Ne znan kako van, ma mane se se češće i češće čini kako san prošla na ocat. Si povedaju o ten sniženjimi, reklame su va semi medijimi, a kad dojden va butigu mane j’ se to za smet se. Zaspraven, bi najprvo bilo za plakat, ma lagje se j’ smet. Kakova sakramenska sniženja? Ča god v ruki da ćapaš ni spod deset kun. Govore da j’ inflacija. A ča će tek bit? Jadna nan palenta i to ako i za nju budemo imeli. Još kada te kune prehite va euri, e, onput ćemo tek znat ča j’ inflacija. Jedino ča va celoj štorije veseli je to da će si oni kemin je špariljnjak šetokalac ale kušinelnica, a pozabljivi su, moć transakciju načinit kada god. Mislin neće bit kod ono nekada kad su ljudimi propali silni soldi aš su pozabili kamo su jih zagnjeli, a kad su jih našli lipo su š njimin mogli rit otrt. Ma ni to. Kad smo već pu soldi i transakcij mane to baš jako ne pojida aš niman ča va ča prehitit, kod ni pozabit. Kako mi j’ jedanput rekal Mile z Bakra – ti si mala z velen mišon načinjena, i da imaš tvornicu solad, ti biš bankrotirala. A ča – nismo si za se.

Da ne bi bilo da leh skucan, povedat ću van kako san ki’vo večer mislela o broju stanovniki va gradu Bakru. Zač? Pa zato aš se z ovemi radovimi okol kanalizacije saken danom ta broj povećuje. Kade god da zakopaju najdu nekakovoga staroga Rimljana. To j’ grad spod grada. Kreši i broj straneh delavci kako va našoj županije tako i va celoj Hrvackoj. Na, čitan da smo uvezli, aš ne znan kako to drugačje reć, okol sto tisuć delavci, a med njimin da j’ se već i već oneh z Nepala i oneh z Indiji. Naslišan ljudi okol sebe i kako i vavek – nekimi je to super, a neki njurgaju. A ča reć, osin da saki čovik na ovomu planetu ima pravo na delo. Nas je z leta va leto se manje, a neki mora delat. Bog da smo jih našli. Migracije su odvavek postojale i postojat će. Da naša mladost ni migrirala va Irsku, Njemačku i se te bogateje zemlji, Nepalci i Indijci ne bi imeli ča iskat va Hrvackoj aš ne bi bilo dela, ovako sen dobro. Ki’vo dan san šla va jedan od mnogeh rečkeh prodajneh centri i pitan jednu simpatičnu gospu ka j’ slagala robu po policah da kade je dječja hrana. Ona me sirota va čudu gljeda i na nekomu, mane nedefiniranom zajiku proveva reć da ne razume. Na kraju je leh zdigla ramena pa san shvatila ča mi govori. Onput san ja rekla – čokolino, a ona se nasmela i z rukun pukazala smjer va komu moran poć. Pokle san doznala da j’ ženska z Gruzije. Sigurno njoj ni lahko, ma glad ne pita. Uglavnon, kad malo bolje promislin po teh trgovačkeh centri najveć delaju penzioneri ale studenti – srednja generacija koda ni ne postoji. Će bit da broj stanovniki va Hrvackoj pada, a va dijaspore raste. I ki j’ zato kriv? A puno j’ krivci, ma ča j’ bolje povedat.

On ki j’ došal z rehabilitacije, odnosno s toplic na suđenje zajedno j’ rekal da ni kriv pa se sad more i vrnut rehabilitirat. Oni ki sede va Saboru, neće sedet se do pol devetoga meseca. Imaju produženi odmor. Neka imaju – zaslužili su to, a i si skupa ćemo pošparat struju aš klime neće imet za koga delat. Sad leh čekan da krenu sliki po društveneh mrežah pa da vidimo ki s ken, ki kade, ki na čigovoj jahte, ki va kakoveh kupaćeh mudanticah i slično. Ja, narod takove stvari vesele i rad bi znat. Ono ča zaspraven nikad niki neće znat je odgovor na pitanje ko glasi – zna li od presjednika sin matematiku i latinski za četiri ale za pet. Intanto, mane j’ ta afera prozvana »daj pet« nasmela do suz. Zamislela san sebe va njegovoj dobe i va njegovoj situacije, a ono ča nikako nisan, ma kuliko bogatu maštu imela, a iman ju, mogla zamislet je svoju mater kako nit piše, nit gre va školu iskat veću ocjenu aš njeja hćer sigurno zna za pet. Njeja hćer da je došla doma i njurgala kako su njoj va škole dali manje leh zasluži, zaslužila bi takov oklepuh ki bi se čul do Praputnjaka. Ja, ma to su bila druga vrimena kada se j’ znalo ki j’ školan, ki učitelj, a ki plovan.

Leh još da pozdravin gospu Dušanku ka me j’ dala preko gospe Ivanke z porte pozdravit i za ov put ću klast točku i poželet sen nan ča manje toplinskeh vali, i ča više smeha aš još jedino je smeh besplatan lek.