Kako su i govoreli, došal je i ta sakramenski četrti val od koroni. Spominju se te delti i slično, a ja san se već pomutila pu alfa soja, tako da već jako ne bacilan aš ov ale on, jadna palenta onomu koga ulovi. Intanto je baren sezona bila, kako bi naši stručnjaki od turizma rekli, već od očekivanoga.

To smo i sami mogli videt sakoga pasanoga vikenda kada bi na cestah bile takove gnjeti da biš prvo z Hreljina na Krk došal hodeć leh vozeć. Ma, neka, glavno da smo dobro inkasali aš, kako stvari stoje – rabit će nan.

Rabilo bi nan i jedan sled već socijalne osvještenosti pa da se domislimo i na one okolo sebe i lipo se, ako se još nismo, gremo cepit aš z ten sakramensken viruson, neovisno koga soja bil ni se ča škercat.

Recimo, blažena moja mat. Ona se onoga ča ne vidi ni ne boji. Logično bi bilo obrnuto, ma ona ima svoju teoriju i okolo teh bacili i virusi. Govori – ono ča ne vidin, ne postoji i niš mi neće i šlus! Onput ja njoj rečen – tr ni Boga nisi videla pa govoriš da će on se rešit.

Obično mi odgovori da ako ne zamuknen ću ja videt svoga Boga, a njejega neka pušćan na miru. Doda ona i još čuda toga ča ovako pristojna osoba kod ča san ja nikada ne bi ponovila.

A kada smo već pu verovali ale ne, ki’vo dan na delu neš tambaškamo okolo teh sakramenskeh droni, kade jih se sme dignut, kade ne i slično, a jedna kolegica poveda kako j’ to već neizdrživo postalo aš da neki dan ona i paron sede na balkonu, me par da j’ rekla da j’ to drugi kat i čuju da neš zvrnda.

Pogljedaju i ča imeju videt? Lipo na metar od njih dron ale gljeda on va nje, gljedaju oni va njega. Kada j’ ona počela zijat šofer od drona ga j’ naglo digal vajer i koda niš ni bilo. Jedan drugi kolega njoj je rekal da j’ pogrešila aš namesto ča j’ počela zijat, trebela je zet partviš i opizdit po dronu, pa bi dron namesto vajer šal šoto, a onomu ki ga vozi ne bi više palo napamet špijat, ni snimat po balkoneh.

Onput smo se ulovili toga ča j’ opće ta dron delal nasprama njejeg balkona. Ja san ju zajedno pitala – si morda cici kazala, nač je prasnula va smeh i rekla – odi, molin te. Jedan drugi kolega je imel teoriju da su se to dečina igrala aš da danas dite ko nima dron ni normalno dite, a treta je rekla da ona misli kako se ti droni dižu da bi špijunirali ki ča ima doma, ki je doma, a ki stan je prazan da bi ga tati mogli pokrast.

Da Glavni ni fermal pogovor, verujte mi da bi došli i do industrijske špijunaži, a morda bismo i Talibani upleli va se to. Ono ča san ja pomislela je da j’ za sen sega se šlo mater ženit, da ne rečen onu huju uzrečicu aš va normalna vrimena su ti na balkon doletali golubi, orepčići, sjenice i ala tu i tamo kakov galeb, a sada ti doleću ti zvrndave leteće »bakuli«. Niš nisan rekla, da mi se ne smeju.

Niš ne bin rekla ni da su me novinari pitali ono ča su pitali kolegi od ministra Marića, a pitali su jih ako bi i oni, da jih je prijatel pozval na jahtu, šli bez mislet va ča bi se ta odaziv mogal pretvorit. Par jih je reklo da bi odbuli aš da imaju gajetu, pasaru i slično, pa da ni potrebe za ten. Ja bin sirota od srama mučala aš ja ne da niman jahtu ale gajetu, pasaru i slično leh niman ni prijateli ki ih imaju pa me nima ki ni zvat.

A sada malo o moru po komu te silne jahte plove i da se opet vrnemo na virusi i bakterije. Poveda kolegica kako kupači va Klenovice ne haju za zagađenje aš da kuliko oni vide dreki ne plavaju i se j’ čisto. Avah je mane, normalno da dreki ne plavaju, odnosno plavaju negdere na pučine aš kad bura zapuše, a zapuhala je i to fanjski, se z kraja riva dalje.

Tuliko ča se tiče dreki, a ča se tiče bakterije, e, da mi je upoznat onoga ki bakteriju more videt z golen okon, zajedno bin ga otela i jedina na svitu imela svoj putujući mikroskop. No, sakomu na volju i na veselje.

I za kraj, kako god da obrneš opet štorija okol dreki, odnosno onoga grdoga diha ki se još vavek širi po Dobrinjštine od kada je pasala nova kanalizacija. Od kada san čula da se uvodi fiksalizacija tuši po plažah, ono ti tušu daš dve kuni, on tebe ispostavi račun, se već mislin da j’ ta smrad zato aš, kako ta proces pretvorbe običnoga va fiskalizirani tuš dugo traje i puno košta, po plažah tuši ni, smrde ljudi, a ne kanalizacija. Bog nas očuvaj, jače san nema od onoga ki j’ odlučil fiskalizirat tuši.