Ala, gremo se i mi sučelit! Ni da nan se da, ma trebe bit va trendu. Mi ćemo se sučelit z istinun. Nećemo nikomu niš obećat, a najmanje sebe aš čovik samoga sebe najlagje prehiti. Intanto, ča? Teplo j’ za ponemet, korona ne voli teplo, a voli turisti pa su i oni grdi broji postali malo manje grdi. Političaron z ust teče leh med, mleko i najprvo bedastoći, a bilo naroda, ako ćemo gljedat te silne predizborne anketi, leh ča ni puklo. Saka anketa ima svoji rezultati, pa ako greš računat i zračunavat, saki od kandidati za gradonačelnika ale župana, ne abadamo sad je Rika ale ki drugi grad ale županija Lipe naše, ima jednake šansi da osvoji, tu, tuliko slatku vlast. Je, za istinu reć, postoji tu i tamo nekakov luzer, ma sake igri imaju i maskoti, a pulitičke još i višje. Kako se luzer reče po domaći? On ki j’ rojen da gubi, ale on, ki j’ zato ča je šegaveji od drugeh se hita na valcer i sasma mu je sedno da gubi ale dobiva, glavno da se zabavi? More bit i onaj ki od silnoga sebe, ne vidi drugi? Ću si malo dat dela pa pitat šegaveje od sebe i drugi put van povedat. Ako ne pozabin.

Za reć istinu, malo mi se si ti ljudići ki su va kampanje, sled i smile. Zač? A zato aš se protežu i rastežu već od sakoga lastika. Otpiraju i ovo, i ono, kuhaju za ovi ale oni, slave z oven ale onen, tiskovnu sazivaju i ako j’ neki, oprostite mi reć – jače prdnul, slikevaju se i naslikevaju, snimaju i nasnimavaju, tancaju, kantaju, zijaju, jedan drugomu grdoga govore, a zač? Se za naše bolje jutra. Ale njihovo? Ale za bolje jutra sen skupa? Ne znan, leh znan da njin ne bin rad va kože bila. Kad san ki’vo dan va redakcije rekla da mane se to skupa sliči na izbor za mis ale mistera, su se smeli, a ja san bila skrozin ozbiljna. Razlika je ča ovi ne govore – it’s okej, leh naše je »it’s okej« i ča ne paradiraju va kupaćemi kostimi. Barene još ne, ma za ko leto, ki zna. Tr se j’ već i ova kampanja preselila na fejzbuki, instagrami, jutjubi, tiktoki i se te društvene platformi, pa zač na idućen izborih ne bi dobil on ki ima najbolji influenserski rejting. I za se ove besedi ke san napisala, pitat ću šegaveje od sebe kako bi jih na čakavski rekli. Pa ću van i to povedat.
Ono ča znan i ča ću van zajedno reć je da mi se, ma ča konzervatori povedali i misleli, već pijaža on zid na Školjiću pokle Armadi leh prvo Armadi. Nisan sportski tip, osin ako j’ natjecanje va mlaćenju prazne slami i lamatanju zajičinun. Nisan navijačica Rike leh Orijenta, nisan se zapisala nikada nikamo, a najmanje va Armadu ale Red Fakersi. I nisan infišana va te silne navijačke poruki po gradu, ma mi ne pače.

Ne mislin da šundrevaju okolinu, i vavek mi je draže videt Armadinu zidnu umjetnost, a o onoj od Orijenta ki imaju i glagoljicu, i čakavicu va sebe da ni ne govorin, leh ono »ubi ovoga, važgaj onoga, Ana kurbo…« i slično.

Ča, va ten Armadinen uratkon ima loše? I kakovo j’ zlo želet povezat grafit spod izvora Rečine, on na Trnovice, z jednin na Delte, parsto metri prvo leh Rečina postane more? Za zbilja, ča j’ lipje gljedat va on sivi, grdi zid ale va neš čigove boje govore va komu si gradu, a tekst ono ča saki pravi Riječanin, on z Reke, on z Rike ale Fiuman ćuti – volin grad koji teče. Istina Bog, mane bi bilo puno oku lipje i srcu mileje da piše – volin grad ki teče, ma nisan lokalfašist (Bože, ka grda beseda) i odvavek govorin kako j’ lipo da va vrtu cveta hiljadu cveti. I nemojte mislet da ne razumen i konzervatori. To su ljudi ki delaju svoje delo i drže se svojeh regul.

Nikomu ja niš ne zameran, ma, opet van govorin, da iznimki potvrjuju pravila, i da kad vidiš na zidu piše »piška«, ne reš delat ono ča ne rabi.

I za kraj leh malo o cepljenju. Čera san bila iskat tetu ka se j’ šla, kako bi to ona rekla – malo docepit, va dvoranu na Zametu. To mi j’ od materi sestra. Ja, od one iste materi ka govori da se leh pasi cepe, pa neka mi sad neki reče o sličnoste va familje. Dakle, moja teta j’ šla, došla i posela se. Onput je došal, kako bi ona rekla – šesan mladić i pita ju da ako j’ imela kakovih nus pojav pokle prvoga cepljenja. I ona njemu nabraja i temperaturu i črljeno, i oteklinu, i govori da j’ se rekla svojoj dohtorice. On, spravlja tu špricu, i govori – gospođo, nadam se da će ovaj puta biti bolje. A ona njemu drito – nego ča nego da će, dočin je muško, zna kako će ubost. Smeli su se si, a ja san zaključila da me j’ rodila teta, a ne mat.