Najprvo da zafalin sen onen ki su reagirali na zadnji »S kamika i mora«, pa nazivali i pozivali pitajuć kako pomoć gospe Marele, sad va penzije, ma dugoletnjoj novinarke Radio Petrinje, koj je potres zel se osim smeha. Zubnu protezu j’ načinila pa se sopeta more smet da njoj se zubi vide, frizuru ima, a ako dragi Bog da, pokle drugog kruga cepljenja morda će se i vrnut va svoju najdražu Petrinju. Okol toga još ni niš sigurno, ma kako bi moj prijatel fra Pucko rekal – molimo se. I ki ume i ki ne ume. Zaspraven si umemo aš saki se moli na svoj način i komu ga j’ volja.

Recimo, primjera radi, mojoj matere ka puno puti dočin se stane uvredi ne jednoga nebesnika leh celo nebo, najdraža j’ Majka Božja Trsaška, a kad ja, ka se va nebo nikada ne pačan rečen da su mi nekako najveć srcu prirasli sv. Tri kralji leh obrne noson i reče – to j’ zato aš najavljuju tvoju dobu. Misli na maškari. I ni va pravu aš, ki god me pozna zna da su mane maškari 365 dan va letu. Tr, dosti me j’ videt. Tri kralji volin aš pohajaju s ciljen, a zaspraven reć – volela san kod mića naslišat štoriju od njih, a i pjevat onu »Tri kralji jahahu…«. Jedanput san, a Božić ju pomiluj da jedanput, va veli sram hitila svoju tetu Vilku ka j’ va mojemu djetinjstvu bila zadužena za moj duhovni život aš san ju pred prijatelicami pitala da ča su Tri kralji kauboji. Imela san ja još puno biseri, ma bolje j’ se j’ ne sramotit.

Intanto san od mićeh nog bila kurioža baba. I dandanas san, pa čujete malo kako san se čera odbavila va butigu z materinun listun zvanun »kupi ovo i ono, a ako san ča pozabila ti ćeš bit kriva«, a finila va pravoj mećave od snega. Za se j’ kriv onisti ki j’ na RI meteo ale neš slično napisal da na Krasice tako jako puše da j’ jednomu ženu vrnulo. Ma, ča, ma kade, ma komu… I lipo da namesto zijden zaobilaznice ja san paronu rekla vozi na Krasicu, ma preko Hreljina. Brižan, da bi besedu rekal, bilo ča pital leh je bilo »sempre drito«. A tr ako neki zna s ken ima posla, to j’ on. Hitalo nas je po obilaznice, padalo j’ koda ni od stoljeća sedmoga, a mi va potrage za onen komu j’ buričina ženu vrnula. Tuliko j’ puhalo da san pomislela kako su si muži z Krasice dobili nazad one ke su njin prošle. Onput san se domislela na cimiter i zajedno mi j’ rabila čaša z cukrenun vodun aš moren mislet ki kažin je tamo. Došla san na se kad san dokončala da iman Koku ki mi, hvala mu, prekriži pokojnoga oca i poredi dar-mar dočin vidi da rabi. A često rabi. Fala i sen drugen ki va teh sedan dan kuliko mi pasa od jednoga do drugoga posjeta cimiteru drže se pod kontrolun.

Sad ako ste i vi kurijoži pitat ćete se zač na Krasicu preko Hreljina. A zač ne? Volin ja obać celi svoj zavičaj i ne rabi mi niki reć da ako j’ na Krasice takova šoprnada da j’ Hreljin blizu smaka svita, a o Zlobinu da ni ne povedamo.

Brižan moj Alenić, morat te kokošan šetokalci plest. Ću mu pomoć, pa ćemo nekako. Srića da nimaju četire nogi. Kako san i mislela, tako j’ i bilo. Na Hreljinu, po ceste sneg, po kroveh, po ravnicah, a Zastenice i Ružić selo ni bilo ni videt. Zajedno san se stresla aš san se domislela na si oni dani kada bin va školu na Hreljin jutron došla z buson, a onda okol ure busi već ne bi vozili pa bi bilo put pod nogi. Ma, saki taj »put pod nogi« imel je i svoju draž. I cupanje, i litratanje ale slikanje va snegu i moja brižna rit ka bi platila kad bi mokra došla doma. Leh da znate i na Praputnjaku j’ bilo belo, a na mojoj Višnjevice skrivenoj va jednomu velomu snežnomu oblaku, va komu, sigurna san sede si moji Višnjevari keh već ni i posipaju pahuljice da bin se ja veselila aš su videli da nisan neš va zadnje vrime – idila. Bela idila. Nisan se svrnula aš znan da bin tamo i ustala, ma san ju va srce pospravila i odnesla va ovo grdo, turobno vrime.

Ne znan zač smiron mislim da su se oni na Ibleru sigurno ćutili baš kod onaj čovičić z Krasice komu j’ vrnulo ženu. A ča ćeš ako ne umeš osluhnut narod onput ti bura na privrat donese se ono ča nisi otel ni čut, ni videt.