A ča reć o ovomu užasu va Ukrajine? Ča god ja rekla nima nikakovog utjecaja ni na koga, a od sovanja nikakove koristi, zato ću mučat i kako vavek kad je neš grdo i kad neš ne moren promenit, poslušat tetu Irenu Zlobinskoga brda ka mi j’ odavno povedala jednu črnu, ma zaspraven prelipu štoriju.

Pogovarale smo se jedanput o nekadanjemu Zlobinu, Zlobinjarimi i življenju. Sada vidin tu sliku – nas dve za stolon, šparhet gori, a vane sneg pada, onako na tiho. Govori ona – znaš, bil je Drugi svjetski rat, ja san bila divojčica od kakoveh desetak, dvanajstak let.

Talijani su kapitulirali, došli su Njemci, a Zlobin i šuma puni partizanih. Klali su nas va obruč i jako puno našeh dečki je poginulo. Bilo j’ strašno aš je sako malo dohajal glas da j’ poginul ov, on… Silna mladost.

Si nikakovi sedeli smo pu moje teti i se j’ bilo jako tužno, i stari i mladi, si smo bili po tloh. Kad najedanput stane se moja teta, dojde do mane i govori – ala dušo, ćemo jedan valcer za pokojnog. I smo. Tako j’ povedala teta Irena, i tako me j’ navadila da kad je najteže ili tancan ili pjevan, a najprvo i jedno i drugo. Bože, kako su ti stari ljudi bili šegavi aš ča j’ bolje – cmizdrit ale tancat i pjevat?

Leh još ovo o Ukrajine i neću više. Najme, pita mane moja roditeljica – ma, kakova j’ sad sopeta ta krajina? Ma, ča j’ to? Ja njoj odgovaran – mama, ni krajina leh je Ukrajina. Pita me – je to dugo od nas? Malo mučin aš ča ću joj reć, ako rečen da ni imet ću kumediju, ako rečen da je jako dugo, lagat ću, pa odgovaran – a, ovisi, ako greš avionom je blzu, ako greš hodeć je dugo.

Zamislite niš mi grdo ni odgovorila mada san ja to očekivala i već se pripravila za uzvratni udarac. Rekla je – ja, ma nažalost se ča j’ dugo dojde blizo. I, moren van reć da mi j’ dala za mislet.

I onput san odlučila ne mislet leh hitit se na valcer i za živi, i za pokojni pa san se matere šla pohvalit da su me zvali va žiri od Maškaranoga klapskoga maratona. Naravno da j’ kod z topa izvalila – tebeee?

Pa ti nisi nikada do sada bila ni na jednomu. Rekla san njoj da se ima prvi put. Onput me j’ pitala je i žiri zamaškaran? Upsss! Ne znan, odgovaran ja. A ona će – a, ča te briga, tr tebe j’ jušto sedno.

Na prvu mi ni bilo ćaro ča mi j’ zaspraven s ten ča j’ rekla mislela reć, a onput mi se j’ žaruljica važgala. Sedno san pitala – pa kako to misliš? Onako kako mat pogljeda nemu hćer tako j’ ona mane pogljedala i rekla – stalno govoriš da su tebe maškari 365 dan va životu pa ča se ti imaš posebno maškarat za vrime pusta?

Tebe j’ to pod normalno. I tako san ja na Maškarani klapski maraton odlučila poć »pod normalno«, a ako me ki ča pita leh ću njin reć da san ja pri rođenju maškaron z kol pala. Ča bin ja da niman tako šegavu mater?

A leh da znate kako j’ ekološki osveštena. To van je čudo. Niki ne odvaja otpad z tulikun preciznosti s kun to ona dela. Mane se puno put vidi da ja leh vreći za smeti kupujen aš jedna mora bit za boci, druga mora bit za kruh, treta za sakidanji otpad, a po lete, kad ne kuri šparhet koda j’ ložač va paklu, mora bit za kartu.

Ako još k tomu dodan da moran imet i čvrstu vrećicu za popel, znate da mi j’ balkon kod Marišćina va malomu. Rekla san njoj već puno puti do sada da j’ ona va pasanomu življenju sto posto bila škovacin.

Ja, da j’ to se, ma ni aš smeti nosin ja pa prvo zgljeda da san ja ta škovacin, a ne ona. Njeje je da se nabanda na balkon i gljeda ako ja hitan saku vrećicu va svoju bajicu, a to »saku vrećicu va svoju bajicu« čujen ama baš saki put kad smeti v ruki zamen za poć odnest.

Jedanput je daž padal kod nem i gren ja zotemi smetimi va baju i po putu mislin kako ću jih se skupa žbrknut va onu prvu ma za ča ona bila, kad čujen z balkona, ne delaj toooo, to se ne sme!

I na kraju kad dojde račun za odvoz smeti jušto mi dojde da sama sebe hitin i to va onu za nerazvrstan otpad. Definitivno potpišujen da j’ moja tročlana familja najveći proizvođač smeti va ovomu delu svita.

A ča reć osin – ćemo jedan valcer za pokojnog?