San bila kuntenta ki’vo dan. Zač? Zato aš san pročitala da se j’ Lipa naša našla na liste najpoželjnejeh zemalj svita za život penzioneri. Najme, magazin »International living« sako leto dela anketu va koj sudjeluje veli broj njegoveh dopisniki z celoga svita na osnovu čigovih mišljenja magazin slaže listu.

I hopa, evo i nas na, me par 23. mestu, ča j’ već leh dobar rezultat. Jasno mi je da se još vavek ne moremo merit z Španjolskun, Portugalon, Floridun i slično, ma smo, govore oni ki znaju, zadnjeh let fanj avancali. Nikakovo čudo aš mi imamo se – i sunce, i more, i dobru klimu, i dobru kuhinju, dobra vina i se dobro, a strani penzići imaju penzije s kemin ne moraju mislet kako pospojit kraj z krajen aš va jednomu Londonu jako teško, ma na Malomu Lošinju ale kade drugde – jako lahko. Šest meseci života va Hrvatskoj njin je kod mesec doma. I tako j’ se već i već oneh ki se opće ne premišljaju leh zajedno odluče po stari dani preselit. I neka dojdu, ako već i ne moru natalitet, baren će nan jedan sled popravit demografsku sliku. Naši penzići i da ćeju z onun crkavicun ku imaju moru jedino poć va Tonguziju. Njin će i dalje penzija va prosjeku bit okol tri i pol tisuće kun, a kilo jagod na place pedeset, pa ti ji zdravo. Bonđorno! Ni zemlje za hrvacke starce.

Z druge bandi ispada da imamo jako šegavi mladi aš kako drugačje protumačit da osnovnu školu tuliki od njih fine z pet. To ispada da va razredih sede se lumen do lumena. I ča će sad ovi va srednjoj kad dojde vrime upisa i nariva njin se tuliko odlikaših leh popizdit. Domislin se da kad san ja hodila va osnovnu, to j’ na razred od 25 školani eventualno bilo tri odlikaši. Po tomu ispada da su nekadanje generacije bile ćampaste, a da se danas deca rode već z diplomun.

Skoro da i ši aš kako drugačje protumačit da j’ mrežu veloga teleoperatera hakiral jedan mulac od četrnajst let. Mane ni jasno zač se tomu si čude, pa neću ju valjda ja i mane slični hakirat kad se va informatiku razumemo jušto onuliko kuliko nan rabi i ni sleda već. I ča će sada bit z tin malčićon? Će ga pokupit strani hakerski magi i zet pod svoje ale će ga zet naše odgovarajuće službe, ma ne kod šegrta leh kod profesora pu koga će imet praksu.
Ja bin rad šla na praksu pu našega Frke Petešića aš i ja iman jako puno knjig ke niman već kade držat pa neka mi poveje, neka me navadi kako doć do nekakovoga skladišnoga prostora kade će knjigi na miru i va suhen spat, a ja neću niš morat platit. Rado bin ja šla na praksu i pu oneh ki dobijaju soldi za odvojen život od familje aš ni mane ni nikada doma, a da bi mi ikada neki platil ta odvojeni život.

Onaj ki će platit da tete i barbe va vrtiću ne štrajkaju je Grad Rika. I neka da, a ja se zajedno ispričavan ča san jih tako nazvala aš san se jušto sada domislela da ne vole da jih zovu tete z vrtića aš za pravo reć one to nisu, one su odgajateljice, ale ako su muški – odgajatelji. A kada smo već pu rečkih vrtići iskali su četrdeset spremačic, a na oglas njin se javilo njih već od sto. I ni mane sad sporno to ča se j’ tuliko ženskic javilo za delo, tr si znamo da j’ va današnje vrime teško delo nać, leh me zanima zač se va teh oglasih o čišćenju vavek išću čistačice ale lipje reć – spremačice, a nikad ne piše recimo – tražimo spremačicu ili spremača na puno radno vrijeme i u stalni radni odnos. Ale kako već to gre. Mislin da se tu dela o čistomu seksizmu i, obećajen van, ako mi ikada va životu bude rabilo posnažit ale popeglat ča, va mojen će oglasu bit zastupljena oba spola i šlus!

Za kraj današnjeg pogovora – ljubav. Valentinovo je fala bogu pasalo, ljudi su se ta dan voleli da j’ to čudo, odbavili smo još jedan uvezeni blagdan i sad do drugoga leta moremo bit na svetomu miru. Valje van je jasno da san ja on antivalentinovski tip čovika. Aš ča ćeš me volet jedan dan, voli me saki dan. Mislin da su antivalentinovski nastrojene i se maški va momu susedstvu. Ni pu njih već ne vredi ona o veljače kod mesecu mačje ljubavi. Intanto se one vole kad njin dojde, ne abadaju ni na mesec, ni na datum. Ošegavele su i one.