Ča ti j’ imet puno let pa se domislet na sakoga vranića. Tako san se ja prvo leh san šla ovo pisat domislela na to da j’ na današnji dan va bivšoj države bilo velo slavlje, za seh osin za prasci, aš, odi ga znat zač, ma su, ljudi jušto rojendan od državi slavili tako ča su klali prasci.

Mi smo doma leh dve leta imeli po dva prasca, znači da smo dve leta klanjen slavili dan od Republiki. I obadve leta bi ranun zorun došal Mirkić i odbavil to ča j’ moral. Domišljan se, ja bin glavu zatukla pod kušin leh da ne čujen brižno blago kako kriči.

Lahko da i moj pokojni otac ni bil kod i ja, pa bi va vrime doklen je Mirkić obavljal delo on našal sebe neko kilometar dalje. Jedino komu to ni niš pačilo je gazdarica. Užala j’ mane i ocu reć – ja, kad se kolje ni vas, ma van va padele ne kriči.

Sad nit’ prasci, nit oca, nit Mirkića. Leh ja, moja domišljanja i gazdarica ka me j’ čera pitala – ča ni jutra 29. novembra? Je, odgovaran. Ona onda kod z topa – onput da si mi donesla glavu od prasca za obed kako god znaš i umeš. Majko Božja od sedan žalosti i mane osmun, koga će njoj vranića glava od prasca i kade da ju najden. Ali hodi ne donest…

I najden ju od prve, i to na Kukuljanoven va jednomu od trgovačkeh lanci. Kad san došla blizu toga gastra i videla uho ko prči morala san zabrenzat aš bin najraje bila tekla da me ki drugi ne preteče.

I govorin ja gospe zad pulta da mi da tu praščju glavinu, a ona mane ni pet, ni šest leh drito – zašto ju kupujete ako vam se toliko gadi? I ča sad? Da ni situacija bila kakova je, bin njoj rekla da ča ju briga ili bin se zafalila i prošla, ovako jezik za zubi, praščju glavu va košaricu i brzo doma da se ne ohladi.

Donesen glavinu i svoju i od prasca doma, ono uho koda mi misli nasliše, a mat sa zadovoljna. Mane želudac va pete, a ona hrska, mljacka i gušta.

– Ča ti j’ to tako dobro, pitan ju.

– Da ni dobra ne bi ju i Tito jil, odgovara.

Avah je mane, ona j’ za sen sega prošla, pomislin, a na glas pitan:

– Ki Tito, ča bombardiraš?

– Ča ki Tito? Jedan je Tito, a ti si očito hodila okolo školi, a ne va školu ako ne znaš da j’ Tito kad je bil mići bil siromašan. Jedanput je z braćun i sestramin ostal sam doma i bili su jako lačni pa se j’ poprtil na sufit i znel glavu od prasca ka se j’ sušila, klal ju va padelu, skuhal i nahranil i sebe i braću.

– Ča j’ bilo kad su mat i otac došli, pitan ju.

– Ča ja znan ča j’ bilo, vjerojatno njin je preselo, ma kakove to sad veze ima, govori ona i smiron maše z glavun aš njoj ni ćaro kako ja za ta slučaj ne znan.
Naravno da znan, ma škercan.

Kada j’ otela pojist i zajik od prasca fermala san ju i rekla – sad bi bilo dosti. Zajičinu ionako imaš, a ja ću ovoga svoga pilića hitit van ako nastaviš mastit po tomu prascu. Fermala je jist, ma ne i govorit.

Ča? Bolje da ne znate. To da j’ pokle iskala gastal i govorila da ju želudac prekida, to j’ štorija za se, ma kad san njoj rekla da njoj je to od prasca odgovorila je – ni od prasca leh od prasice ka me jetika. Naravno da j’ mislela na me.

Šla san gljedat vijesti i vidin da i tamo maše o kolinju. Govori ona gospa epidemiologinja z Vukovara da za povećanje broja bolnih od kovida va Vukovaru ni kriva Kolona sjećanja leh kolinje i kirvaj. A, ka san ja da njoj protuslovin, saki ima pravo reć ča ga j’ volja, kod i onaj ča nasliše to ča čuje zet zdravo za gotovo ale malo promislet.

Vidin i da j’ premijer va samoizolacije aš mu j’ parona pozitivna. Vavek su sirote ženske krive. Bilo i bit će. Pa me vijesti sopeta vrnjaju va Vukovar i čujen kako su stroge mjere zaštite od korone va pabu Vukovar prekršili neki visoki dužnosnici, kako to mi z mediji volimo reć.

Iskreno, ako tamo dela još ona zgodna plavojka, ja njin se ne čudin ča su ostali duže leh je propisano. Jedino njin ni trebelo ono bahaćenje, razbijanje i verbalno nasilje. Ma, imaju oni svoji nadrejeni pa nek oni misle.

Ono ča ja još mislin da moran, odnosno da ne smen pozabit je čestitat Mirjane Bobuš rojendan. Ja, rodila se j’ jušto na dan kad i SFRJ. Mane to ne čudi, a vas? I sen drugen čestitan rojendan, a ljuden z Praputnjaka sućut radi gubitka najslavnejeg sumještanina i velo hvala sen ki su mi ki’vo dan va potrage za korenimi od Maradoni pomogli.

Va očekivanju snega i boljega jutra, stojte mi dobro i pazite na se, aš ki sam sebe pazi i Bog ga pazi. Još jedna mudrost moje materi.