Ne znan kako vi, ma ja san fanj zbunjena. Ni mi ćaro puno toga, a se j’ vezano i zavezano okol oveh noveh mer za ke je Stožer od Primorsko-goranske županije molil i prosil on državni da jih uvaži. I ča mane sad tu ne gre va glavu? Puno toga.

Kuliko san imela čut i pročitat, naša j’ županija po toj sakramenskoj procepljenosti valje zad Zagreba ča će reć da smo se altroke procepili. Onput čitan da smo četrtak imeli na 460 testiranj leh jedan slučaj zaraze.

Pa gljedan sliki po fejsu i vidin da j’ red za cepit se spred zametske dvorani i onput stanen i samu sebe pitan – ki je ovde lud?

Va drugemi hrvaškemi regijami dar-mar okol te korone, recimo va zadarskoj, i oni niš, a mi pu keh je se na svomu mestu išćemo da organizatori javneh dogajanji šetemanu dan prvo leh dogajanje bude, nadležnemi službami dostave kuliko će njin ogledno ljudi bit na koncertu, predstave ale ne znan na čemu, kod i to da si ki dojdu moraju predočit kovid potvrdu.

Sad će neki reć da ni poć po kovid potvrdu isto ča i poć kopat. I je, tako je, ma nisu si mogući poć va grad na te HaZeZeoi i HaZeZeJi i iskat ta sakramenski kovid ausvajs. A sad si vi ki se mislite delat šegavi i reć da ki je e-grajanin ne mora poć z domi nikamo, leh utipka i va roku od pol uri dobije to ča mu rabi mučite aš i moja bi mat šla na koncert, ma za e-grajanina ni ni čula.

A kuliko je takoveh kod moja mat. Zaspraven ona ju i ne bi mogla dobit aš nima apsolutno niti jedan preduvjet da ju dobije – ni se cepila, ni imela koronu i ni ju briga ča stožeri povedaju, pa njoj je jedina šansa ta antigenski test za koga isto baš ne haje pa će lipo njeje kulturno leto bit spred televizije ča je, kako bi ona rekla – korona fašizam.

Ma, lahko za nju, mane više pojida to ča niš od sega ča se dela ni logično, a ne volin kad neš ni logično. Recimo, zač spred nekih kafići ima vagun ljudi, pušu jedan drugomu za vrat i jedan va drugoga i ča – nikomu niš.

Niki ih ne pita nikakovi ausvajsi ni nikakove potvrde o cepljenju. Oni moru, ma koncert kade j’ se po peesu, e tamo su drugačije reguli. Zač ljudi moru va bolnicu prez ikakoveh papiri, a recimo, ki’vo dan je va čekaonice na poliklinike bilo više od pedeset ljudi.

Još mi niki ni prvo leh san šla nutar zmeril temperaturu ni pošprical ruki, a kuliko ja znan prvo leh ujdeš na koncert moraš se zapisat i neretko te skoro pa otuširaju z onen vranićen za dezinfekciju. Još su ti koncerti i sedeći pa ni straha da će neki va te puhat.

I oni ne moru, a fešta spred kafići more. Saki ki po petku večer pasa spred Konta videt će ča j’ korona na djelu. To ne bi ni igla stala med tu mladež kuliko ih je. Tr ne moru ni oni stat pa se preleju va na park kraj Mrtvoga kanala.

I, sopeta – nikomu niš. Najprvo san bila jako jadna na ti mladi ki niš ne paze na svoji stareji, a sad njin dajen za pravo aš ne pušćaj ih na koncert, na predstavu, na ča ja znan ča se ne, ča će? Će ponemet. Kad se niki ne bavi z logikun, zač bi se oni.

A sad da malo zakopamo i va financijske posljedice najnovejeh mer. Recimo, su oni ki su jih donesli misleli kuliko ljudi će radi njihove odluki ostat prez soldi? Ki će, recimo, vrnut organizatoron soldi ke su ugovoron zajamčili izvođačon i ke će morat isplatit neovisno bilo va publike dva ale sto gledatelji, a organizator je mislel da će se pokrit od prodaneh karat?

Ki će njin dat soldi za vrnut gledateljon aš nimaju si gledatelji kovid putovnice, a masu dogajanji je već rasprodano? Si oni ki neš organiziraju, a nikomu još nisu niš platili, otkazat će koncerti, ča znači da će prez solad ostat i izvođači, i tonci, i rasvjeta, i zaštitari, a recimo po teh silneh Kulturneh leteh, ke ima gotovo saki grad i općina, va konačnice i oštari.

Ta Leta su njin odvavek prilika da neš zarade. Ovako – ni dogajanji, ni publike, ni soldi. Va celoj toj štorije si gubimo, jedino korona dobija, a je se se to moralo tako ale se j’ moglo i drugačje – ne znan. Morda ja opće niman pravo, ni to ne znan, jedino ča znan je da mi je tek pokle ove odluki, verovali ale ne, prvi put va životu ćaro ča dela lud zbunjenomu.

A, niš, očito je da ćemo ovo leto imet tiho pjevanje.