Kuliko j’ sen onen ki na spomen maškar, karnevala i sličnoga gre hitat vanka, drago ča niš od toga ovoga pusnoga štajona ni, tuliko su, va veloj zablude. Aš ni oneh silneh maškaraneh nemotarij po domimi kulture va prigradu ale povorke va gradu, ma Pust je, i niki nan ga, ki ga volimo i komać čekamo, ne more zet.

Nisu ga ni zločesti ljudi, pa nan ga neće ni zločesti virus. To ča j’ ta isti virus nan maškaroljupcimi zel zaštitni znak, ča će reć masku, a ki nan je kriv kad sen verujemo i niš ne zaštitimo.

Šalu na stran aš jedna maska glavu čuva, a druga čuva tradiciju i zato me jako veseli ča su se maske vjerni ljudići domisleli kako užancu spasit, a nikoga boli izložit. Ča su načinili? Pa čujen da su konsolidirali redi i odlučili poć va tešku ilegalu i virusno vrime napadat sporadično, bez vele pompe pa ki zna zna, a ki ne ni ni trebel.

Gren od početka, od Tri kralji, blagdana kade Žejanci doškaju njihovo visočanstvo zvoneć tri krugi po mestu, a Munci ih isto takovun zvonjavun odbave na put ken su krenuli. I ovo leto se j’ bilo kako užanca propišuje, sneg je padal, selo j’ stalo zad poneštar, a zvona su zvonila.

Ma, neš prelipo. I Gromiški dondolaši su na Cipice svoje zvono klali tamo kamo mu j’ mesto, a Pusta su na pal zdignuli si oni ki to delaju prvu sobotu pokle spomenutoga blagdana. To ča se saki zove isto ale slično, a se vezano za Koronu, bilo j’ za očekivat aš se saki od nas češe tamo kade ga srbi, a ne leh nas već celi svit srbi i boli ta sakramenski virus.

Neki su Pusta dignuli z velen zakašnjenjen, ma su ga, a o razlozimi zač kasne, nisan se šla interesat. Oni ki pod masku gredu pokle sv. Antona zatulili su va rog, i ponavljan – ki j’ znal je znal, ki ni, ni ni trebel. Intanto j’ naš kraj maškaran.

Saku sobotu se, čujen, po celen prigradu, po kućah nahajaju maškaroni. Neki šiju kostimi, valjda da ne pozabe šit, neki gljedaju stare snimki i sliki, a neki leh povedaju i domišljaju se onoga ča j’ i kako bilo. A, si skupa se spravljaju da drugo leto Pust nadmaši se dosadašnje.

Na teh sastanki pod maskun rode se sakakove ideje pa sako malo negdere, a da ni ne sanjaš, dogodi se nekakovo pusno nemilo. Maškaroni su odgovorni ljudi pa se ovo o čen povedan se odvija va skladu z merami ke j’ propisal Stožer.

Si nose masku, nigdere ih ni već od 25 na oprtomu, a va zaprtomu su familje ke se i inače druže i nikomu niš ne javljaju, ni ne najavljuju.

Čera j’ recimo familja od Duleta, prvoga pusnoga čovika Opatije jušto va vrime va ko bi da j’ sriće, partila 38. balinjerada, uprizorilo njeju kraću verziju ale kako bi se po modernu reklo »trejler«, pa su se lipo na balinjerami spušćali od »Bristola« do Slatine.

Malo ih je poneslo pa su načinili dodatneh par điri, ča j’ bilo dosti da se skupi ljudi i urgiraju organi vlasti. Ma, saka čast Duletu i njegovoj ekipe aš ako moru sudci, studenti, Kerum i slični, ča ne bi mogli i pusni ljudi?

Tr, cicići od Barbari, misice opatijske Balinjeradi čak i saka ženska bi raje videla leh aerodrom za muhi od Keruma. O mušken da ni ne povedan.

I tako van to gre – Pust je šal va »tešku ilegalu«, ki j’ ulovil leh jedan sled užanci, zna o čemu povedan. O tomu da se ovo nabrojano, plus noćna zvonjava za ku znaju leh zvona i oni ki jih nose, a primjer su zvončari Frlanije i Brguda, dokažuju da korona more fermat čuda svita, ma ov maškarani ne.

Sen onen ki se, ča bi se reklo, spontano spravljaju na rečki Korzo, a, verujte, fanj ih je, želin lip i sunčan dan, z malo buričine da moru već popit, i bez policijoti. Sad bi vi rad znat, ki, kad, ča i slično.

Iskreno, niman pojma kad, ma znan neki ki misle, ma kakov bin ja dugoletnji novinar od maškar bila da izdajen rečeno va velomu povjerenju. Ono ča znan i moren z vamin podelit je da se neke karnevalske grupi parićuju za krug meston skuda su, a morda pokle svrnu i na Korzo.

Neki su se namerili leh poć na Korzo, a neki mudro muče aš nikomu već ne veruju. Bit će ča bude, ma leh neka bude va skladu z propisanemi merami aš, drugačje je to kraval, a ne karneval.

Ča se tiče ostatka Lipe naše, niš novoga i oni se drže užanci – hiti van stranke, zami nutar, ponudi, prisili, reci, premuči i slično. A ča se tiče moje materi, hvala na pitanju – dobro je. I ona se drži užanci – frituli mi na uši zihajaju, a da san telica, to j’ i za Pusta i zavavek.