Ja možda jesam za psihijatriju, ali za predsjednika klinike, rekal je ki’vo dan naš presjednik države, a ja san se istoga časa poistovjetila š njin. Kamo god da se obrnen, okol mane psihijatrija. Najprvo ću z kućnun aš ona najduže traje. Za ko ćemo leto, ako Bog da, obilježit šeždesetu obljetnicu od osnutka. Dura od kad san se rodila. Najme, ov put je šizenje okol telefona pa ki god ima namjeru zvat bilo koga od nas doma na kućni telefon, bolje mu je da ni ne prova aš mu se sigurno niki neće javit.

Paron zato aš već let ni ne zna da postoji, on je fanatik tehnike pa će mu još malo i mobitel bit prastara sprava, ja zato aš znan da mane na kućni telefon niki već stoljećima ne išće, a mat zato aš se boji da ju zove Teta J, naša dohtoresa z namjerun da ju pita misli li i ako misli kad bi došla cepit se. Bog dal zdravlja Tete J i onomu ki j’ zmislel to da se zovu oni stareji od 65 i da jih se pita za cepljenje aš od kada j’ to došlo vanka mat je mirna kod bubica. Dočin zazvoni kućni, a ja zazijan – sigurno j’ to Teta J, ni ju čut naredneh baren dve uri. Mislela san da ju niš va životu ne more ostrašit kod grmljavina, kad ono jači strah od toga je zvono od telefona. Sad mi j’ konačno ćaro da san od nje potegnula on gen – glavu va pesak, a okolo riti ča bude.

Kad telefon muči, onput se svadi z televizijun. Berošu, Capaku i kumpanije sakoga vranića zdeli tako da bi njin bilo bolje da nju va Stožer zamu aš ona ume sakomu se reć, osim sebe. I dalje tvrdi da se cepe leh pasi, a kad njoj ja, ča bi se reklo, podastren statistiku od bolneh i umrleh, leh odmahne z rukun i reče – tr od nečesa se mora umret. Rekal bi moj pokojni sused – tvrdoglavo kroz prazji rog. Sad već ni ribu po petku neće da ji aš da ča će njoj ki i ki će njoj ča tumačit i urdinat ča će ona jist. Ako njoj se riba ji, ist će ju saki dan, a ne kada neki reče. Ča ćemo, takova je kakova je, ma moja je. Intanto, šnjun nikada ni dosadno.

Kad projden z odjela kućne psihijatrije dojden na odjel radne. Tamo su isto si nemi kod kapuz. Morete zamislet kako va ovemi kovid bespućimi zgljeda kad dvajsetak ljudi sedi va jednoj prostorije. Istina, prostorija j’ veličine nogometnoga igrališta i to onoga z pravemi gabaritimi i ispoštovane su se meri vezane za pandemiju, od distance ku neki spram nekeh imaju i prez koroni do obaveznoga merenja febri prvo leh z noson stupiš na delo. A kad stupiš, to van ovako zgljeda – jedna bi oprla se poneštri aš se prostorija mora zračit, druga bi se trdo zaprla aš s tun koronun nikad ne znaš od kuda dohaja. Jedan, me par, i spi z maskun pa zija na sakoga ki ju j’, ne znel leh spušćal spod nosa, jedna dohaja z rukavicami i maskun, a mišljenja san da bi najraje došla va onomu va ča su obučeni dohtori i sestre na kovid odjelu, pa škuru gljeda va seh nas ki smo malo manje zamaskirani.

Tajnica od redakcije dočin neki kihne ale nedaj Bog zakašlje zajedno dobije koronu, tako da j’ naša Davorčica apsolutni rekorder po tomu kuliko put ju je imela. Najme, ima ju saki dan i to više puti. Evo na, doklen ovo pišen ona pohaja od stola do stola i pita ki j’ cepljen, kada, kuliko puti i slično. Prvo toga je pozivala se one ki ne dohajaju saki dan va redakciju i pitala to isto, da bi na kraju, finjena od silnoga ponavljanja zazijala – sih bum vas cepila! Vranić me zel ako i neće aš kad ta neš naumi, to i ostvari.

I za kraj – ulični odjel psihijatrije. Ki’vo dan gren va butigu i dojden na kasu. Na kase jedna ženskica, naizgled za skroz normalna. Lipo mi se nasmeje i govori kako se dugo nismo videle. Mane niš ćaro aš, verujte već na prvi pogled mi je bilo jasno kako ja tu dotičnu gospu nikada nisan videla, ma si mislin – a, morda san ja senilna i bambinita, ženskica ima masku, more bit se i poznamo. I sada, da ne bin ispala bezobrazna i umišljena, i ja se njoj nasmejen. Ona pak govori da me već dugo ni videla, još od vrimena od kada su ju premestili z jedne butige va drugu. Ja va toj prvoj butige nikada nisan bila, ali je va nju dohajala moja prijatelica, a nas dve čuda ljudi uža zamenit. To san njoj i rekla. Ona j’ leh slegnula z rameni, ja san platila, prohajan i čujen – Bože, ova je prolupala, ne zna ni ko je.

O, da ti pas mater kurbu prasicu i pol!