I tako, partila j’ i ingleška kraljica ale kako bi moj pokojni sused Zdravko rekal – niki za seme neće ostat. Celo kraljevstvo je va veloj tuge, ča ni nikakovo čudo aš nje se domišljaju mnoge generacije.

Kako i nete kada j’ puneh sedandeset let sedela na tronu. Kuliko j’ za videt i čut, fanj od njih na nju i njeju vladavinu imaju lipa domišljanja, ma je i oneh ki bi rekli da od takove ne rabi jaricu držat.

A sto ljudi, sto domišljanji, ča drugo reć. Intanto smo se kraljica i ja jedanput utaknule – ne na blizu, ma san ju videla. Mat je, kad san joj to povedala leh rekla – bonđorno, to se ne računa aš tako san i ja videla Tita kako si ti nju pa koda ga nisan.

Nisan se otela svadit leh san ju pitala da ča se njoj videla ta kraljica. Malo j’ stala, razmislela i bubnula – a, ni se tepla mrzle vodi napila, ne.

Va pogovoru san doznala da se matere više pijažal princ Filip, mada j’ kako bi ona to živopisno rekla – bil jedan poteci mali aš da kamo j’ kraljica z okun on bi z troskokun.

Jako njoj se pijažala i princeza Dijana, ona da j’ bila putujuća tuga, govori mat. Da njoj se va očijah videlo da j’ sa bol ovoga svita va njoj.

Kamilu ne more smislet aš da kakova j’ to ženina ka se gre pačat va tuji brak, a za princi Viljama i Harija ima leh lipe besedi.

Pitan ju da ča misli o novomu ingleškomu kralju, ona govori – ma ni mi baš jako simpatičan, mada mi ga je i jedan sled žal aš ni lahko počet delat z tuliko let.

Da će mu bit lahko – neće, a me par da će zotun monarhijun vladat ona Deva. Ostala san aš ki j’ sad Deva, a onput san se počela smet aš san dokončala da moja mat, kod i ostatak Hrvacke prevodi kraljevska imena pa j’ Kamilu prehitila va Devu.

A, ča, tr se j’ dobro načinila aš ako j’ Džordž Šesti mogal bit Đuro Šesti, a Čarls treći Karlo Treći, pa zač onput i Kamila ne bi bila ovako kako j’ moja mat zaključila.

Intanto, ono ča san još dokončala je da već nikada, baš nikada š njun neću povedat od lingvistike, pravopisa i sličnoga aš ona se doslovno shvati i prihvati.

Kada smo finile okol imen pitan ju da ako bi ona rado bila kraljica i čujen ono ča san i mislela da ću čut – ja san već osandeset i šest let kraljica pod svojin klobukon.

Istina aš ju je moj otac štimal jednako kod ča j’ i Filip svoju Elizabetu Drugu ako ne i već. A morala san ju malo pa san rekla – kuliko ja znan, ti nimaš i nikada nisi imela nikakov klobuk.

– Telice, da telice to se leh tako reče. Ono ča mane zanima je kade j’ ona štivala ti svoji klobuki, broši, postoli i halje aš znaš kuliko se j’ toga va tako dugomu i bogatomu životu nakupi.

Nisan njoj znala ča reć pa san bubnula – kad bi zišlo z mode delila j’ sirotinje. Mat govori – drek je ona delila, kralji ne dele oni zimaju.

I tako san ja dokončala da moja mat definitivno ni za monarhiju ale kako bi, doklen smo ki’vo večer gljedale onu seriju o kraljice na prvomu programu od HTV-a rekla – žal mi je sirote starice, bila ona kraljica ale ne, ma ono ča ne razumen je da j’ tuliko ljudi potloh od tugi.

Saka njoj čast, ma kakove vezi mi imamo s ten sen skupa. Na, ni seriju mi nisi dala gljedat radi ovoga.

Odustala san od povedanja i nastavila gljedat kraljicu. I ona se j’ umirila i na samomu kraju rekla – znaš ča, Bog njoj dušu pomiluj.

Kada san otela povedat o tomu da j’ kraljica volela žarke boji, naročito zelenu, roza, žutu i plavu ona j’ rekla – mislin da je najveć volela konji i pasi.

I tako smo finile pogovor od kraljice, a na moju velu sriću nastavile onaj od drv. Aš drva su na privratu, posložena, ma ne i suha. I ča mislite ki j’ opet kriv ča daž pada i ča drva nisu spravna va drvarnicu? A ki drugi leh ja.

Sama sobun san već luda i na glavu, i na se od teh drv. Baš sad prijatelice govorin kako ću na kraju zet cjepanicu po cjepanicu i sušit jih z fenom, a ona odgovara – a, ki ti je kriv kad ne reagiraš na vrime.

Jedna druga dodaje kako mi j’ bolje ne pačat se va fen aš da su mjere štednje letrike pa da bin mogla i kaznu platit. I kako god da obrnen, jadna mi palenta. Jedino ča mi preostaje je Svevišnjega molit da malo buričine pošalje pa da me reši oveh muk.