Avah je mane, iskreno ću van reć – ča j’ preveć ni z maslon ni dobro. A ovo z Merikun, zibiranjen i glasimi to j’ trakavica koj da ni bilo novinari još vavek ne bimo videli kraja. Saki dan bin pitala ako su pobrojili, a odgovor bi vavek bil – nisu. To me j’ vrnulo va vrime seriji »Đekna još nije umrla, a ka’ će ne znamo«. Ako se domišljate – dobro, ako ne isto dobro. Intanto, neka mi još ikada neki reče da su Crnogorci leni aš nisu na izborimi va jednomu danu pobrojili glasi, zićepat ću ga aš njihovo j’ tradicionalno pravo bit len, a Merikanon ni. Oni se vavek hvastaju da su prvi va semu. Zmisleli su ovo, zmisleli su oni, more bit i samoga Boga su načinili, a o Eve, Rajskomu vrtu i kačke da ni ne govorin, ma ti glasi nikako da pobroje.

Kad su već dosadili onemi ke su stvorili, i Bogu i vragu, novinaron je pal škur na oči i sami su proglasili pobjednika.

I tako se ja stanen, pogljedan na mrežu seh mrež i vidin da će bit tarapana. Bajden je dobil, Tramp je zgubil. Srce Isusovo, vagun dreka, mislin si aš znan da se j’ gubitnik već nameril na tužbu ku će poslat na Vrhovni sud, da njegove pristaši već gredu na cestu i da j’ Janša na sto čud aš ki rano rani ki put, onako pospan i va septičku pade. Govorin matere da j’ va Merike finilo. Ona pita – ča korona? Njoj se se vrti okolo pandemije. A ča, ni njoj za zamerit aš pravo reć, ča j’ nju od 84 leta briga ni za Meriku ni za njeji presjedniki. Ma ne dan se ja i govorin:

– Mat, va Merike su konačno pobrojali glasi i zibrali presjednika.
– Ki j’ dobil? On nemi al on plastični, pita ona.
– On plastični, odgovaran.

– Ne pojidan se zato ma sedno mi j’ on nemi bil simpatičneji, ov drugi koda j’ već pokojni, ma kako su zibrali tako će njin bit, leh hodi mi zmerit tlak, govori ona.
Zmerit tlak zaspraven znači zmerit njoj temperaturu aš korona j’ dopeljala nekakove nove reguli va naš dom. Tri put dnevno merenje temperaturi. I to si. Srića od Boga, mačak je izuzet. A zač brka tlak i temperaturu, ne znan, ma najprvo će bit da njoj dignen tlak pa staflje po sistemu – ča na umu, to na drumu.

Dok ona kiseli ta toplomjer spod pazuha i njurga da za ča ja delan kad ne moren kupit onu pištolu ka za čas zmeri kuliko si tepal, ja malo mislin kako neće bit baš lahko Trampa deložirat. I valje mi pade napamet kako naši od Živoga zida imaju vele šansi za delo preko bari. Naučni su, strenirani, a ni njin niš novoga ni da jih znašaju, pa zač ne bi tržili ako moru.

Onput mislin kako za Trampa ovo vrime baš i ni neko. Mislin, da bi moja prijatelica Karmen rekla da ga muči (zaspraven bi rekla – jebe, o.n.i.*) retrogadni Merkur. Zbilja ga da po semi plani, i na poslovnomu i na privatnomu. Em ni već glavni od glavne državi na svitu, em mu Melanija vrda. Poveda se da j’ obećala da će zdurat doklen ne fine izbori, a onput će dalje. Pa se ja pitan, bi ona dalje i da j’ Tramp dobil ale bi se još par let potrpela. Z druge bandi on gospodin Plastični, kako bi moja mat rekla, da j’ medijin rekal kako Melanija more i ostat va Beloj kuće. I ki j’ sad tu lud? Pa ča nima on paronu? Ča j’ svinger? Tuliko pitanj, a odgovora ni od kuda. Ono ča stiže je – kuliko ću ja ov šćap držat spod ruki!!! Pomislin da se j’ i mane šjor Merkur Retrogadni posral kade j’ dospel i stoički očitavan:
– 36,6.
– Vidiš, još jedan i eto ti temperaturi, komentira ona.
Mislin si – da se ubijen valje ale ki čas kašnje? Zamen zraka i govorin:
– Ja, kritično ti je, ne još jedan. Još pol i gotovo.

Pogljeda me spod oka, pa još jedanput i onda:
– Hodi mater ženit, ča ti misliš da san ja bedasta. Iman 84 leta, ma nisan bambinita. Temperatura od 36,6 je školska temperatura i ne seri!

Počela san se smet aš ča j’ bilo bolje pitat da otkuda onput on jedan pa će temperatura doć? Me par da j’ ona z brojimi i zbrajanjen kod Merikani. Ma kad dojde oganj do nohti onput broji kod Švicarci. Tako van je to, doklen te ne zasrbi, ni te volja i nimaš lazno za češat se.
*o.n.i – oprostite na izrazu (narisala bin van on smehuljak ma ne moren, ne dopušta sistem)