Ča greste va Kopenhagen? Jušto to me j’ čera pitala jedna kurioža baba ka j’ huja leh je presretač od policijoti aš me saki drugi dan ćapa doklen gren od dela do auta koga parkiran spod njeje poneštri.

Najprvo mi ni bilo ćaro ča sad Kopenhagen, ča j’ skrozin za skroz odlepila, a onput mi j’ došlo z riti va glavu da poveda o nogometu i utaknice ku naši pundeljak igraju. Gospa ima prvo 80 leh 70 let, onu, ča smo prvo zvali – trajnu ondulaciju, dioptriju od kakoveh plus šest ma me sedno vidi, a me par da čuje i kada na Trsatu ki kihne.

Rekla san njoj da kuliko soldi iman moren lipo poć vrit, a i da iman da bin jih vjerojatno potrošila na neš pamatneje.

Ni bila zadovoljna z odgovoron aš po njeju on ki ne voli nogomet ni normalan, da ne rečen ča huje. Tambaškala j’ još malo okolo teh našeh dečki kemin rabi saka pomoć da pobijede i da će se ona lipo obuć va dres i spred televizije navijat.

Pitala san ju da ako j’ šla platit mašu, a ona j’ leh frknula z noson i rekla da se to ne more onlajn, a staren ljuden se ne preporuča po tepline hodit vanka. Srce Isusovo, pa ona j’ informatički pismeneja leh san ja! Intanto sada i ja z nestrpljenjen čekan ta susret nas i Španjolci, a za iskreno povedat da mi ona ni rekla z ken igramo, ne bin znala. Ovako, znan i već leh mi rabi.

Ono ča isto ne bin otela znat ma ne more čovik zabost nos va pesak i pravit se da je noj, je to da nan pokle par dan mira ta sakramenska korona dela opet problemi. Nisu sada ti broji neš strašno, ma dočin kreše, mane j’ već slabo.

Ufan se da će on Vilijev bus ki pohaja od sela do sela i cepi donest neki rezultati, a seh oneh ki su ki’vo dan na zagrebačkemu Velesajmu načinili kažin i velu gnjetu aš njin je najedanput došlo da se cepe, e njih bin pitala – a, kade ste do sada bili?

Ča se j’ va glave promenilo da j’ sad najedanput vela preša? Si znamo ča je – vrime je od ferij i si bi na more ale kamo drugamo, a za poć rabi imet črno na belo da si cepljen.

Godišnji imaju i kućni ljubimci. To san pak videla na televizije, a kada j’ moja mat čula da se va nekomu od hoteli za maški i pasi za pušćat ljubimca plaća od sto kun na već po danu, prekrižila se je i z levun i z desnun.

Njoj nikako ni ćarao da j’ ljetovanje za čovika jeftineje leh je za blago.

I gljeda ona tako ta prilog, usta širon oprta, ni da bi zatreptala, a oni povedaju o dnevnomu boravku za ljubimci, o televizije na koj se vrte programi za mačke ale pasi, o videonadzoru i slično, a kada j’ čula da on ki pušća ljubimca va hotelu more va saken trenu videt ča mu ta ljubimac dela, e tu njoj je prekipelo, pa j’ rekla – ni nikakovo čudo ča j’ došla ta korona, pa ov svit ni normalan.

Ta drugi dan će bit i hotel za kravi i konji, za kokoše i ča ja znan ča. Uostalon, ča su jih pušćali i silni soldi daju za smještaj kada ih stalno kontrolaju? Kakove su to ferije ni za jedne, ni za druge.

Tu večer se je jako ofendila na televiziju i stalno se j’ š njun svadila tako da san ja bila na miru. Va mir, me par su se klali i neki od novozibraneh načelniki i gradonačelniki aš kako iman čut i videt na većinu dogajanj šalju svoji zamjeniki.

Jušto mi je sedno, ma ne moren ne primjetit. Kod ča nisan mogla neprimjetit lesicu ka j’ lipo z nogi na nogu prehajala cestu i finila va Hiltonu. Kuliko ja znan, em hotel još vavek ni oprt, em hotel ni za blago, pa kamo ju vranić nosi?

Leh da po srede ni industrijska špijunaža, ki zna za koga lesica dela. Znate kako to već gre z ten teorijami urote. Ako niste znali, ovo ča more cveta to su nan Talijani krivi aš su nan ta cvet porivali svoga na naš kraj.

Jušto tako j’ to protumačila ona gospa z početka teksta. Kad san ju pitala da ča su si došli na obalu i puhali va cvet pa su ga tako dorivali ale su ga morda do teritorijalneh vod z brodi dopeljali i onput pušćali va more, rekla mi je da san ja mlada i da ja ne znan na ča su Talijani se spremni.

Bilo j’ teplo i ni mi se već dalo matačit okol Talijani pa san mučala, ma ni ona.

– Ljuden ki jidu mački, ne moreš verovat, rekla je, a ja san brzo sela va auto i šla doma. A doma me j’ čekala jedna slična gospa. Avah je mane. Sakomu prama zaslugami.