Joh i kataloh je bil pu mane pasanu sobotu. Dobro da san živu glavu zivukla. Najme, zazvala me je gospa Ana. Ona od kokoš i se mi po spisku, ma ne do sedmoga leh nisan ni znala pobrojit do koga kolena. Njeje kokoše da nisu kurbi da se saki okol njih mota, a ona da j’ mislela bit madam da bi bila va mladoste, a ne va staroste. Intanto se j’ jako razjadila na me i zijala radi toga ča san nju i njeje kokoše klala va novinu, aš ona da j’ leh moj meteorolog, a ne od celoga komuna. Jušto tako mi je rekla, a onput mi dala do znanja da me more i tužit. Kad san došla na se od šoka i vjeverice, kako bi rekal jedan moj prijatel, jedino ča san uspjela reć je bilo – za miloga Boga, zač tužit. Odgovorila mi je – za duševne boli, za ča drugo.

Ča mane trebe da mi susede okolo pohajaju i da me otipaju. Ča mi rabi da se po selu pitaju kuliko san platila reklamu. Ja san jedna fina starica ko j’ takove monadi ne rabe. Provala san se ispričat, objasnit, ma koda zidu govorin. Ona j’ nastavila navrezat. Maši i otpeva bolje leh si popi ke san va životu čula. Govori da je njeja nervoz prešla na kokoše, da njoj ne nesu, da su depresivne, a se radi mane. Pirga da neće ni koricu od naranči više pokljucnut kuliko je finjena, a Pepica da j’ se perje sa sebe poskubla.

Nastavlja kako j’ to njoj ne leh duševna bol, to da j’ i ekonomska šteta. Se da kreši, a ona da ne more ni šest jaj skupit za prodat. Ona maši, a mane pot obleva i stalno govorin – oprostite gospa Ana, oprostite. Već mi se j’ i mat finila aš da san bila bleda kod zid. Zbilja mi j’ bila muka i nikako nisan znala kako popravit šundrano. I kada san po ne znan ki put rekla – oprostite, ona j’ prasnula va takov smeh da mi j’ skoro bubnjić na uhu pukal.

Smeje se ko dite, a ja sa finjena i zbunjena ne moren besedi reć aš si mislin, ajme ja san zbilja Anu znemela. Kada j’ došla do zraka, govori – san te, a san te! Da ča leh san te.

Baš da si trubila, pa ča si zbilja poverovala da se jadin, pa još na te. Odi z milen Bogon, pa baš si bedačina. Ja san kupila troje novine kada j’ zišal članak. Jedne za se, druge za susedon pokaživat i mast njin vadit, a trete za sestre va Meriku poslat.

Sada san se ja počela na vas glas smet aš san ju mogla zamislet kako okolo pohaja sa si važna. Ma, nisan ni trebela aš mi j’ ona to sama povedala. Tako da j’ šla najprvo va butigu kupit griz za šimunelu načinit, a zaspraven leh da vidi kako će butigerica reagirat. Zajedno da joj je rekla – pa, gospa Ana vi ste zvijezda dana. Ona da njoj je odgovorila – ne, leh ti si. Bonđorno! Obrnula se i sa si važna šla do nekakove Mari ka isto da ima kokoši ma da su njoj jaja kod balice za ping pong.

Ova da njoj je rekla – lahko j’ tako kad se ima poznati za prijateli. I sad da van ne prepričavan komu j’ se pokaživala ta tekst i ča j’ se komu odgovorila, dosti j’ reć kako j’ finil naš razgovor.

E, pa rekla mi je da njoj je jako drago ča san ju klala va novine aš da ako va novinah moru bit kokoše od Alena Polića, e, pa da moru bit i one od gospe Ane. I neka da dojden na kafe aš da bi bilo vrime da se i upoznamo kad se tako lipo povedamo. Govorin njoj da bin morda i došla kad bin znala kamo, a ona kod z topa – nećeš ni znat i poklopi mi slušalicu. Mislin da san va tomu času zgljedala kod drek na dažju. Tu j’ finila štorija od gospe Ani, bar ova epizoda i zbilja me nikad niki ni tako prevaril kod ča me je ona, ma j’ počela štorija od Mladena i njegovoga prča.

Ki j’ sad ta Mladen? E, pa to j’ isto jedan va regimente oneh ki mi imaju vavek neš za reć, a nikada jih va životu nisan utaknula. On je zval sobotu okol šeste ure večer i govori – ča, kokoše ke pogajaju kakovo će vrime moru va novinu, i ta Pirga, i ta Pepica i to Anino jato, a moj prč Mirko ne more? Sa znemljena govorin – ma hote šjor Mladene vi i vaš prč mater ženit, da ne rečen ča hujega. Ma, ne da se Mladen, odgovara – molit ću lipo, i moj prč mora va novinu. Odustajen i pitan – a, ja ću molit lipo odgovor na pitanje ča ta vaš prč prognozira? Mladen govori – on je sportski prognozer. Srce Isusovo, kakov sad sportski prognozer, pitan. Odgovara – saki put kad Rika igra, on zna će dobit ale zgubit. Odgovaran – nećeš ti šegavije, tr to znan i ja kad stalno gubi. Onput mi je i on poklopil slušalicu. Eto, pa ti budi selski novinar.

A ča se tiče drv… Još nisu došla.