Ki o čemu, ja o maškarami i karnevali. Ne znan kako van, ma mane se j’ lipo videlo ča su maškaroni ovoga kraja, kako to sakomu pravomu maškaronu i priliči, obrnuli z noson i rekli – ako moru si, moremo i mi. Pa su se, kako san zadnji put napisala, lipo dogovoreli da će se svoje užanci, bez iakove krijanci, i unatoč i usprkos pandemije odbavit kako to i priliči. Dakako, se j’ to bilo spontano i uz pridržavanje apsolutno seh epidemiološkeh mer i postulati. Od srca san se nasmela kad san čitajuć izvještaj kolege Glavana z Maškaranoga autorelija »Pariz-Bakar« pročitala da se si sudionici pridržavaju sega ča j’ Stožer propisal pa da va skladu s ten ni va jednen autu ni već od deset ljudi. Kada ih je Glavan pital da zač su va celoj ovoj situacije z kovidon, va ko j’ je i Rečki karneval otkazan, oni kod popratna manifestacija ipak odpeljali svoji uobičajeni maškarani kilometri, va čudu su ga pogljedali i odgovorili – aš nan vrag ne da mira.

Jušto tako ni dal ni mane pa san ki’vo dan kada san bila va gradskomu Poglavarstvu zamolila tajnicu od gradonačelnika da mi dogovori susret. Ma ne z gradonačelnikon, leh z prvin mačkon Grada. Z šjor Miškon. Najme, Miško će za ki dan, ako se dobro domišljan, me par da j’ gospa Iva rekla da j’ to 21. tretega, proslavit drugo leto na toj funkcije. Miško je mačak ki j’ kod beba došal z azila, pazite ne z Brazila, kako bi to moja mat rekla, i to drito va Poglavarstvo. Kuliko onda brižan ni zgljedal ni malo reprezentativno, tuliko j’ sad već leh šesan mačak. Bome ga je ča za videt. Biva va prostorijah od gradonačelnika i jako je štiman i od delavci, i od gosti zgrade gradskoga Poglavarstva. A ča diši, majčice draga!

Kada san mu rekla da diši jače leh kurba, malo j’ obrnul z brkon koda mi j’ otel reć – ma ča pljuskaš, videl bin tebe da si na momu mestu i da te saka ženskica ka kraj tebe pasa zame va ruki i buševa. Zmeša mi se tuliko prfumi da mi se va glave vrti od toga silnoga diha, a ki put se po tri ure moran prat aš san vas na srca. Ja, ča san ja kriv kad san neodoljiv pa me se buševaju. Ni mu lahko, ni, ma mu j’ puno lagje leh mu je bilo. Da ga dobro hrane, to se z duga vidi. Se tako ćakulajuć pitan ga ja »Miško, je istina da si za golubon skočil z prvoga kata na Korzo«. Polovična, odgovara Miško i ne otkriva ča mu se j’ videlo kad je to načinil, leh govori – nezaboravno iskustvo. Njegova prijatelica Iva se ni ne želi domislet na ta njegov skok, mada j’ Miško nakon ča j’ ateriral na Korzo pogljedal okolo sebe ako ga j’ ki videl i koda se ni niš dogodilo ušetal va Poglavarstvo. E, da mi j’ bilo videt izraz lica oneh na porte! Nakon ča me j’ dobro podihal, pregljedal mi tašku va više navrati, pušćal mi par svojeh dlak za uspomenu povukal se j’ na svoju sofu i dal mi do znanja da bi to bilo dosti za naš prvi susret. Lipo smo se pozdravili, on je ostal gazdovat va Poglavarstvu, a ja san prošla skuda san i došla se si misleć kako ov naš grad zbilja zasluži nosit onu titulu »drugačji od drugeh«.

Drugačiji ali drugačiji leh je bil nekada je grad Trst. Sad se vi pitate koga san vranića tamo za rep potezala. Apsolutno nidnoga, šla san delat. E, pa Trst od prvo pet meseci kad san po sličnen delu bila tamo i Trst od ki’vo dan nisu isti, pa ona morete mislet kuliko j’ ta grad drugačji od onoga z 70-teh, 80-teh i 90-eh let pasanoga stoljeća. Ov sakramenski virus zbilja uništava i dušu, i telo kako ljudimi, tako i gradimi. Povedala san z fanj ljudi, od oštari, preko trgovci, do grajani, z mlademi i staremi i si govore leh jedno – ni nan dobro, ni privatno, ni poslovno. Vela j’ apatija va tomu nekad bučnomu gradu po čigoveh cestah danas ne čuješ ni bu, ni mu.

Baš san bila žalosna aš ja Trst odvavek volin, a da j’ se šlo mater ženit bilo mi j’ ćaro onoga časa kada san dokončala da ni oni ki su užali po Trstu lovit ljudi i nudit njin bracoleti i druge pizdarije to već ne delaju. Je jih, stoje nagnjeni na zidi i ako njin ki prijde – dobro, ako ne, jušto njin je sedno. Kad san došla doma jedna jedina misal ka mi se j’ stalno po glave vrtela je kako nikada više neću reć da smo mi vrite, mislin na psihu. Mi smo avion ča se stanja duha va ovomu teškomu vrimenu tiče, a ako j’ zdrav duh bit će i telo, se drugo ćemo nekako. Uostalon, kako bi Petrica Kerempuh rekal – nigdar ni tak bilo da ni nekak bilo, pak ni vezda nebu da nan nekak nebu. Živio Pust, a i mi skupa š njin!