Pratin ovu euforiju okolo novog stadiona na Kantride. Projekt neću komentirat, to neka store stručnjaci. Razumen i da se Rečani vesele novon stadionu. Rike valjad rabi neč takovo, kot ča joj je rabil i novi bazen. I nova sporcka dvorana i tako dalje. Ono ča bin osobno volela doživet je i vela euforija okolo nekog velog projekta va kulture ali obrazovanju. Volela bin va foljimi čitat i o ten da j’ Rika dobila najbolji i najsuvremeniji špital va Hrvackoj. Bilo bi lipo na naslovnicami finalmente videt i da j’ bivši »Benčić« postal najlipši kulturni kompleks na Jadranu.

   Volela bin doškat taj moment kad će Gracka knjižnica Rika storit judski lanac od Korza do »Benčića« ki će z ruki va ruku prenašat libri z stare va novu biblioteku. Ne moren doškat ni trenutak kad će va kompleksu »Benčić« zaživet novi Muzej grada Rike i Muzej moderne i suvremene umjetnosti. Rika j’ zaslužila i magari još jedan teatar i dečje kazalište. Ti problemi ne bi trebala rešavat Europska prestolnica kulturi. To su problemi ki duraju leta i leta i već su odavno trebali bit rešeni. Sad si čekaju ćemo dobit kandidaturu za EPK i soldi z Europske unije pa da se neč stori. A leta i leta si ti projekti stoje kot mrtva črknja na harte, z ten da su već silni soldi hićeni va vetar.

   Kultura j’ v Rike i dalje na čekanju, a stadion na Kantride već je, mi se para, realna budućnost. Neč se dela i po pitanju »Benčića«, ma nikako ni za videt ni najmanji konkretan rezultat. Da se sa ova silna leta sako leto popiturala i sredila jedna prostorija morda bi tamo već neč bilo va funkcije. Najnovija vest je da j’ postupak javne nabavi za izradu glavnih projekata rekonstrukcije T-građevine, ciglene zgrade te podzemne garaži i uređenja javnih površina unutar bivšeg industrijskog kompleksa »Rikard Benčić« priveden kraju. Va prvoj faze od 2013. do 2014. leta bila j’ najavljena rekonstrukcija T-objekta i ciglene zgradi, va 2015. i 2016. rabilo bi preselit MMSU, dok bi rekonstrukciju Palače Šećerane trebalo finit 2017. i 2018. leta. Novi stadion na Kantride trebal bi bit storen do sredine 2016. leta. Sad nan je za videt ki će bit prvi – nogomet ali kultura, stadion ali »Benčić«? Bilo bi lipo da zaživeje i jedno i drugo, ma mi se para da sport vavik projde nekako bolje, magari kad je Rika va pitanju