Došlo j’ cepivo, a skupa šnjen i more pitanj, pa se tako moja roditeljica od jutra do sutra pita sakoga vraga, a najčešće da ili ne. Jedan sled mi ju je i žal aš ni lahko bit na takoveh mukah kod ča je ona.

Po cel božji dan nasliše radio, žbalji va televiziju i čuje sakakova mišljenja pa va času kad se konačno odluči poć cepit neka od, kako bi ona rekla – učeneh glav, reče da to baš i ni sigurno, da se to skupa ni dovoljno ispitano i ona j’ sopeta na početku priče.

I tako već nekoliko dan ona se brižna vrti va krug i nikako da zijde. Kod hrčak va gajbe. Čera kad je čula da se j’ prva va Lipoj Našoj cepila gospa Aničić, štićenica Doma za stareji va Zagrebu, rekla je – a, morda oni cepe najprvo stari za provu.

– Za kakovu provu, pitan ju sa va čudu.

– Znaš ono, ako mi stari preživimo to cepljenje, onput će ga dat i van mlajemi, odgovara ona.

O Majčice Božja od sedan žalosti i mane osme! Nisan mogla verovat to ča čujen.

– A, ča j’ z dohtori i z ostalen medicinsken osobljen ko isto cepe? Ča i na njimin će provevat, govorin ja.

– A ča? Pa moraju nekako zamaskirat šporkariju, bez mislet ga j’ ispalila još jednu bedastoću.

E, pas mater kurbu prasicu i pol, i va moju kuću ušla je teorija zavjere. Situacija j’ ozbiljna govorin samoj sebe i mislin – ča sad načinit, da njoj krenen objašnjavat kako govori z riti, a ne z glavine ale da ju počnen škercat. Naravno da j’ odluka pala na ovo drugo pa san njoj rekla:

– Mat, kad malo bolje promislin, imaš ti sto posto pravo. Tako je, cepe vas starije va prvomu šutu pa ki živ, ki mrtav. A dohtoron neće ni dat cepivo, leh će se pravit da su. I tako će z jednen cepivon ubit vagun muh – rasteretit će Zavod za mirovinsko osiguranje aš vas je va države već leh je delavci, ki će van nadavat penzij kuliko rabi.

Va Domimi za stareje ni već mesta pa će bit jedni na cimiter, drugi nutar. I va busen će bit već mesta! A cepivo će na vami testirat kod na onimi mišimi i delat će to se doklen ga ne uštimaju. Onput će ga tek dat mlajemi.

Gledala me j’ širon oprteh očij i zaprteh usti. A oda j’ leh rekla:

– Telice, odi mater ženit, nisan ti ja od čera.

– Tr znan da nisi, aš da si ne biš bila med onemi ki su dobili šansu za priliku da se prvi cepe i tako si spase život, odgovorila san njoj.

Sad će se ale ne cepit, još vavek je vela nepoznanica aš ma kuliko govorila da se j’ ona već dosti kruha najila i da j’ njoj z njejih 84 leta sasma sedno će partit danas ale jutra, nekako bi najveć volela da to jutra ne dojde tako brzo, ča j’ zdravo i normalno razmišljanje, a ovo se drugo su njeja bombardiranja i iskanja malo pažnje i ljudske topline, a ki će njoj je dat ako ne njeja jedina, omiljena hćer od rojenja zvana telica.

Tema od cepiva i cepljenja se j’ nastavila ma glavni lik ni već bila gospa mama leh šjor Capak. Najme, njoj nikako ni bilo ćaro zač su se si stali na zadnje nogi samo zato ča se j’ čovik posel na škatulu od cepiva.

Govori ona kako su ljudi prokletinje aš do kivo dan da njin je Capak bil narodni heroj, a sada da su ga proglasili kokošun ka misli da ako sede na cepiva da će se zleć još dvisto doz.

– More bit je čovik bil trudan, morda j’ bil tuliko kuntenat ča j’ cepivo došlo i do nas da mu se j’ od sriće zavrtelo…, broji ona i govori da jedino ča nju pojida je da Capak ne dobije upalu mehura aš da j’ čula kako ta vranić mora bit na -80 stupnji pa ni baš šegavo sedet na njemu.

Badava njoj je bilo tumačit da j’ cepivo va specijalnomu friđideru i da se ni šjor Capak posel va frižider leh na škatulu, ona j’ i dalje strahovala za urinarni trakt od šjor Capaka, spominjala čaj od brusnice aš da urološki i ni neš. Odustala san od bilo kakove rasprave i kako obično načinin prehitila se na vremenske priliki i nepriliki.

– Mat, čuj kako vane bura lipo šviketa, a na Platku i va Gorskomu kotaru da j’ i sneg pal. Moreš zamislet kako se sad spod Bakarca štrču oni janjčići od vali.

– Leh neka puše, morda ovu nesnagu od virusa odnese ća pa se niki neće morat cepit, odgovorila je.

Avah je mane…