lancun dug. A naš je bil tuliko kuliko san van napisala, i imel je leh jednu škulju ale kako bi se to reklo – slabu točku. To j’ bila kupaona.

Ni bilo druge leh posest se i sama sobun potambaškat pa načinit plan i program preživljavanja. To van je pu nas zgljedalo ovako – dočin je Igor prošmrcal, mada ni imel febru, lipo san ga odbavila na testiranje i klala va izolaciju. Onput je došal potvrdan nalaz, ma do onda smo imeli već pet litar dezificijensi za špricat, ne znan kuliko paketi rukavic i onih antibakterijskeh rupčići. O maskami da ni ne govorin. Se to, kod i se drugo moj prijatel Cigo je nabavil i na kvaku obesil. Na toj sakramenskoj kvake je viselo se – od obeda, preko novin do drv. Se je to moj Cigo dobavljal i za fala smeti nosil va baju. I se bi to nekako pasalo da osmi dan od koroni paron ni zaspraven dokončal ča j’ ta korona. Opaka opačina. Iznenadi kad već misliš da j’ gotovo. Od 37 preko noći »vozil« je na 38,4. A kako je, ne rizična leh »avah je nan« skupina, mislela san… Ma bolje da van ne rečen ča san mislela.

Nisan znala ča š njin. Povedali smo na telefon, on je skucal, a vranić me zel ako ne i lagal kad bin ja sakeh dve ure pitala kulika j’ temperatura, kuliki j’ kisik, da more dihat, da kašlje i slično. Do njegove dohtorice se nisan mogla probit aš je stalno bilo zauzeto, a z kuće poć tamo nisan mogla aš san bila va sakramenskoj samoizolacije. Kad već nisan znala ča, zazvala san bivšu mu dohtoresu na telefon i se njoj lipo povedala. Ona me j’ saslušala i rekla – reci mu da ću ga sad zvat da čujen kako govori, kako diše i slično. I bome, su se čuli. Ona j’ rekla ča treba, na ča moran pazit i malo po malo došal je na svoje. Merili smo, svadili se na telefon, ja san zijala, on je mučal, napominjen – se preko telefona i nekako smo se konačno pokle osavnajst dan i videli. Sada j’ fala dragomu Bogu dobro. Biba, hvala do neba i nazada!
Već je bil i na izletu. Do spred butigi aš sad imamo novi problem – badava ča j’ korona pasala, on se sada, već leh prvo, boji ako kade vidi već od tri čovika na blizu. Znan da će i to pasat i da triba vrimena, ma kako bi rekla jedna moja prijatelica – kad sve ovo prođe, rezervirat ću si sobu u Lopači. I ako je ki razume, ja ju razumen. Uza se ovo ča san van napisala još si zamislite staricu od 84 leta ku baš briga za se osin da j’ njeji Igorić si ti dani sam i niki ga ni videl. I kako ona ne more shvatit da san tako zločesta i samo na se mislin, a ona me je rodila. Sad se pak ispričavan sen susedon ako su čuli kako zijan. Dva put san ju ulovila pred vratimi od korona kamari. Ča bi vi da ste na momu mestu? Dobro j’ pasala da i nju nisan va njeju kamaru zaprla.

Dodajmo k tomu i si oni odvratni broji ki saki dan čujemo, pa vijesti o tomu ki j’ dobil koronu, komu j’ jako loše, ki j’ finil va bolnicu, ki ovo, ki ono. Me par da mane neće bit dosti oporavak va Lopače. Najbolje j’ da već sad zazoven ako j’ ča slobodno na Rabu. I ni to škerac, zbilja j’ se ovo trebelo zdurat. Leh kad vidin onu špricalicu gre mi za vanka hitat.

A moj prvi izlazak bil je na drugi đir cepljenja. Ranun zorun, prva na redu. Se j’ bilo super do k večeru. Dobro, to ča j’ ruka malo jače bolela leh ča j’ prvi put, ma uho me j’ ubijalo, a febra 38,5. Mislin si, i ruka, i febra, se to more bit nus pojava, ma ča j’ sad z ten uhon. Intanto, tu noć nisan oka zaprla. Mat hrče, mačak isto, a ja bin z glavun zid razbijala. Komać san doškala jutro i zazvala prijatela Serđa pa ga poslala va apoteku da pod pretnjun pištolun nabavi kapi, aš – pozabila san van reć, bil je vikend i moja doktorica j’ delala tek pundeljak zapolne. Serđo j’ pod sirenun dopeljal te kapi, pušćal, a kade drugde ako ne na kvake, a onda j’ počela moja muka. Kako ćeš kapi sam sebe va uho zlet. Materi se ruki tresu pa bi me celu oprala. Nekako san i to, i evo – pasalo je se. Ono ča san z ovun štorijun otela reć je – ljudići moji dragi, pazite se i pazite drugi aš preveć drageh nan, poznateh i nepoznateh ljudi već je korona zela.