Sedin, ča bi va Bosne rekli – nako i malo mislin kako pravde ni ni va životu, ni va smrte. Zač? Pa, kad umre neka »vela glava«, si povedaju, pišu in memorijami, ta se smrt klada na vela zvona, a kad umre nekakova »obična glava«, fini leh va osmrtnice i bog, adio. I badava ča j’ ta isti anonimus jednako, ako ne i više bil voljen od puno oneh o čigovoj se smrte poveda.

E, pa pravila su tu da bi se ruvinala pa ću ja lipo ov svoj kantunić posvetit Ivu, ki j’ va mojemu životu bil veći od najvećeg, poznateji od najpoznatejeg političara, dohtora, muzičara i slično. Ive se j’ rodil na Randiškoj Višnjevice kod drugi sin va familje Vilke i Branka Randića.

I celi svoj život proživel je na toj istoj Višnjevice. Utaknuli smo se davnoga 1964. leta, kada san ja imela tri meseca, a on 22 leta. Kade? A kade ako ne na Višnjevice! Užal je reć da mu se j’ na prvu zapijažal ta mići fagotić ki mu j’ zajedno pružil ruki da ga nosi. I nosil je sa ta leta, i mane i moj karakter za koga si znaju da ni baš lagahk.

Srićun ni ni njegov, pa j’ okolo nas bilo vavek veselo – praskalo j’ na se strani, a najveć po mojoj rite kad bin načinila neš ča ni rabilo, a to bi se dogodilo baren jedanput dnevno. Dakle, Ive j’ zaslužan i zato ča niman celulit.

Ive j’ finil va Novomu za tišjara, celi radni vijek delal je va »Dujmiću« va Bakru i si govore da j’ imel zlatne ruki. Ja san te ruki kako delaju gljedala celo svoje djetinjstvo. Obožavala san njegovu radionu, zvuk cirkulara i blanjalice, dih drva i njegova sovanja, onako sočna kako ih je leh on znal zmislet.

I dandanaska mi j’ on plosnati lapiš najdraži. Š njin san, od tri leta naučila pisat i mala, i vela slova. Ja, Ive me j’ naučil pisat. Naučil me je i kako gredu štajoni od leta, i kako se zove ki mesec.

To van je hodilo ovako – ja bin se došuljala va radionu, on bi me posel kraj morše i škola j’ mogla počet. Gospodična, maške slična si ti danaska gospodična Leto? Ja bin se počela smet i odgovorila – Ive, ki j’ pal z slive, ja san prinčipesa Zima.

Onput bi pital ki je mesec i zač ga tako zovemo, pa ki je dan, pa… I tako san ja zahvaljujuć njemu već od tri i pol leta znala i čitat, i pisat, a bome i sovat. Kad san imela šest let on i Stane, moj drugi sused su me prvi put na tanci otpeljali.

Domišljan se – va dom na Zlobin, poseli me na šank i bila san atrakcija. Slušali smo skupa Perija Koma, Elvisa, Bitlsi i slični. Užal mi je poć i va školu na informacije ako mat ale otac ne bi arivali. Tako da nikakovo čudo ča su va celomu kraju mnogi užali reć – to j’ ona mala z Višnjevice, mala od Iva.

Svojun je Maricun hodil leta i leta prvo leh su se oženili. Avah je mane, kuliko put bimo nas dva skupa šli Marice na rendes, tako da su nepoznati misleli da oni imaju dite letimi prvo leh su na svit došli najprvo Josip, a onda Dino.

Ako ste pomisleli da j’ Ive kad je dobil svoju decu mane malo olabavil lanac, aha, bonđorno. Se j’ bilo isto. Osim oca i materi, niki va momu životu ne bi preživel da mi j’ zdelil leh jedan posto od onoga ča bi mi on rekal na dnevnoj baze, a da ja ni ne trepnen.

Zadnji naš susret je zgljedal ovako – on sedi kraj poneštri i fuma, ja upadan va kuhinju i zijan – Ive, kade si. On odgovara – vrite, kade ću bit, a onput me pogljeda i govori – leta su, a pameti ni, ča si to od sebe načinila, zgljedaš kod on moj našušureni tić.

Nikada nisi i nikada pameti nećeš imet. Marica se lovi za glavu i pita – ma kako joj to moreš reć, a mi dva va isti glas – muč, Mare. A kad mi j’ jedanput rekal – saki drek danaska more bit novinar.

A kad san rekla da ću poć na doktorat me je pital, ma ča ti da ćeš bit dohtor? Molin te ne seri. Dohtori su morali finit medičinu, a ne ta tvoja slova. Onput san mu objasnila da postoje i dohtori od prava, zajika, dohtori od makin i slično, nač je on ležerno odgovoril – nisan ni znal da san ja dohtor od sena.

E, pa najdraži moj Ive, jedini dohtore od sena koga san upoznala, fala ti za se, za saku besedu ka j’ morda onomu ki te ni poznal zgljedala grubo, ma j’ va sebe nosila su ljubav ovoga svita. Za Višnjevicu se ne pojidaj, ću se ja i sad ću se pravit da nisan čula kako odgovaraš – toga me j’ i strah.