Da mi Sveti Mikula niš ni klal va čižmu, to ste mogli znat i bez da van rečen. Ma, ni šibu, ča znači da ni Krampusu nisan interesantna. San se rastužila? Naravno da san aš jedno j’ kad ti Mikula pokaže da si zločest, onput se trsiš popravit, a sasma drugo kad te ignorira. To znači da j’ i on digal ruki od tebe. A nekada me j’ jako volel, si postoli ke bin pušćala bi mi napunil.

Ma, nekad bilo, sad se spominjalo. Domišljan se, kad san bila mića ne bi si ti bomboni, naranče i igraljke ni mogli stat va mići postolić, pa ga ki put ni bilo ni videt od silneh dari. A, ja kad je Mikule va delu pomagala cela Višnjevica.

Onput san dugo vrimena dobivala olovki, gumice, flomasteri i se ča mi j’ za školu rabilo, pa j’ došlo vrime od šib i na kraju – drek na šibice. OK, sakomu prama zaslugami, a ja se još ufan va Djedicu, a ako i va njegovoj vreće ne bude niš za moju malenkost, onput će bit teška depresija. Već vidin.

Tuliko o Mikule i darimi, nego da van ja sad malo povedan kako san šla va metropolu i ča me j’ tamo tukalo. Avah je mane, najhuje je kad si neš staviš va glavu i nikako prestat o tomu mislet pa su vele šansi da ti se to na ča misliš, zaspraven česa se bojiš i dogodi. Najme, va Zagreb smo kolega i ja šli na nekakov dogovor i po putu nazgoru se j’ bilo OK osin ča j’ mane želudac prekidal.

Prekida me već neko vrime ma kako me j’ strah koroni i pohajanja dohtoron trpin va nade da će pasat. Malo se j’ smiril i odbavili smo jedan del dela radi koga smo šli bez većega problema, ma kad smo z točke A krenuli ka točke B, hodeć i kada j’ mane sinulo da su si kafići i restorani zaprti nastal je kuršlus. Istoga časa mi se j’ počelo curat, proljev me j’ lovil, dakako i na povraćat mi j’ hodilo i se to najedanput.

A kamo, a ča? Ću gaći dole na sred Zrinjevca i zijat – sila Boga ne moli. Tako grozan osjećaj nemoći već davno nisan imela. Mislin da san tuliko pobledela da se j’ to i kroz masku moglo videt. Videl je i kolega da se s manun neš dogaja aš san zamučala, ča j’ pu mane gotovo pa nemoguće i najedanput san tuliko brzo počela hodit, a brz hod isto ni karakteristika ka me krasi.

Pita da ča mi je, a ja od muki ne moren ni odgovorit. Glava mi se kod ringišpil vrti na vratu išćuć kamo bin mogla čepnut, a da me ne vidi pol Zagreba ako bude sila. Nigdere zaklona, a more ljudi na ona tri zaredana zagrebačka trga.

– Mislin da moran na zahod, jedva san rekla.

– Mislim da je to nemoguća misija, potrpi dok ne dođemo u galeriju, odgovara on.

Da ti pas uši, a ča delan ako ne trpin. I to već carevo leto ča bi stari rekli. Još mi se j’ počel i smet.

– A ništa, ako vidiš da ne možeš izdržati, zvonit ćemo nekom na vrata, pametan je moj kolega. Moreš mislit ča bi ti neki va vrime korone pušćal da greš va njegovu intimu. Nekako smo došli do te galerije i znate ča? Onoga časa kad smo šli nutar mane su prestale se tegobi.

Ma, koda niš ni bilo. Odbavili smo i put nazad. Prveh petsto metri je bilo va redu, a onput opet se isto. Pot me j’ od trpljenja probijal. Još manje mi j’ pomagalo njegovo navrezanje va stilu »ja tebe ne razumijem, pa sad smo bili u prostoru koji ima zahod, pa zašto nisi išla?«

– Odi ti curat i se to drugo ako ne moreš, zijala san. Srića od Boga da Zagrepčani ne stoje baš najbolje z čakavskin pa nisu razumeli ni temu pogovora, ni ča san mu sega zdelila. Intanto san nekako došla, zaspraven dotekla do toga auta i rekla mu – vozi Miško. Dočin smo se dočepali autoputa mane više ni bilo za poć va zahod. Zač? Zato aš na autoputu postoje pumpi.

– Eto vidiš da je tebi svaki problem vezan uz glavu, govori mi on.

– E, bome ni aš ovaj je bil vezan uz rit i želudac, odgovaran fanj grubo pa j’ zamučal. Znan ja da j’ on va pravu ali ne bin to va sto životi priznala.

Tako san van ja radi nedostatka kondoti bila »Martin va Zagreb, Martin Zagreba«. A, bit ću van iskrena, doklen se ne opru birtije ni po Rike neću hodit, aš i mi imamo leh tri javna zahoda va centru. I nisan baš sigurna da delaju. Eto, kakovo j’ vrime došlo, da se va gradu nimaš kade ni pocurat. A mojoj glave rit urdin daje. Ma, strašno.