Teško j’ za one ki su kod na metle pometeni, a med takove spadan i ja, preživet ovo doba pandemije i ostat zdrav va glave. Zdrav? Dobro, kuliko-tuliko zdrav. Nikamo ne moreš, z niken ne moreš, niš ne moreš, pa j’ veli nervoz.

Mat mi govori da ako ovo ovako potraje, će neka od nas dve finit va Lopače. Badava ča njoj tumačin da Lopača već dugo ni ono ča ona misli da je. Ona ima svoje i ne moren joj dopovedat. Tako njoj je Jelačićev trg još vavek Beogradski, za Erste banku koda nikada ni čula aš to j’ Riječka banka i šluz.

A va Partizanku me šalje da njoj kupin puci, kalceti za stare ženske i slično. Me par da ju j’ sad otpeljat va grad, ne bi tako brzo došla doma aš bi sto posto čekala bus tamo kade j’ stal pred trejsetak let i karala se sen okolo ki bi rekli da to ni njeja stanica.

A tek kada bi čula semafori ki tule, a tek videla žensku namesto muškoga na svitlu od semafora… Već sad me smeh lovi. Ma, ona se va grad ne da. Zaspraven odvavek je v Riku hodila leh kad njoj je bila vela potreba. I sopeta dohajamo do toga da pu nas dve ne vredi ona o jabuke, padanju i drvu. Ja san se jako dugo od njega odštrkala.

Odštrkala san se ja i od dana na ki je let i let ov kantunić zihajal. Od pundeljka. Zač? Zato, aš ne volin rutinu, pa ako ja ne moren putovat, more S kamika i mora. Ma niš ni dovjeka, pa neće ni ove meri.

Tr već su oni »ključni dva« popustili pa sad restorani moru delat i nutre, i vane, oštarije do jedanajst ur večer, i pekare isto. Mrtven zadnje boh i se more doć reć kuliko god će ljudi, živen na pir neš manje, a va crikav se more ovisno o kvadrature.

Ako ovakova situacija podura bit će i koncerti, i sega vranića. Ako niš drugo baren doklen traje turistička sezona, a za pokle ćemo videt. Ma, bolje j’ i ovako leh niš. Baš malo mislin na tu turističku sezonu. Ona ima veće moći leh ča ih ima najbolje cepivo. Dočin se približi korone, ova se počne trest i gljeda kamo će se skrit.

Oni ki gljedaju državni poticaji va zadnje vrime najveć gljedaju oni za kupit letrični auto. Najme, da kupnju letroautića država sufinancira z četrdeset posto. Ni to mala cifra, to j’ dobar vritnjak naprvo.

Jedan prijatel mi govori kako j’ za ozbiljno mislel poć va tu investiciju, ma da se j’ predomislel. Pitan ga ja zač, ča ga j’ obrnulo? A čovik govori – se j’ to super za oni ki bivaju va kuće, a kako ću ga ja, ki bivan na sedmomu katu nebodera punit?

Malo san stala i ostala aš ne govori čovik z trbuha. Zbilja kako će? Teh punionic je, ma ne dosti i ki će to čekat. Onput san dokončala kako rešit njegov problem i rekla mu da investira va produžni kabel.

Lipo ga prehiti preko balkona i puni kako ga je i kad ga je volja. Intanto smo se mi dobro nasmeli, a on da će na kraju kupit polovnoga klijića i počekat da se infrastruktura za letrični auti popravi.

Ki će i kako će popravit situaciju z radnikon va sezone, ne znan. Leh znan da kronično fali konobari i kuhari. Od Boga šteta ča ne umen kuhat, i ča iman dve leve za konobarit pa ne moren delat va fušu, inače bin se zajedno prijavila.

A ja, ni se ča čudit – ljudi su va pandemije ka j’ zaprla oštarije, restorani, odgodila piri i zabavi, morali načinit prekvalifikaciju i poć trbuhon za kruhon. Neki na bauštelu, neki simo, neki tamo, a nas će ovu sezonu dvorit, i kuhat nan neki tuji ljudi, kemin smo mi bauštela.

Jedine industrije za keh ja znan da nisu zgubile niš va vrimenu od koroni su ona od medičini i ona od pulitiki. Tamo ni nikomu ni vlas z glave pala. Još su i krešili. A, ja to van je kod va ratu, kad je rat nekomu rat, a nekomu brat, kako bi to užala reć nona.

O pulitike ne smen aš je izborno mučanje, ko, kada san ga već spomenula, mišljenja san nima apsolutno nikakovoga smisla. Zač? Zato aš mediji muče, ma ne i društvene mreži, a me par da jedino još moja mat nima profil na fejsu, istangramu, tviteru, tiktoku i ča ti ja znan na čemu se.

Kad malo bolje promislin, more bit san ja bedasta. More bit ga ima i to kod i mnogi pod nekakoven zmišljenen imenon pa se ono grdo ča mi spod teksta napišu, zaspraven je njejih ruku delo.

Ona j’ ta hejter ki mi se po spisku od stoljeća sedmoga do sada i ubuduće. Zamislite vi malo šegavicu, našla j’ način kako da mi reče, a da njoj ne odgovorin. Šalu na stran, jutra si na zibiranje da ne bi bilo pokle – pas mater kurbu prasicu i pol ovomu i onomu…