Naša Marija od lepeh i dobreh besed. Ke je slagala va prozu i va versi. I su vehtale te besedi njije, plahutale ponad Opatije, s nami, mej semi nami. I otpirale su našo vredno mesto va hrvatskoj književnoste. Pred manun je njija knjiga »Kantunić ot mizerije« va koj su pospravne sličice od siromašćini. Od sakakoveh sorat siromašćini. Od one kad čovek ostane prez soldi, prez zdravja, prez moći, prez jubavi. Nahajala ih je išćuć po svojoj Opatije, gledajuć va njiji judi i okol njih, va bližoj i dalnjoj susešćine. Kadagod je prekrajajuć novitadi, kadagod išćuć ona dešpetjiva zrnca radi keh su juden srca bila vesela, veselo se smela. Magar i ni bilo za smet se. Aš vremena su vavek bila takova. Od seh sorat mizerije.

Čitan neke štorijice s knjigi i spametin se da san ih pročitala i va Besede Novoga lista.

Knjigu je tiskala Ustanova »Ivan Matetić Ronjgov« z Ronjgi 2025. leta. I pripravjali smo se promovirat je. Ale se je drugačje doprišlo. Namesto smeha i veselja pul Ronjgi, tuga i žalost na cimitere v Opatije.

Marija Trinajstić je rojena 1944. leta v Opatije. Va školu je hodila v Opatije, a v Reke Ekonomski fakultet. Se do penzije delala je v Reke va Brodokomerce kako propagandistica. Va dele se je nahajala z drugemi kolegami, posebno s kolegicami, bilo da su zaduženi proizvodi prodavale va našoj županije, bilo da su putovale po soj ondašnjoj Jugoslavije. Od Vardara pa do Triglava, zaspraven. Doma su njin ostajala deca i familije, nekemu drugemu na brige. A svoje brigi su sobun vukle teže nego se valiži.

Marija je dobivala nagradi za svojo stručno delo.

Ale najviše smo je spoznali kako pjesnikinju, prozaisticu. Bila je urednica, antologičarka, kritičarka, recenzentica. Više od pedeset let je delala na afirmacije i vrednovanjen čakavskega zajika. Posebno svojga opatijskega. Kako jedna od urednica va ondašnjen Domete urejevala je 1969. leta, skupa z drugemi autori, antologiju čakavskeh versi »Korablja začinjavca«.

Od samega početka Čakavskega sabora va Žminje sudjelovala je va različiteh kulturneh događajeh. Pak je tako i v Opatije 1970. leta osnovana prva Katedra za književnost i kulturu Čakavskega sabora. I bila je prva tajnica. Organizirala je simpozije, suurejevala va prveh brojeh »Liburnijskih tema«. Pak je i suradnica od samega osnutka današnje Ustanove u kulturi »Ivan Matetić Ronjgov«. I tamo su se redala izdanja pod njijen kritičnen lapišon.

Pjesmi, prozu, recenzije, kritiki objavjevala je po brojneh novinah i časopiseh. To su bili Dometi, Kolo, Mogućnosti, Republika, Telegram, Most, Polet, Studentski list, Kaj, Književna Rijeka, Vjesnik, Novi list. Zastupljena je va izdanjeh »Pul Matetićevega ognjišća«, »Javorika opatijska«, »Verši na šterni«, »Kad vruja zavruja«, »Puna nedra mora«, »Kaj? – Ča/prožimanje i perspektive«, »Ča vrh Arbe«.

Njija se poezija more nać i va nekoliko antologij hrvatskega pjesništva: »Čakavsko pjesništvo XX. stoljeća«, »Moreplovi«, »Antologija hrvatskog pjesništva Istre 19. i 20. stoljeća (Istra kroz stoljeća)«, »U ovom strašnom času«.

Njija je poezija prevedena na dvajsetak zajik. A neke pjesmi smo kantevali aš su uglazbljene za MIK. Kako ča su »Srebrni dan« i »Nisan šla za ten«.

Objavjene su njoj knjigi: »Svakodnevna misa riječi«, Rijeka 1969., »Otprilike dan«, Rijeka 1977., »Nella terra delle nifee«, Napulj 1982., »Cimbuja« Ustanova IMR, Viškovo 2018., »Mat mi j’ užala povedat«, Naklada Kvarner 2022.

Marija Trinajstić je čuda let bila presednica opatijske katedri Čakavskega sabora.

Dobila je nagradu za životno djelo od Grada Opatije i godišnju nagradu »Drago Gervais« 2019. leta za najboju pjesničku zbirku »Cimbuja« objavjenu na čakavšćine, na njijen opatijsken zajike.

Skupa zadnjun zbirkun »Kantunić ot mizerije« otkumpanjat ćemo našu Mariju na opatijski cimiter. Pak ćeš nan va spomeneh »… kako i tvoj kamik vavek ostat …«.