Snimio Marko GRACIN
Rojen san va kuće, va koj i sada bivan. Va Vežice. Prvo ča san videl su bili vrti puni zelenjave. A prvo ča san čul su bili kanti od tići. Leta su pasevala, a ja san postal svedok kako je sega tega se manje i manje. Nestali su vrti i se ča j' po vrteh raslo. Mesto sega toga rasli su neboderi, asfalt je pojil zidići i gromače. Nova Vežica je hodila zgorun, a ona stara zdolun. Tako j' bilo i va ostatku Sušaka. Sušak svojga djetinjstva i svoje mladosti otel san zadržat i zato j' nastal mjuzikl »Sušak, Sušak«
Retki su oni z ovoga kraja ki ne znaju da će 12. devetoga na scene »Zajc na Sušaku« zaigrat prvi čakavski mjuzikal. Zove se »Sušak, Sušak«, a nastal je va koprodukcije HNK Ivana pl. Zajca i Udrugi Maraton. Oni ki će va povjeste ovoga grada bit zapisani kod dva čovika ka su storila ov čakavski mjuzikal prvijenac su Mensur Puhovac ki se j’ pojidal za tekst i Olja Dešić ki se j’ pojidal za noti. A ča j’ ov tandem načinil? Ča j’ klal va ta sakramenski mjuzikal, al mjuzikl, kako van drago? Morda bi bilo najbrže reć – čuda sudbin, čuda ljudi ki su Šušakon pasali i š njen živeli zmed trejseteh i sedandeseteh let pasanoga stoljeća. On ki j’ pokrenul celu ovu štoriju bil je Mensur. Zač, kako i s kun svrhun?
Od rojenja va kazalištu
Mensur Puhovac skoro pa pol stoljeća »biva« va rečkomu kazalištu. Bila j’ to ljubav na prvu.
– Ove kazališne sezone navršava mi se 45 let dela va Rečke opere. Danas san najstareji član opere po dva kriterija – po neprekidnom stažu va opere ki dura od 1971. leta, ma i po letimi starosti. Na kraju sezone država će mi reć: ala hote doma, dosti je bilo. Ma nisan ja va kazalištu samo 45 let. Ja san tamo od vavek. Od rojenja. Neki će reć kako? Evo kako. Moj otac je bil jedan od prvih člani Rečke opere, od 1946 leta. Tamo se j’ upoznal z mamon. Mat je kantala jedno kratko vrime, a otac je ostal punih 50 let. I kada san se rodil, a to je bilo 1951. leta va osmen mesecu, govore da je bilo teplo kod i sada, samo san slušal o kazalištu, o operi i kada san počel tamo delat osećal san se kod doma.
Ma Mensur ni počel kantat va kazalištu.
– Nisan, kod srednjoškolac san već kantal na omladinskim festivalima po bivšoj države. Si su znaki bili da bin se trebal posvetit zabavnoj glazbe, ali nekoliko let potle mestro Dušan Prašelj, prava vežička čovičina, za seh nas mlajeh keh barba Duško, va to je vrime bil direhtor Rečke opere i osnoval je reviju mjuzikli ka se održavala va Sušačken neboderu. Zaspraven, onda je celo kazalište delalo tamo aš se staro obnavljalo. Mene su se ti mjuzikli jako zapjažali i prvo kada san trefil barba Duška pital san ga ako moren doć na audiciju. Rekal mi je – moreš i moraš aš tamo ti je mesto. I tako san počel, 1971. na jesen. Sada će bit punih 45 let.
Prvi mjuzikal va ken je Mensur zaigral bil je »My fair lady«.
– Domišljan se da je maestro Prašelj jedan del teksta prevel na čakavski. Oni ki pooznaju djelo »My fair lady« znat ćeju zač, pa moremo reć da se onda prvi put va nekon mjuzklu pojavila ova naša čakavština. Ma nažalost, maestro Prašelj ni još dugo ostal direhtor. Kada j’ on prošal ća ugasila se i revija mjuzikli i oni kazalištarci ki su od prvega dana bili protiv tega došli su na svoje. Ali sejedno smo uz operni repertoar sako malo prorivali kakov mjuzikl.
Va isto vrime Mensur je bil čest gost i na glazbenimi pozornicami jedinoga hrvackoga glazbenoga putujućega festivala, Festivala Melodije Istre i Kvarnera.
– Ja, nekoliko san let bil sudionik našega MIK a i to su dani kih se rado sjećan. Veseli me jako da je moja prva predstava va kazalištu bila mjuzikal, a da će se par dani prvo nego gren va penziju na kazališne daske postavit mjuzikal »Sušak, Sušak« čigovog libreta san ja autor. Dica i žena mi govore da mi je to otpremnina. Ja niman niš protiv. Pred ku uru mi se j’ rodil vnučica. Postal san nonić! Znate ča? Mislin da se prezimena Puhovac neće tako lako rešit va kazalištu.
– Rojen san va kuće, va koj i sada bivan. Va Vežice. Pravo reć je da san se rodil va kamare kraj ke i sada spin. Prvo ča san videl su bili vrti puni pomidori, trsi i sakakove druge zelenjave. A prvo ča san čul su bili kanti od tići, gardelci, lokarini, varzulini, kosi, i šušur od orepci i galebi. I va soj toj lipote, va Vežice, ja san se zgoil. Leta su pasevala, a ja san postal svedok kako je sega tega se manje i manje. Sako malo nestal bi ki vrt, pa za njin cestica, klanac. Pililo se murve, koprivići, hrasti. Nestale su črešnji, smokvi, praskvi, marelice i se drugo ča j’ po vrteh raslo. Mesto sega toga rasli su neboderi, asfalt je pojil zidići i gromače. Nova Vežica je hodila zgorun, a ona stara zdolun. Ja, da leh ona! Kako puno hodin. Recimo, na delo va kazalište skoro pa saki dan, da mi ne bude štufo menjan rutu. Ki put gren preko Pećin, ki put preko Trsata, pa preko Bulevarda. I dok tako hodin sjećanja mi dohajaju kod nema. Se poznan. Saki škalin, zidić, kade je ča bilo, a danas tega ni. Zač tega ni? Zač je nestal Sušak? Smiron su mi ta pitanja na pamete. I baš tako j’ nastala ideja za ov mjuzikl. Rekal san si – moran neš storit, napisat o Sušaku. O Sušaku svoga djetinjstva, i svoje mladosti. Ma, to mora bit napisano na moj kazališni način, mora bit muzike. A ako ima muziku, ča j’ to onda ako ne mjuzikl. Tako san počel. Storil san libreto, a onput je rabilo nać kompozitora.
Povedanja i napovedanja
I Mensur ga je šal iskat. O tomu iskanju poveda:
– Znaš ča ću ti reć – ov naš kraj ima jako puno ljudi ki dobro komponiraju. Pjemi su njin na MIK-u, dobro pasevaju kod ljudi, ma ja san silno otel da to bude neki z odovuda, Sušaka. Da bude Sušačan. Mislel san si – lagje ćemo funkcionirat, brže ćemo se razumet. Valje mi j’ napamet pal Olja Dešić. Olja j’ sin moga suseda ki j’ Vežicu proživel isto kod i ja. A isto tako Olja je z mojin sinon hodil osan let va razred tako da san znal njegovi muzički početki od osnovne škole, a pogotovo su mi bili dragi njegovi muzički uspijesi kašneje. Ni mi rabilo puno mislet. Bil san siguran da j’ Olja najbolji odabir, ma problem je bil va tomu ča nisan bil siguran da će otet. Da će prihvatit ov izazov. Srića, se j’ dobro pasalo. Kada smo se trefili rekal san mu o ideje. Na moje veslje valje se j’ ćapal dela i tako smo počeli. Kada su već si songi bili skomponirani, trebelo j’ nać režisera. Predlog je pal na Edvina Liverića. I opet srića, i on je prihvatil pa se z gušton ćapal dela.
Mensur je već rekal ča j’ tema prvoga čakavskoga mjuzikla, ma ni povedal kako se j’ napovedal Sušačanimin doklen je libreto pisal.
– Ja, san, bome san se napovedal. Ponavljan, mjuzikl poveda o nestanku Sušaka. Lipoga mesta kade san se rodil, od tega kršnega primorskog kraja, kade san mići va školu ja hodil. Ovih par besed od Kneževića govore dosti. To Sušačani vole kantat i vavek se pitaju, zač je Sušak nestal, ki je to storil, zač se to dogodilo. Išćuć razlogi, i prvo leh san počel libreto pisat puno san govoril sa starin Sušačanimi, davali su mi velu podršku i sako malo bi me neki fermal i rekal česa se još domislel. Moran van reć da kada bin napisal se ča su mi povedali morali bimo mjuzikl davat va nastavcimi.
Oštar, oštarija, kumpanija
Mensur je šušačku štoriju »zidal« va oštarije i okolo nje. A zač baš tako? Zač oštarija na Brajdice?
Na Šušaku, va »Sušaku«
Šjor Mensur Puhovac ki potpišuje libreto mjuzikla »Sušak, Sušak« igra ulogu škovacina. Glazbu j’ za mjuzikl načinil Olja Dešić, a režije se j’ ćapal Edvin Liverić. Va predstave sudjeluju člani Hrvacke i Talijanske drame, kod i zbor i orkestar Operi HNK-a Ivana pl. Zajca i Studija Maraton. Svojin učešćen veli vritnjak naprvo dali su njin i Damir Kedžo, Mario Lipovšek Battifiaca i Katja Budimčić. Kostimografiju potpišuje Manuela Paladin Šabanović, scenografiju Damir Šegota, a svitlo Dalibor Fugošić. Va ostalemi ulogami pojavljuju se Olivera Baljak, Anton Plešić, Nenad Vukelić, Denis Brižić, Lucio Slama i Saša Matovina, ča će reć člani »Zajca«. Ako gremo gljedat leta onput ćemo reć kako j’ Mensur najstareji va mjuziklu, a najmlaji član izvođačke ekipi je Frano Živković ki ima deset let i igra maloga Ivića.
– Oštarija zato aš je bila. Zad nje stanica aš je bila. A znaš ča j’ oštarija? Va njoj se se dogaja. Va nju saki zavrne. Neki na bićerin, neki na kafe. Tu se se dozna. Ki je ča storil i ki ni niš storil, ča se dogodilo i ča će se dogodit. Najidelanije mesto kroz ko će pasat štorija od Sušaka. Nekada su ženske Škrljeva, Svetog Kuzma, Drage, Podvežice dohajale z vlakon dole na placu. Neke prodvat, a neke ča kupit. Ma ne leh ženske. Skrcali bi se, okrepili pu barba Pava va oštarije pa na placu. Va mjuziklu će o tome se doznat.
Ono ča smo na tešku muku o mjuziklu još doznali je da j’ Mensur liki gradil jušto ovako:
– Ako je oštarija, mora bit i oštar. A taj oštar ne more bit sam, mora imet nekoga. Ov moj ima hćer. Hćer je zaljubljena i to va dimnjačara. Osin njih tu j’ još i jedan profesor. On od gimnazije. Vavek je prvi na kafu. Onput su tu i lučki delavci ki dohajaju na marendu, pa velečasni, pa pitur, bekar, ribar, placarice. Ma treba doć videt i na se će se odgovor dobit.
Ma do toga »doć videt« čuda prob su glumci načinili, a i još će jih. Jušto oveh, sled već od deset dan, ke nas dele od premijeri njin će bit udarni. Na pitanje kako njin je do sada hodilo Mensur odgovara:
– Najbitneje je to ča j’ atmosfera na probami fenomenalna. Sen na pozornice i okolo nje radnja se pijaža. A kad je tomu tako, onput osjetiš da si delaju z gušton. A kad neč delaš z gušton, onput je rezultat dobar. Glumci z čakavštinom nimaju problema. Saki govori čakavski. Istina, mići problem je bil aš saki govori čakavštinu svoga kraja, ka je va nekin besedamin drugačija od sušačke. Ja san to pisal na sušačkoj čakavice, onako kako ja govorin, ali i ja san z vrimenon neke besedi pozabil, nisan bil va njih siguran, pa je tu upomoć priskočila Silvana Vranić, gospa profesorica z Filozofskog fakulteta, inače ekspert za čakavski zajik. Ona j’ popravila se ča j’ rabilo popravit. Fala njoj.
Ansambl Intermezzo
Mada j’ »Sušak, Sušak« prvi Mensurov pravi mjuzikl, ako j’ gljedat z autorske strane, ma oni ki rad dohajaju na se ča diši na ča, pa tako i na predstavi ke su Mensur i njegov Ansambl Intermezzo igrali po prelipen nan zavičaju, reć će kako su jušto te predstavi bile, moremo komotno reć, svojevrstan trening za ovo ča će usljedit 12. devetoga.
– Ja, moglo bi se i tako reć. »Intermezzo«, čigov san ja voditelj je nastal od ideje nas par z kazališta. Osnovali smo neš za svoju dušu. Teli smo govorit o našoj Rike, kroz muziku, ples. Teli smo pokazat kakov je život bil na Rive Boduli, opisat lučki delavci, ribari, kapitani, mornari. Kroz te prestavi, tel san Rike vrnut on mediteranski štih ki je, nažalost zgubila. Va tin predstavami koristil smo već poznati domaći songi, a isto tako poznate arije z raznih oper, operet i mjuzikli. Isto tako teli smo da kroz »Intermezzo« damo šansu mladin pjevačima da se za njih čuje. I znaš ča još? Ja volin kad se ljudi smeju. Danas retko to vidite. Si su opterećeni brigama. I zato gledan da storin predstavu va koj će ljudi tu uru ča su snami pozabit na se brige. Mi va kazalištu davamo dobre predstavi, poznatih pisci i kompozitori, umjetnički jaka djela, ali ča imaš od tega kada čovik ki je došal va kazalište radi onoga ča je gledal mesto da pozabi na birgi, kada zajde z kazališata bi još mogal koga i ubit. Treba počet mislet na ljudi, pomoć in da se nasmeju, da budi dobre volji.
Premijera prvoga čakavskoga mjuzikla »Sušak, Sušak« bit će, kako smo rekli – 12. devetoga va Šušačkomu neboderu. Na ku uru, Mensur još vavek ne zna, ma ono ča zna je da će do Novoga leta bit dosti predstav pa se niki ne mora pojidat da neće arivat videt i čut štoriju od nekadanjega Šušaka. A ča će Mensur kad na daske ke život znače bude postavljen »Sušak, Sušak« delat? Će počinut ale već na pamete ima nekakov novi projekt?
– Plani je. Kada ja ne bin imal neki plan, značilo bi da san gotov. Ono ča moran reć je da me jako veseli ča se upravo dela montažna pozornica s kun će se proširit sadašnja pozornica va Trsačkoj čitaonice. Zač me to veseli? Pa, zato aš ću sada z Ansamblon Intermezzo moć postavljat na scenu i male operi, mjuzikli, obrađivat domaće vesele štorije, organizirat koncerti… Popularno će se ta naša scena zvat TEATRIĆ. Posebno san zahvalan Čitaonice Trsat ča su prepoznali tu ideju i daju se od sebe da to uspije. Ma, zaspraven, sada ću jedno vrime prestat mislet na bilo ča. Premjera mjuzikla je blizu i ni mesta va glave za mislet na bilo ča drugo.
