Ala, homo zajedno na najveću razinu, ča znači da ćemo se popačat va sam državni vrh. I ča reć osin, kako bi rekal moj već odavna pokojni sused – barba Zdravko, da od njeh seh skupa ne bi trebelo jaricu držat. Za pravo reć, moru se oni okolo načinjat kako govore i ov i on zajik, ma najbolje njin gre on blatni ale kaškin zajik, aš dočin opru usta leh drvlje i kamenje po onomu drugomu. I to na seh razinah. Karaju se kod nemi, a to ča jedni drugemi moru reć, mane j’ sran i napisat. A ako j’ mane sran onput znate da su besedi keh sikću fanj teške i grde. Kako doliči presjedniku, on va semu mora bit prvi pa tako i va ovoj štorije. Za priznat mi je da me on od seh njeh najveć puti i nasmeje aš tako lucidne ale pomaknute asocijacije kakove on ima, nima baš saki. Trenutno je sled, ma leh sled pušćal na miru premijera, a i on njega ma zato fasuje ministar obrani.

Ni da mu ministar ne prova vrnut, ma nekako se to skupa sliči na boj zmed diteta i profesionalnoga boksera. Ovaj riga oganj, a ov drugi mlati zajikon i namesto da zagasi, on ga raspiruje. Ča su se jedan drugomu rekli? A ča nisu i ki bi pobrojil se te uvredi. Z besedun diler su se obadva počastila, presjednik je rekal da j’ ministar diler državnom imovinom, a ministar da j’ beseda diler draga i presjedniku.
Kad su si razdilali tu uvredu na red su došle druge pa j’ presjednik ministru rekal da j’ maznul stan, ministar njemu da j’ na njegovu hvarsku rezidenciju potrošeno čuda solad. I tu j’ ministar pojil drek, kako bi se to va narodu reklo aš presjednik ni iskal nikakove preinaki, tu odluku je doneslo jušto ministrovo ministarstvo. E, da j’ na tomu stalo, ma ni aš je ministar dobil po sebe i po pitanju ukusa. Rečeno mu je da ukrasi ke j’ on kupil maknu prvo leh dojde presjednik aš da njin se ukusi ni va najvećen nemilu ne bi poklopili.

A sega j’ tu još bilo, sega j’ zrečeno, pa j’ Banožić pital premijera ono najčešće hrvasko pitanje – kade si bil 1991. leta, aludirajuć da j’ izbjegal vojnu obavezu. Milanović je pak njemu rekal da j’ skupljal Pokemoni dok su časnici ratovali. Pa j’ se finilo tako da j’ ministar rekal presjedniku da se uvrede ke mu upućuje »proizlaze iz borbe njegovih demona u glavi« i još mu je rekal da mu je mesto na psihijatriji, a ov mu je mrtav-hladan odgovoril kako on morda i je za psihijatriju, ma za šefa klinike. Sega vranića je tu još rečeno i zrečeno, trakavica se nastavlja, a ja, ja se smejen, mada j’ se to skupa najprvo za plakat.
Namesto da se bave z ljuden, oni se bave sobun.

Na, čitan da na području Rike i rečkoga prstena, kako to ima zapisano va evidencije rečki Centar za socijalnu skrb, od državne socijalne pomoći živeje 885 ljudi. Socijalna pomoć iznosi oko 800 kun mesečno. I ča se onda ja čudin ča mi va istomu danu dve matere z diteton dojdu prosit na vrata? Potresna j’ to slika, ona dvajsetak let, prelipa malica drži za ruku isto tako prelipoga malčića od kakove dve-tri leta i ne pita soldi leh pita pomoć. A, srce Isusovo, kako da ti ja pomoren ako ne soldimi, kad mane na šparhetu mačka spi, a onako pospana aš je bilo fanj rano jutro, nisan se domislela da j’ va špajze vagun voća i slatkoga aš moja mat mora imet slatko da njoj cukar ne bi pal i voće da njoj vitamini ne bi šli mater ženit. Dala san se ča san va takujinu imela, a onda san od materi dobila takovu zajikovu juhu da se još vavek nisan oporavila.

Rekla mi je da san nesnaga bez srca aš da ča jih nisan zvala va kuću pa ako niš drugo njin jaje ofrigala i hrenovki skuhala aš da tuliko umen, ča malomu nisan najlon napunila s cikulatami i bananami, ča ovo, ča ono. Badava j’ mane bilo govorit da san njin dala soldi pa da si moru sami kupit, aš ona j’ zajedno presikla – telice, od kuda ti znaš ako imaju na čemu skuhat, imaju letriki ale ča? Govorin njoj da se va ovo vrime koroni i nepoštenja nikoga nepoznatoga va kuću ne pušćeva, na ča mi je rekla – a, ča se bojiš, tr ti nimaju ča ukrast. E, tu mi j’ pukal film i san njoj odgovorila da mi moru nju ukrast ale zadet, a ona da j’ moje najveće bogatstvo. Leh je rekla – ala ne s…