S KAMIKA I MORA

Piše Slavica Mrkić Modrić: Teleportacija

Slavica Mrkić Modrić

Foto Vedran Karuza

Foto Vedran Karuza

Nisan kažnjavana, fanj dobro vozin, a čistit ću valjda navadit. Ću trenirat po kuće i privratu, a ako vidite nekakovu monu ka pometa po ceste, to san ja na treningu



Znate ono kad ti roditelji i prijateli celi život govore – neka ti je kad nisi otela poslušat. A lipo smo ti govorili. Ja tako ča čujen sako malo, a se više mi dohaja z riti va glavu kako imaju pravo. Da mi j’ za saku stvar za ku mi j’ mat rekla da ne načinin, a ja san ju načinila da bi se pokle pukazalo kako bi bilo bolje da nisan, dat leh jedan cent, bila bin bogateja od onoga malčića z Varaždina ki već z 24 leta ima Lamborđini Hurakan. I ni ga dobil na lipe oči leh je dečko poduzetan. To ča ga sad istražuju si oni Pnuskoki, uskoki, poskoki i ča ti ja znan ki se ne, to ni važno. On je delal svoje delo, oni delaju svoje, a sud će pokle presudit. Tr ni malčić ni prvi ni zadnji koga istražuju si ti »skoki«. Uglavnon, čekamo da istraga fini pa ćemo znat je mali bil poduzetnik ale tat.


Poduzetna nikada nisan bila, ma da san poslušala bin lipo bila finila srednju školu i namesto va gimnaziju bin šla va kakovu obrtničku školu i danaska bila jedna z najiskanijen zanimanjen. Z ken? Pa z neken ko spada va uslužne djelatnosti. Čitan kako na portalu Moj posao lipo piše da j’ najveća potražnja za konobarimi, kuharimi, recepcionerimi, šoferimi, prodavačimi… Nekako se najprvo vidin kako šofer, pardon šoferica i to ne busa aš ki će na kraj zić z ljuden, ne taksija – z istoga razloga, ne vlaka aš te željeznice – nikad doć, ne ni cisterni aš toga me j’ malo strah, vidin se kod šoferica onoga kamioncina od smetlari. Znate onoga najmanjega, a more i od one čistilice ka ima one dve četki spreda pa bin četkala po ceste sto na uru. A mogla bin se peljat sagdere kade se inače ne sme z auton.


Kako stvari stoje, a potvrda mi je i najnoveja vijest ka j’ stigla z Austrije i ka me j’ za zbilja rastužila – novine gredu mater ženit. Svit gre naprvo i nikomu se već ne da čitat novine, dosti su njin portali i ča lagje štivo – to bolje. Va skladu z ten austrijski je parlament donesal odluku da zavavek fini z tiskanen izdanjen dnevnika »Wiener Zeitung«, ale kako bimo mi rekli Viner Cajtung i da ga ljudići moru čitat leh va digitalnomu obliku. Ta 320 let star dnevni list, ki spada med najstareje va Evrope od četrtka će se va tiskanen obliku pojavljivat leh jedanput mesečno, a me par da će i to »jedanput mesečno« jako brzo finit.




I kada takov jedan »starac« projde va vječna lovišta kako neki ki je celi život novinar od tiska more bit dobre volji. Ni da i prvo nisan bila toga svjesna ma se mi se j’ to činilo na dugomu šćapu, a nisan mislela da ono ča j’ bilo dugo kad tad dojde blizo. Intanto, da j’ pameti, a ni je, ja bin već jutra zvala va Čistoću i pitala ako išću šofera od mićeh kamioni. Nisan kažnjavana, fanj dobro vozin, a čistit ću valjda navadit. Ću trenirat po kuće i privratu, a ako vidite nekakovu monu ka pometa po ceste, to san ja na treningu.


Kad san matere priopćila tu svoju famoznu ideju leh je sklopila ruki, pogljedala va nebo i zazijala – mati moja, mila. Zbilja mi ta roditeljica nikada ni bila podrška. Celi život mi govori da bi raje kurbe nogi prala leh se bavila z novinarstvon, a kad njoj čovik dojde i konačno priopći da bi bil šofer od čistilice, sopeta ni dobro. A taman san njoj tela reć da san jedanput z Batifjakun peljala miću čistilicu po Lungomare, a da san po Puntu peljala i to sama, i on malo veći kamion, kad ona mane tako. Tuliko san se razjadila da san se obukla i šla va Kastav. Na Crekvinu s kuda se j’ Let 3 trebal teleportirat va Liverpul. Bilo j’ čuda ljudi i trahtorić. Zajedno san šla pu Mrleta i pitala ako moren i ja va tu teleportaciju aš da bin rado bila šofer teleportiranoga trahtorića.


Rekal mi je da mu j’ žal ma da san zakasnila z prijavun. Znan da on nikada ne igra nepošteno pa ga nisan ni provala nagovorit. Stala san i mislela kako bin se mogla ukrcat va tu teleportaciju. I domislela se. Pa zač ja ne bin bila, kako j’ to lipo ki’vo dan napisal šjor Kukurin – običan ritognjet pa se zamaškarala va ružu i zatukla v rit od oneh ki se teleportiraju. Va čigovu, još vavek ne znan, razmišljan, ma ako me namesto va ovomu kantuniću vidite na pozornice Eurosonga va Liverpulu, znači da j’ teleportacija bila uspješna.